Biilinut akitsuusersuisarneq allanngortinniarneqartoq
Biilinut akitsuusersuisarneq Naalakkersuisut allanngortikkusuppaat, biilip oqimaassusia tunngavigalugu akitsuusersuisoqarunnaarluni biilip orsussamik atuinera tunngavigineqartalissaaq. Inatsisissasut siunnersuummi, Naalakkersuisut maanna tusarniaassutigisaanni tamanna atuarneqarsinnaavoq.
Qamutinik motoorilinnik avatangiisinut mingutsitsinngitsunik atuineq akileraarutitigut akitsuutitigullu oqalisaassiffigineqassasoq, inatsisissatut siunnersuummut oqaaseqaammi Naalakkersuisut maanna tusarniaassutigisinnaasaanni atuarneqarsinnaavoq.
Inatsisissatut siunnersuut naapertorlugu, biilit januaarip aallaqqaataa 2018 aallarnerfigalugu nalunaarsorneqartut biilip orsussamik atuinera malillugu akitsuuserneqartalissapput, maannakkutut biilip oqimaassusia tunngavigineqartarunnaarluni.
- Naalakkersuisoqatigiinnissamik isumaqatigiissut aallaavigalugu inatsisissatut siunnersuut kakkiussaq suliarineqarpoq, taassumalu siunertarivaa avatangiisinut mingutsitsinngitsunik qamutinik piserusussuseqarnerulersitsinissaq aammalu illoqarfiup iluani qamutinik motoorilinnik atorunnaakkanik asuli inissiisarnerup unitsinneqarnissaa, aningaasaqarnermut akileraartarnermullu naalakkersuisoqarfik inatsisissatut siunnersuut pillugu taama allappoq.
AAMMA ATUARUK Biilit avatangiisinut mingutsitsinnginnerusut nuannarineqartut
Qamutit motoorillit orsussanik assigiinngitsunik - benzinamik dieselimillu - atuisut nukissiuutinik qanoq atuitiginerat malillugu inatsisissatut siunnersuummi assigiinngitsunut qulinut immikkoortiterneqarput, benzinamillu dieselimillu atuinerpaat qaffasinnerusumik akitsuuserneqartalissapput.
Assertuutitut taaneqarsinnaavoq Toyota Rav4, Nunatsinni atugaalluartoq. Biilimut taama ittumut qamutit motoorillit akileraarutaannik ukiumut 10.746 koruuninik akileraarusiisoqartarpoq. Inatsisissatullu siunnersuut akuersissutigineqassappat. Biilit assingi benzinatortut 2017-imeersullu 12,5-init 14,2 km-inut orsussamik literimik atuisartut inatsisissatut siunnersuut manna naapertorlugu ukiumut 15.300 koruuninik akileraaruserneqartussaassapput - tassalu 4.554 koruuninik akitsorlutik.
AAMMA ATUARUK Biilit amerleriarujussuartut
Qamutit motoorillit akileraarutaat nutaat 2018-imi januaarip aallaqqaataata kingorna nalunaarsorneqartunut taamaallaat atuutissapput.
Qamutit motoorillit akileraarutaata allanngortinnerata saniatigut biilimik eqqussinermut akitsuutip allanngortinneqarnissaa Naalakkersuisut aamma kissaatigaat.
Akitsuut taanna biilip orsussamik atuinera malillugu aamma aalajangersarneqartassaaq.
Biilit innaallagissamik ingerlatillit akitsuuserneqartannginnerat atuutiinnassaaq.
