Biilinut innaallagiatortunut akitsuusiisannginneq atuutiinnassasoq
Biilit kallerup inneranik, brintimillu ingerlatillit aamma hybridbiilit allallu kallerup innitorlutillu orsussartortut maannamut akitsuusiinikkut akileraaruteqartissimanngisat januaarip aallaqqaataani 2018 allatut aaqqiivigineqassapput.
Tassunga atasumik Naalakkersuisut siunnersuutit pingasut tusarniaassutigaat. Tassani siunertaalluni biilinut akitsuusiisarnerup allannguuteqartinnissaa.
Pinngortitaq pillugu nunarsuaq tamakkerlugu suliniaqatigiiffiup siunnersuut nuannaarutigaa:
- Naliginnaasumik isumaqarpunga siunnersuut pitsaasuusoq, biilip oqimaassusaa aallaaviujunnaarmat, taarsiulluguli ikummatissamik atuinera aallaaviulerluni, tassa CO2-mik aniatitsinera, Kaare Winther Hansen WWF-imeersoq oqarpoq.
Utaqqiisaasumik akitsuusiinikkut akileraaruteqartissimanngisat Naalakkersuisut siunnersuumminni ataavartunngortikkusuppaat. Tassa biilit kallerup inneranik brintimillu ingerlatillit siunissami eqqussukkanut akitsuuserneqaratatillu ukiumoortumik akileraaruserneqartassanngitsut.
Tamannalu WWF-imi naammaginartinneqaqaaq.
- Inuit taamaalillutik biilinut kallerup inneranik immertakkanut aningaasaliinerunissaat periarfissinniarlugu:
- Winther Hansenip Naalakkersuisut kajumissaarpai biilinik kallerup innitortunik atuinerunissaq siuarsaqqullugu.
- Illoqarfinni immiisarfinnik pilersitsinikkut siuarsaasoqarsinnaavoq. Illoqarfinni erngup nukinganik nukissiorfilinni biilit orsussartunngitsut kallerup inneranik ingerlateqartinnerisigut CO2 iluaqutserneqassaaq, taanna oqarpoq.
Biilit hybridiusut januaarip aallaqqaataa 2018 sioqqullugu eqqunneqarsimasut siunnersuut malillugu ukiumut 3.627 koruuneqartassapput.
Biilit hybridiusut nutaat januaarip aallaqqaataa 2018-ip kingorna eqqunneqartut benziinatorunik ukiumut 4.500 koruuninik akileraaruserneqassapput, diesilitorunillu ukiumut 5.175 koruuninik akileraaruserneqassallutik.
Siunnersuut malillugu biilit hybridiusut minnermik akileraaruserneqarnerannut peqqutaavoq misissoqqissaarneqarsimanngimmat ingerlanerminni ikummatissaq kallerup inneraninik pissarsiaq orsussarsuulluunniit atornerusarneraat.