Naalakkersuisoqatigiit isumaqatigiinngitsut: Siumup akitsuusiiniarneq akerlerigaa

Biilit innaallagiamik orsussamillu akuleriisillugit ingerlasut nunatsinnut eqqunnerat aappaagumit 50.000 koruunimik akeqalissasoq, qamutinullu motorilinnut akileraarutaat marloriaatinngorluni 2026-mit ukiumut 13.000 koruuninngussasoq, aningaasaqarnermut naalakkersuisoq, Naaja H. Nathanielsen, inatsisassatut siunnersuuteqarpoq.

Tamannali naalakkersuisoqataasut tusarluanngilaat.

AAMMA ATUARUK Biilinut akitsuusiiniarneq: Tuniniaasoq tuniniaajunnaassasoq atuisorlu pakatsisoq

- Taama ilisimatitsineq Siumup tunngaviusumik isumaqatiginngilaa. Inuit kaasarfiinit aalliinnartarluni nunatta aningaasarsiornikkut unammilligassai anigorneqarsinnaanngillat. Inuiaqatigiittut aningaasarsiornerput mattuttartulersuinnarlugu siumut aallartinneqarsinnaanngilaq, Siumup Inatsisartunut ilaasortaasa politikikkut oqaaseqartartuat, Doris J. Jensen, tusagassiuutinut taama nalunaarpoq.

Tassalu Inuit Ataqatigiit Siumullu qaammatini marlunni ullunilu 18-ini naalakkersuisoqatigeereerlutik siunnersuut pillugu isumaqatigiikkunnaarput.

Naalakkersuisup isummerfiginngikkaa

Siunnersuuteqartullu suleqatimik akerliliinerat oqaaseqarfigiumanngilaa.

- Partiit ataasiakkaat isummernerat maannakkut oqaaseqarfigissanngilara. Taakkua tusarniaanermi isummertarnerat nalinginnaasuuvoq. Tusarniaaneq naammassereerpat isummerfigiumaarpakka, Naaja H. Nathanielsen KNR-imut oqarpoq.

AAMMA ATUARUK Naalakkersuisoq: Biilit hybridiusut motorimut akitsuutitakinnerat tunngavissaqarunnarpoq

Naalakkersuisut bilillit akiliinerusalerneranni isertitassatut naatsorsuutitik, sulinermut ilanngaatip aningaasartaasa amerlinissaannut atornissaat siunniuppaat.

- Innuttaasuni eqimattat ilaannit akissaqarsorisatsinnit tigusissaagut. Pissakinnerpaat isumagissavaugt, taava allat akiliisariaqarput, Naaja H. Nathanielsen oqarpoq.

Taamali siunnerfeqarnermi biilillit Siumup aallerfingerusunngilai.

Siumut: Naalakkersuisoq paasitereerparput

- Qanoq iliorluta isertitaqarnerulernissarput sammineqartariaqarpoq, pingaartumik inuit sulisinnaasut namminnerlu periarfissarsiorusuttut tapersersorneratigut aningaasaliissussarsiorlunilu ingerlatseqataanikkut, Doris J. Jensen allappoq.

Taassuma akitsuinissamik siunnersuuteqartoqassappat Siumut akerliussasoq, Naalakkersuisumut maajip 30-ni oqaatigereersimagaluarlugu nalunaarutigaa.

- Nutaanik akitsuusersuinissamut Aningaasaqarnermut Naalakkersuisup siunnersuutaa maanna tusarniaassutigineqarpoq. Siumup naatsorsuutigaa, siunnersuut tunuartinneqassasoq, Doris J. Jensen allappoq.

Misissuinermi paasisat

Naalakkersuisut Danmarkimi silap pissusia pillugu siunnersuisoqatigiinnit misissuineq siunnersuumminni innersuussutigaat.

Biilit innaallagiamik orsussamillu akuleriisillugit ingerlasut biilimit dieselitortumit mingutsitsinnginnerulissaguni 250.000 kilometerinik ingerlaqqaassasoq misissuinerup takutippaa.

AAMMA ATUARUK Siumut: Biilit 2030-mi tamarmik innaallagiatortuussapput

Pinngortitaleriffiup missiliuineratut nunatsinni biili agguaqatigiissillugu ukiumut 5450 kilometerinik ingerlasarpat taava motorimut akileraarutip appasitsinnissaanut tunngavissaqarunnaartoq, Naalakkersuisut isumaqarput.

- Biilit uku mingutsitsisuunnginnerat pissutigalugu uku (innaallagiamik orsussamillu akuleriisillugit ingerlasik piginnittut aaqq.) aamma akiliisalernissaat pissusissamisoortoq nassuerutigisariaqarparput, aningaasallu tassanga pissarsiarisagut allamut atorsinnaassavagut.

Inatsisissatut siunnersuut juulip ulluisa arfineq-pingajuannut tusarniutaavoq. Taanna Naalakkersuisut nittartagaani atuarneqarsinnaavoq.