Biilit avatangiisinut mingutsitsinnginnerusut nuannarineqartut
Biilit ukioq kingulleq 321-nik amerleriarput, tassa 7,7 procentinik amerleriarlutik. Naatsorsueqqissaartarfimmiit kisitsisit nutaat tamanna takutippaat.
- Kisitsisit misissorutsigit tunisagut 30 procentinik amerleriarput, biilillu mikinerit tunisaanerupput, Nuuks Automi biileerniaq, Jimmy Holm Jensen oqarpoq.
Taassuma pisisartut biilinik akikinnerusunik orsussamillu atuinikinnerusunik aamma piserusunnerusarnerarpai.
- Biilit oqinnerpaat, tassa 1.000 kiilu ataallugit oqimaassusillik piumaneqarneruleriartorput. Aamma orsussamik atuinikinnerusut energiklasse A-mik A-plusimillu taaneqartartut piumaneqarnerupput. Taamaa orsussartortiginngitsunik bilisigaanni aningaserivinnit avatangiisinut iluaqutaasussamik taarsigassarsisoqarsinnaavoq, Jimmy Holm Jensen oqarpoq.
Biilit 2013-imiit 2016-imimi januaarip aallaqqaatanut 255-inik amerleriarput. Ukiumilu 2016-miinnaq 321-nik amerleriarlutik.
Taamaattoqarnera inuit aningaasaateqarnerulersimanerannik bankillu erniakitsunik taarsigassarsititsisarnerulernerannik pissuteqarsinnaasoq, Jimmy Holm Jensen isumaqarpoq.
- Inuit aningaasaateqarnerulaalersimapput sanaartortoqarnerullunilu. Minguik atorlugu GrønlandsBanken aamma Bank Nordik erniakitsunik taarsigassarsititsisarnera pisisartut atorluaraat aamma malunnarpoq.
Nunatsinni aningaasaqarneq ataatsimut siornatigumut sanilliullugu tamaat isigalugu ajunnginneruvoq. 2016-mi tunisat pisiallu oqimaaqatigiinnerat 1 milliardit 274 millionit koruunininik amigartoorfiuvoq, ukiup siulianit pitsaanerullutik. Kinguneranillu aningaasat amerlanerusut nunatsinni kaaviiaatsinneqalerlutik.
AAMMA ATUARUK Biilit amerleriarujussuartut
