Naaja Nathanielsen namminersortut ikiorserneqannginnerannut: Naalakkersuisoqatigiit ataatsimoorsorigaluarpakka
Kujataani takornarianik sullissisut namminersortut aningaasanik ikiorserneqalinngitsut, inuussutissarsiornermut naalakkersuisoq, Naaja Nathanielsen, pakatsisimasoq sapaatit-akunnerata siuliani oqarpoq.
Taassuma aningaasanut akileraartarnermullu ataatsimiititaliami amerlanerussuteqannginneq itigartitsinermut pissutaatippaa.
Naalakkersuisulli qinnuteqaataa piviusorsiunngippallaartoq tukappallaartorlu ataatsimiititaliami ilaasortat, Pele Broberg aamma Kuno Fencker oqarput.
Naaja Nathanielsenilli taama isornartorsiorneqarnini isumaqataaffiginngilaa:
- Pele Broberg ataatsimiititaliami siulittaasup tulliatut imaluunniit Inatsisartuni ilaasortatut oqaaseqarnersoq paasinngilara. Qinnuteqaat tukassorinngilara.
- Suliareqqissaagaavoq, apeqqutigisaallu akivagut, kingornalu tusarfigeqqinngilagut. Taanna isornartorsiuineq piviusorsiunngilaq, taanna oqarpoq.
Itigartitsineq tupaallannartoq
Takornarianik sullissisut qassit qanorlu pisariaqartitsinerannik naalakkersuisut qinnuteqaaminni erseqqissumik tunngavilersuisimannginnerat, ataatsimiititaliami ilaasortat marluk KNR-ip oqaloqatigisaasa isornartorsiorpaat.
Ilaasortat oqaatigisaat Naaja Nathanielsenip ilaatigut ilumoornerarpaa, qinnuteqaatigineqartulli sooq taakkua kissaatigisaattulli sukumiisimatiginnginnera ima nassuiarpaa:
- Qassit eqqorneqarnissaat missiliorparput. Eqqoqqissaartunilli kisitsisaateqanngilagut, taamaassagaluarpammi takornarialerisut ataasiakkaat aningaasaqarnerminnut naatsorsuutaat misissussagaluarpagut, taanna oqarpoq nangillunilu:
- Taanna politikkikkut suliassaanngilaq. Tapiissutisinissamulli piumasaqaatinik aalajangersaaneq, ataatsimiititaliap tapersissallugu qinersinnaasaa, politikkikkut suliassaavoq. Ataatsilmiititaliarli tapersiinngilaq, taanna oqarpoq.
Naalakkersuisoqatigiinni isumaqatigiinngitsoqartoq
Naaja Nathanielsen aningaasaqarnermut akileraartarnermullu ataatsimiititaliameersunik annerusumik oqaloqateqarsimannginnerarpoq.
Taassuma siunnersuutimi ataatsimiititaliamit akerlilerneqarnissaa naatsorsuutigereerpaa. Itigartitsissutigineqarnerali tupaallaatigaa:
- Kisianni Naalakkersuisoqatigiissut tapersiissallutik oqarunik, aamma taamaaliussasut naatsorsuutigilluinnartariaqarpara.
Siunnersuummik itigartitsinermi naalakkersuisoqatigiit ileqquliutiinnakkamik isumaqatigiittarnermissut pinnginnerat, Pele Brobergip tupaallaatigisimanerarpaattaaq.
Ataatsimiititaliap itigartitsinera Naaja Nathanielsenip aamma tupaallaatigigaa malunnarpoq:
- Naalakkersuisoqatigiinnut amerlanerussuteqartunut ilaavunga. Taamaattumik siunnersuutima naalakkersuisunit suliarineqareerluni akuerineqareersup naalakkersuisoqatigiillu kissaatigisaattut ataatsimiititaliamut ingerlateqqinneqarpat, taava siunnersuutima aamma amerlanerussuteqartunit akuerineqarnissaa naatsorsuutigaara, taanna oqarpoq.
Inuiaqatigiinnut tamanut pakatsinartoq
Namminersortut sikorsuaqarnerujussuanit eqqugaasut eqqartorneqarpallaaratik politikkimi sulineq uani pisumi sammineqarnerulerpoq. Tamannalu Naaja Nathanielsenip uggoraa:
- Tamatumunngalu pakatsivunga. Naalakkersuisut ikiuunniarlutik oqarunik, taava aamma taamaaliussasut Kujataani inuussutissarsiortut naatsorsuutigissallugu pissutissaqartut isumaqarpunga. Tamatumuuna kukkuvugut. Naalakkersuisoqatigiiusugut ataatsimoorluta kukkuneraarput. Uanga inuttut kisimaanngitsoq.
Ataatsimiititaliap aalajangernera inuussutissarsiornermut naalakkersuisup tusaatissatut tiguaa, suliarlu iliuuseqarfigeqqikkallarniarnagu.
Itigartitsinerli takornariaqarnermik inuussutissarsiornermut ajornartorsiortitsilersinnaasoq, inuiaqatigiinnullu tamanut sunniuteqangaatsialersinnaasoq, taassuma oqaatigaa.
Ataatsimiititaliallu aalajangernera pakatsissutigeqaa:
- Taama ikiorsiineq naleqquttoq isumaqarpunga. Taamaammat ugguaqaanga. Kingunerinissaalu taamaakkumaarput. Tunniutiinnarnianngilangali, pisorlu ataatsimiitsitaliamut siunissami atassuteqarnerninnut sunniuteqartikkusunnagu.