Partii Naleqqap biilit hybridiusut eqqussorneqarnerat akileraaruserumavai. Illuatungaanilu biilit innaallagiatortut eqqussorneqarnerat akeqartikkusunnagu, taavalu biilit assigiinngitsunik motorillik tamarmik oqimaassusaat malillugu akitsuusertikkusullugit. Naalakkersuisulli tamanna qularnartoqartippaat.

Hybridbiilit: Naleqqap Naalakkersuisullu akitsuutit isumaqatigiinngissutigaat

Partii Naleqqap biilinut hybridiusunut eqqussuinermut akileraaruserusuppoq. Illuatungaanilu biilit innaallagiatortut eqqussorneqarnerat akeqartikkusunnagu, taavalu biilit assigiinngitsunik motorillit tamarmik oqimaassusaat malillugu akitsuusertikkusullugit. Naalakkersuisulli tamanna qularnartoqartippaat.

Biilimmi innaallagiatortut hybridillu nunatsinni aqqusinermi amerligaluttuinnarput. Polikerillu tamatumani atuisartunik tapersersuisariaqartut, Partii Naleraq isumaqarpoq.

Taamaammat partiip – ullumikkutut itsillugu – biilit innaallagiatortut brintitortullu nunatsinnut eqqunnissaaasa siunissami aamma akeqannginnissaat kissaatigaa.

- Biilit innaallagiartortut eqqussorneqarnerannut akitsuuteqaleruni innaallagiatortut biilinut nalinginnaasunut allanut unammillerniarnerat ajornarnerulissaaq, taamaalilluni Naalakkersuisut Kalaallit Nunaata CO2-mik aniatitsineranik annikilleerusunneranut akerliulissalluni aamma ikummatissanik atuinngitsut siaruarterniarnerannut ajornarnerulersitsissaaq, ukiaanerani ataatsimiinnermut inatsisissatut siunnersuummi allassimavoq.

Naleraq: Hybridinik eqqussisinnaaneq naammaleqaaq 

Biilit innaallagiatortut, brintitortut hybridiusullu eqqunnerannut aqqusinermilu atornerannut biilit ikummitissatortunik motoorilittulli akitsuuserneqartanngillat. Akitsuuserneqartannginnerat ukiup naanerata tungaanut atuuppoq, Naalakkersuisulli oqaatigaat namminneq aalajangiisuussagaluarunik tamanna ukiumik ataatsimik sivitsussagaluaritsik, tassa 2020-p naanerata tungaanut atuutsissagaluaritsik. Tamanna Naalakkersuisut 2020-mut aningaasanut inatsisissatut siunnersuutaanni allassimavoq.

Partiilli Naleqqap biilit hybridiusut eqqunneqarnerannut 2020-mi januaarip aallaqqaataani atuutilersumik akitsuuserneqartalernissaat toqqarusunnerussanerarpaa.

AAMMA ATUARUK Naalakkersuisup akitsuusiisannginneq atorunnaarsinniaraa

Partiip biilit hybridiusut biilitut innaallagiatortutut brintitortullu avatangiisinut mingutsitsinikitsiginngitsut tunngavilersuutigaa. Biilillu hybridiusut eqqunnerannut akitsuuteqannginnerat pissutigalugu amerlasuunit pisiarineqartarnerarlugit, biililli mingutsitsinnginnerugaluarlutik benzinamik dieselimillu suli ikummateqartarput.

Biilit hybridiusut nunatsinnut eqqunneqarsimasut 2014-imi arfineq pingasunit 2017-imut 138-nut amerlisimasut, Partii Naleraq siunnersuutinni allappoq.

Partii Naleqqap siunnersuutaa

- Biilit Kalaallit Nunaannut eqqunnerani akitsuut 50.000 koruuniuvoq. Tamatuma saniatigut biilit 50.000 koruunit sinnerlugit naleqartoq 100 procentimik akitsuuserneqartarput.

- Biilit mikinerusut 75.000 koruunit tikillugit akeqartut 50.000 koruuniinnarmik akitsuuserneqartarnissaat Partii Naleqqap siunnersuutigaa.

- Partii Naleqqap siunnersuutaa naapertorlugu biilimik 75.000 koruunilimmik pisigaanni akitsuummi 25.000 koruunit sipaarutigineqarsinnaassaaq.

- Biilisiariniaq 80.000 koruuneqaruni akitsuut 125 procentiussaaq. Taamaalilluni akia 180.000 koruuniulerluni.

- Malittarisassat maannakkut atuuttut naapertorlugit biili 80.000 koruunimik naleqartoq 160.000 koruuneqassaaq.

- Motoorip ikummatissaanik atuinerinnarmi plug-in-hybridip avatangiisinut mingutsinnginnerunissaa qulakkeerneqarsinnaanngilaq, Partii Naleqqap siunnersuutaani erseqqissaatigineqarpoq.

Partiip biilit innaallagiatortut, brintitortut hybridillu oqimaassusaat malillugu akitsuuserusuppai. Biilinut innaallagiatortunut oqimaassutsimut akitsuut biilit nalinginnaasut akitsuutaasa affaannaatut inissinneqassaaq, hybridillu akitsuutaat 2020-mi 50 procentimit 2025-mi 100 procentimut qaffatsinneqassalluni – biilit nalinginnaasut assigilerlugit.

Kiisalu biilinut 75.000 koruunit tikillugit naleqartut akitsuutaat apparneqassalluni, taamaalilluni pisiarineranit 50.000 koruunitut naleqartutut naatsorsorneqartassallutik. Illuatungaanilu biilit  75.000 koruunit sinnerlugit akeqartut akiata 125 procentianik akitsuuserneqassasut partiip oqaatigaa. Partii Naleqqallu oqarnera naapertorlugu tamanna mikrobiilinik pisisarnermut siuarsaataassaaq.

AAMMA ATUARUK Biilinut akitsuutit nutaat tunuartinneqaqqittut

Kingullertut, minnerunngitsumillu qamuteralaat nunakkoorutillu minnerusut akitsuutaannik atorunnaarsitsinissaq, partiip kissaatigaa. Partii Naleqqap Inuit Ataqatigiillu ATV-nut ukiumut akitsuutip appartinneqarnissaa siunnersuutigaat.

Naalakkersuisut: Inuussutissarsiortut kommunillu tusarneqaqqaassapput

Biilinut akitsuutinik Inatsisartut ataatsimiittarfimmi ukiut pingajussaa maanna suliaqarput. Naalakkersuisullu amerlanerussuteqarsinnaanngimmata siunnersuut 2017-imi 2018-imilu kinguartinneqarpoq.

Naak Partii Naleqqap siunnersuutaa, Naalakkersuisut Pele Brobergip aningaasaqarnermut naalakkersuisuunerata nalaani 2018-imi siunnersuutigisaannut assingugaluartoq maannakkut Naalakkersuisuusut siunnersuummik tapersiinngillat.

Inuussutissarsiornermik ingerlataqartut kommunillu suliami tusarniaaffigineqaqqaarnissaat Naalakkersuisut maanna kissaatigaat.

AAMMA ATUARUK Biilinut akitsuusersuinissaq akornusiissaaq

Tamatuma saniatigut biilinut mikinerusunut akitsuutikinnerutitsineq illoqarfissuarni aputikinnerusuni sermikinnerusunilu najugallit annermik taamaallaat iluaqutigisinnaassagaat Naalakkersuisut erseqqissaatigaat. Taamatullu biilit innaallagiatortut brintitortullu amerlanertigut allanit oqimaannerusarmata innaallagiatortunut akitsuutit biilit allat nalinginnaasut oqimaassusaatut naatsorsorneqartannginnissaat Naalakkersuisut erseqqissaatigaat.

Kiisalu Naleqqap siunnersuutaani biilinik pisoqalisunik kommunit eqqaavissuinut igitsiartortarnissamut tunngasumik immikkoortortaqanngilaq. Taamaammat siunnersuutip suliarineqarnissaata aappaagu ataatsimiinnissamut kinguartinneqarnissaa Naalakkersuisut kissaatigaat.

Biilit innaallagiatortut, brintitortut hybridiusullu eqqunneqarnerannut aqqusinermilu atornerannut akitsuuserneqartannginnerat ukiumik ataatsimik sivitsorneqarnissaa tassa 2021-mi januaarip aallaqqaataata tungaanut atuutsinneqarnissaa Naalakkersuisunit 2020-mut aningaasanut inatsisissatut siunnersuummi siunnersuutigineqartoq nutaarsiassami matumani erseqqissaatigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat