KNAPK: Aalisartut pissarsiakippallaarput
Aalisakkat amerlassaasa akii qaffakkiartoraluarlutik nunatsinni aalisartut akissarsiaat Canadami, Islandimi, Savalimmiuni Norgemilu aalisartunit ikinnerusut aalisakkat qalerualillu akii pillugit misissuinerup saqqummiunneqarnerani erseqqissaatigineqarpoq.
Taamaammat nunatsinni inuiaqatigiit aalisarnermit qanoq pissarsisinnaanerpaajunersut pillugu paasiniaaqatigiittoqartariaqartoq KNAPK-p siulittaasua, Henrik Sandgreen, isumaqarpoq.
- Assartuinermik suliaqartut peqataasariaqarput aamma tunisassiorfiit avammut niuernermik suliaqartut aamma aalisartut, taakkua ilisimasatik ataatsimut kattullugit, aalisarneq inuiaqatgiinni pissarsissutaanissaa siunertaralugu sulineq aallartittariaqartoq. Henrik Sandgreen taama oqarpoq.
Aamma nunatsinni aalisartut aalisagaasa akii nunani tamani akinit appasinnerusut, KNAPK-p siulittaasuata oqaatigaa. Misissuinerlu naapertorlugu nunani tamani akit nunatsinni tulaassinermit qaffannerujussuusimapput.
Nunanilu tamani akit qaffannerata nunatsinni aalisartunut pissarsiaqaataannginnera, aalisartup eqqarsarnartoqartippaa:
- Aalisakkat tunineqaqartut Danmarkimut ingerlaqqinnerminni akit appasinneroriarlutik Danmarkimiit avammut tunineqarnerminni akit qaffaqqittarnerat, avammullu tunineqarneranni poortoqqinneqaannartarnerat eqqarsarnartoqarpoq, aalisartoq Johan Jeremiassen taama oqarpoq.
