Siumut: Biilit 2030-mi tamarmik innaallagiatortuussapput
Biilit benzinaannarmik dieseliinnarmilluunniit ingerlasut silaannarmut mingutitsinerat sualuppallaalerpoq. Biilinik tuniniaasartut suleqatigalugit tamanna allanngortinneqassaaq, Siumup politikkikkut oqaaseqartartua taama isumaqarpoq.
Biilit innaallagiaannarmik taavalu inaaallagiamik ikummatissanillu akuleriisillugit ingerlasut kisiisa atorneqalernissaat taamaaliornikkut anguneqarsinnaasorineqarpoq.
- Taamatut ilusilimmik alloriarfeqarusuppugut, tamatta soqutigisarigatsigu avatangiisinut mingutsitsinnginnerusumik ulluinnarni inuuneqarneput aamma iliuutitsigut takussuteqartissallugu, Vivian Motzfeldt oqarpoq.
Kalaallit Nunaanni Politiit kisitsisaataat malillugit, nuna tamakkerlugu biilit, benzinamik dieselimillu ingerlatillit, siorna 4921-pput. Taakkua saniatigut innaallagiaannarmik taavalu inaaallagiamik ikummatissanillu akuleriisillugit ingerlasut katillutik 977-pput.
AAMMA ATUARUK Naleqqap Naalakkersuisullu akitsuutit isumaqatigiinngissutigaat
Innaallagiamik taavalu inaaallagiamik ikummatissanillu akuleriisillugit ingerlasut motorilinnut akitsuummik minnerpaamik, ukiumut 6554 koruuninik nunap karsianut akiliisarput. Biilit taamaattut amerlatsissappata akitsuuteqarunnaarnissaat aqutsissaasoq Siumut isumaqarpoq.
- Ullumikkut akitsuusersorneqarneri taakkua annikitsunnguamik inissisimapput, immaqa alloriarfimmut tullingitinneqarsinnaavoq akitsuuteqanngitsumik taamaattut biilit iluaqusersorneqarsinnaaneri, Vivian Motzfeldt oqarpoq.
Biilit benzinamik dieselimillu ingerlasut suli atorneqarmata, atorneqarunnaariartornissaat sulissutigalugu siunnerfiup, tassa 2030-p tungaanut atuuttumik maannamiit periusissialiornissaq taassuma kissaatigaa.
