KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput
Coronap ajornartorsiortitsinerani aalisakkat akii apparput, aalisartullu tamanna malugisinnaavaat.
Aalisartut piniartullu kattuffiat tusagassiuutinut nalunaarummi taama allappoq.
- Nunatta avammut niuffataanit nioqqutissiat tunisatta katinnerisa 90 procentii sinneqalugit aalisakkanit tunisassiaapput taamalu aalisakkanik niuffaffiit eqqorneqarmata, nunatsinni aalisartut maanna sakkortuumik eqqugaapput, kattuffik allappoq.
AAMMA ATUARUK Coronap ajornartorsiortitsinera aalisakkat akiinut pingaarutilinnut appartitsisinnaasoq
KNAPK oqarnera naapertorlugu aalisartut raajartaminnit, saattuattaminnillu maanna aningaasannannginnerupput, saarulliillu akiisa apparnissaat oqariartuutigineqarpoq.
Raajat akiisa apparnerat coronap ajornartorsiortitsinerata kingunerisaanik nunarsuarmi innuttaasut aalisagaatitsinnut aningaasanik atuinnginnerunerannik pissuteqartoq, kattuffik allappoq.
Raajarniartut pisaat 25 procentimik akikinnerusumik akilerneqartut, KNAPK allappoq.
- Qaammatip kingulliup ingerlanerani tunioraasunut akit siullermik 1,50 koruuninik appartinneqarput qanittumilu aamma ingerlatsiviit ilaannut 1,50 koruunimik aamma appaqqinneqarlutik, KNAPK siulittaasua, Henrik Sangreen allappoq.
AAMMA ATUARUK Aalisartut pissarsiakippallaarput
Aalisartut saattussat aamma akikinnerusut aamma malugaat.
- Kiilumut aki qanittumi 8.00 koruuninik apparneqarpoq. Pisassiissutinit ukiumut pisat siorna 2019-mi 2.967 tonsiupput, Henrik Sandgreen allappoq.
KNAPK-llu oqarnera naapertorlugu saarulliit erlaveerlugit tunisat akiisa apparneqarnissaat aamma oqaatigineqarpoq.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Kattuffiup siulittaasuata Naalakkersuisut suliamut tapiissuteqarnissaat sinerissallu qanittuani aalisartut aningaasatigut ikiorsiissuteqarfigineqarnissaat kaammattuutigaa.
- Inuiaqatigiit tunisinermi akinut tapiuteqarnissaat matumuuna kattuffimmiit saqqummiupparput.
- Tapit annertussusissaat sukumiisumik suliariumallugit Naalakkersuisooqatigiit saaffigaagut piaarnerpaamik suligasuartussamik pilersitseqqullugit Sulinermi tassani peqataanissatsinnut piareersimassaagut, Henrik Sandgreen tusagassiuutinut nalunaarummi allappoq.