Aalisartut isumaqatigiissummut nutaamut: Aalisakkat milleqqissanngillat
Royal Greenlandip KNAPK-llu saarulliit tulaassat akii minnerpaaffissaallu sapaatit akunnera kingulleq atsioqatigiissutigaat.
Royal Greenlandimit siunnersuutaaqqaaraluarpoq saarulliup minnerpaaffissaa 50 centimeteriussasoq tamannali piviusunngunngilaq.
KNAPK-p Kangaamiuni immikkoortotaqarfia pisunut paasinnillunilu naammagisimaarinnippoq.
- Oqarpugummi taamatut aaqqiissappata aalisartunut ajunaarnersuaqassasoq, taamaattumik 45 centimeterimut siunnersuutiginikuuarput, Kangaamiuni immikkoortortaqarfimmi siulittaasoq, Jens Meeraq Lyberth KNR-imut oqarpoq nangillunilu:
- Taakkulu anguneqarmata allatut ajornartumeerluta ilaasortagut oqarput: Qujarnarmi ajornerusumik pisoqanngimmat, taanna oqarpoq.
Royal Greenlandip tunisassiorfiinut aalisartut saarullik 40 centimeteritut angissusilik tunisinnaanikuuaat, maannali tamanna allanngortinneqarpoq.
Taakkua aallaqqaammut angissuseq minnerpaaffissaq 50 centimeterinngortikkusukkaluarpaat, aalisartulli isumamut tassunga aalassassimaarput.
AAMMA ATUARUK Aalisartunut ikiorsiissutit misissorneqartut
Angissutsip minnerpaaffia 50 centimeterinngortinneqarsimasuuppat pisat 90 procentii avalatseqqinneqartarsinnaasut, Jens Meeraq Lyberth nassuiaavoq.
Angissutsimut minnerpaaffik kisimi allanngunngilaq, akilli aamma apparput.
KNAPK naapertorlugu aalisakkanut mikisunut tunitsivissaaleqineq peqqutaalluni allannguisoqartariaqalerpoq.
- Ajornerusumik pisoqannginnissaa siunertaringatsigu, paasinnilluta akuersaarparput, Jens Meeraq Lyberth oqarpoq.
Immikkoortortaqarfiup allannguutit akueralugit, niuernerli aalajaannerulerpat uterteqqinneqarnissaat neriuutigalugu oqaatigaa.
Isumaqatigiissut nutaaq malillugu saarullik niaquerlugu tunisaq kiilumut 9 koruuneqartoq 8 koruuneqalissaaq.
