Ikiorsiinissamut oqallinneq: IA qinersisartunut oqariartuuteqarniartoq, naliliisartoq isumaqarpoq

Kujataani sikorsuaqarnerujussua pissutigalugu umiarsuit takornariartaatit tulattartut aasaq ikilimmata takornarianik sullissisut aningaasanik annaasaqarput, ikiorsiissutinillu pisariaqartinneqaqisunik tapiisoqarnissaanik naalakkersuisut neriorsuipput.

Taamali pisoqanngilaq – ikiorsiinissamummi qinnuteqaat Aningaasaqarnermut Akileraartarnermullu Ataatimiititaliami amerlanerussuteqartunit itigartitsissutigineqartoq, sapaatip-akunnerata siuliani nalunaarutigineqarpoq.

Itigartitsineq inuussutissarsiornermut naalakkersuisup (IA) isornartorsiorpaa ataatsimiititaliamilu siulittaasoq Peter Olsen (IA) pisoq pillugu oqaaseqarpoq.

- Sooq itigartitsinermik inerneqarnersoq oqaaseqarsinnaanngilanga, Inuit Ataqatigiimmi avaqqullugit amerlanerussuteqartut taama aalajangiipput, Peter Olsen oqarpoq.

Taama oqaaseqarneq qaqutigooqisoq, KNR-ip politikkikkut naliliisartua, Ineqi Kielsen, oqarpoq. Ataatsimiititaliamimi siulittaasoq isumaqatigiissitsiniartussatut inissisimasarpoq.

- Uanili takuarput ataatsimiititaliap siulittaasuata nammineq parteerisami aalajangernermut akerliusimaneranik ersersitsinera, Ineqi Kielsen oqarpoq.

Taassuma saniatigut Aningaasaqarnermut Akileraartarnermullu Ataatsimiititaliap itigartitsineranut tunngatillugu naalakkersuisup oqaaseqarnera aamma qaqutigoorpoq.

- Soorunami naalakkersuisoq itigartinneqartoq qisuariarmat paasinartorujussuuvoq, suliamimi taama ingerlatsereersimatilluni itigartitaaneq nuannernerpaanavianngilaq, Ineqi Kielsen oqarpoq.  

Nuannersunillu aatsaat pisoqartillugu aamma ikiorsiissutissat pillugit naalakkersuisoqatigiinni partiit isumaqatigiikkaangata taama nalunaaruteqartoqartaraluartoq, taassuma erseqqissaatigaa.

Politikkernermili siornatigornit iliuusaasartunit allaanerusumik uani pisoqarpoq.

Siumukkunuku, uaguunngitsoq

Aningaasaqarnermut Akileraartarnermullu Ataatsimiititaliami amerlanerussuteqanngitsoorneq pissutaasoq, Peter Olsen aamma inuussutissarsiornermut naalakkersuisoq Naaja Nathanielsen, itigartitsinerup kingorna oqarput.

- IA-miit uagut qinnuteqaat akuererusukkaluarparput, aalisartunut, piniartunut takornarialeriusunullu kingunerusussat ernummatigigatsigit, Peter Olsen sapaatip-akunnerata siuliani ilisimatitsivoq.

Taassuma parteeqataa Naaja Nathanielsen ikiorsiisoqaliivinneranik aasaq neriorsuereeraluarluni uani sapaatip-akunnerani ima oqarpoq:  

- Naalakkersuisoqatigiinnut amerlanerussuteqartunut ilaavunga. Taamaattumik siunnersuutima naalakkersuisunit suliarineqareerluni akuerineqareersup naalakkersuisoqatigiillu kissaatigisaattut ataatsimiititaliamut ingerlateqqinneqarpat, taava siunnersuutima aamma amerlanerussuteqartunit akuerineqarnissaa naatsorsuutigaara.

Naalakkersuisulli ikiorsiinissamut qinnuteqaataa tukappallaarnerarlugu piviusorsiunnginnerarlugulu, ataatsimiititaliami ilaasortat itigisartitsisut ilaannit isornartorsiorneqarpoq.

Naaja Nathanielsenilli taama isornartorsiorneqarnini ilumuunnginnerarpaa.

Ataatsimiititaliani ataatsimiinnerit matoqqasuupput, ataatsimiititaliamilu oqaluuserisat allanut oqaatigeqqusaanatik, taamaammat Kujataani takornarialerisunut ikiorsiinissap itigartitsissutigineqarnissaata tungaanut susoqavissimanera paasiuminaassinnaavoq.

Pisulli ataatsimut isigalugit qinersisoqarnissaata qanillinera malunnarsisoq, Ineqi Kielsen siusinnerusukkut naliliinermini oqaaseqarpoq.

Qinersinissammi qalliartornera ilutigalugu Inuit Ataqatigiit Siumullu naalakkersuisoqatigiinnerminni aaqqiagiikkunnaariartuaalissasut, maajip naanerani taamani upernaakkut ataatsimiinnerup naammassinerani, taanna oqarpoq.

- Piffissaq massakkut apeqqutaaginnaleqqavoq qaqugu assigiinngequtitik takutissorpallaalerlugit suleqatigiinnerup pitsaajartorunnaarnissaanut, Ineqi Kielsen taamani oqarpoq.

Taammattumik IA-mi ilaasortat marluk tusagassiorfinnut oqaaseqarnerat Inuit Ataqatigiit Siumumit allaaneruneranik erseqqissaaniarnertut paasineqarsinnaasoq, taanna oqarpoq.

- Uani takuarput aningaasaqarnermut ataatsimiititaliap siulittaasuata Kommune Kujallermi innuttaasunut oqariartuutiginiarsarigaa una itigartitsineq Inuit Ataqatigiit aalajangiinerinngikkaat, kisiannili allanit aalajangerneqarsimasoq, Ineqi Kielsen oqarpoq nangillunilu:   

- Taamatuffaarik aamma naalakkersuisup (Naaja Nathanielsen, aaqq.) qinnuteqartup oqariartornera tusaavarput, tassa tapiissuteqarnissaq Inuit Ataqatigiit kissaatigigaluaraat, kisianni allat aalangiinerisa kingunerisaanik tamanna pisinnaanngitsoq oqaatigalugu.