Aalisartunut ikiorsiissutit misissorneqartut

Timmisartuutileqatigiiffiit takornarialerisullu kisimik coronamit ajornartorsiortinneqanngillat.

Nunatsinni inuussutissarsiutit pingaarnerpaartaat eqqorneqarportaaq. Aalisartummi tunisinerminni pissarsiakinnerulerput.

Taakkua aningaasatigut ikiorneqartariaqartut KNAPK isumaqarpoq.

Aalisartullu qanoq ikiorneqarsinnaanerat misissorniarlugu suleqatigiissitamik Naalakkersuisut, KNAPK Sulisitsisullu pilersitsipput.

Akit appangaatsiartut

Tunisinermi aalisakkat akii appangaatsiartut sumiiffiillu ilaanni akip minnerpaaffissaa sinnerlugu appaasoqartoq KNAPK-p siulittaasuata KNR-imut oqaluttuaraa.

Assersuutigalugu Nuummi Polar Seafoodip tunisassiorfiani saarullik januarimi kilomut 12,25 koruuninik akeqartoq, ullumikkut koruuninik arfineq marluinnarnik akeqarpoq.

Tamannalu aalisartunut annaasaqaataangaatsiarpoq.

- Taamaammat saneqqunneqarsinnaanngilaq, arlaatigut imminut akilersinnaasunngortinnerussallugu tapiissuteqarsinnaaneq qanorikkaluarnersumik, tamannalu inuiaqatigiittut tamatta pisussaaffigaarput, Henrik Sandgreen KNR-imut oqarpoq.

AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput

Taassuma ikiorsiissutissat piviusunngussappata aalisartunut tulluussarneqartariaqarsorai.

Aallartisartoq

Suleqatigiissitarli aatsaat aallartilaarpoq. Taakkua coronap nalaani akit qanoq nikerartigisimanersut misissoqqaassagaat KNAPK-p siulittaasuata oqaatigaa.

Paasissutissat paasereerunikkit qanoq suleriaqqinnissartik aalajangissavaat.

- Maannakkut suleqatigiissitami misissorneqarpoq qanoq annertutigisumik aamma suut tungaatigut qanorlu ilusilimmik ikiorsiisoqarsinnaaneranut periarfissat, aammalu kisitseqqissaarnerit maannakkut ingerlanneqarlutik, Henrik Sandgreen oqarpoq.

KNAPK-p aprilimi aalisartut aningaasatigut ikiorneqartariaqarnerarlugit oqariartuutigaa.