Aningaasanut inatsit 2018: Biilinut innaallagiatortunut akitsuusiisannginneq sivitsorneqassasoq
Naalakkersuisut biilinut akitsuutit nutaat aasaq tusarniaassutigaat. Siunnersuut akitsuutinik allanngortitsisussaagaluarpoq taamaalilluni avatangiisinut mingutsitsinnerinnerusut piumasaqaateqarfigineqalerlutik, Inatsisartulli siunnersuummik oqallisiginninnissaat aappaagumut upernaakkut ataatsimiinnissaanut kinguartinneqarpoq.
Siunnersuummi biilit kallerup inneranik, britimik aamma biilit hybridiusut tassa kallerup innitorlutillu orsussartortut akitsuuserneqartannginnerat januaarip aallaqqaataani 2018-imi atorunnartussaq isummerfigisussaagaluarpaat.
AAMMA ATUARUK Biilinut akitsuusersuisarneq allanngortinniarneqartoq
AAMMA ATUARUK Biilinut innaallagiatortunut akitsuusiisannginneq atuutiinnassasoq
Naalakkersuisut siunnersuut ukiakkut ataatsimiinnissamiit peerneqarmat paasissutissiipput akitsuusiisannginneq ingerlatiinnarneqassanersoq naatsorsorneqassasoq, tamatumalu pisariaqannguatsiarnera maanna paasineqarpoq.
Naalakkersuisut aningaasanut inatsip aappassaaneerneqarnisssaanut allannguutitut siunnersuumminni akitsuusiisannginnerup januaarip aallaqqaataa 2019-imut sivitsorneqassasoq kissaatigaat.
AAMMA ATUARUK Qamutit motoorillit akileraarutaat pillugit siunnersuut kinguartinneqartoq
Taamaalilluni biilit kallerup inneranik, brintimik biilillu hybridiusut ukiumi ataatsimi suli akitsuuserneqanngikkallarnissaat ilimanaateqalerpoq. Tamatumani biilit eqqunngeqarneranut akitsuut tassa nunatsinnut tikisinnerannut akitsuummut, aqqusinernullu akitsuummut ukiut tamaasa akilerneqartartumi akitsuusiisannginnissaavoq.
Akitsuusiisannginnissaq aningaasanut inatsimmi aningaasartuuteqarnerulernissamik isertitaqarnerulernissamilluunniit isumaqanngilaq, tassami akitsuusiisarnermut aaqqiissummik ingerlatitseqqinneruunnarmat. Inatsisissatullu siunnersuut utertinneqartoq aningaasartuutaasussartaqanngitsoq, aningaasaqarnermut naalakkersuisoqarfik KNR-imut paasissutissiivoq.