Politikkikkut naliliisartoq: Naalakkersuisoqatigiit atalluarput, qineqqusaarnissarli qallivoq

Inatsisartut ataatsimiittarfianni ataatsimiinnermi matumani kingullermik marlunngormat aalajangiisoqarpoq. Aalisarnermut inatsit akuerineqarpoq, naligiissitaaneq assigiinngisitsinnginnissarlugit pillugit nutaamik inatsiseqalerpoq, namminiilivinnissaq politikerit aasaanerani suliffeqangajalersut akornanni oqallisigineqarpoq.

Upernaakkut ataatsimiinnermi nipituumik oqallinnerpassuaqarlunilu illuatungiuliuttunit tatiginninnginnermik arlaleriarluni nalunaaruteqartoqarpoq.

Taamaammat KNR-ip politikikkut naliliisartorput, Ineqi Kielsen ataatsimiinnerup qanoq ingerlasimanera naalakkersuisoqatigiillu maanna sumi inissisimanersut naliliisinniarlugu attavigaa.

Sakkortuumillu ilaatigut oqallittoqartarnera aamma oqaatigaa.

- Inatsisartut upernaakkut ataatsimiinnerat ataatsimut qiviaraanni ullut sakkortusinnaasartut ingerlanneqarnikuupput, pingaartumik aalisarnermut inatsisissatut siunnersuutip naammassineqarluni suliarineqarnissaata tungaanut ullut sukataarfigineqartut, aammalu immaqa aporaaffigineqarsinnaasut naalakkerusisoqatigiit illuatungiliuttullu akornanni pisut taakkua ingerlasimapput, Ineqi Kielsen oqarpoq.

Naalakkersuisoqatigiilli ingerlalluarput tatiginnikkunnaarnermillu nalunaaruteqarnerit tamarmik pinngitsoortillugit. Ineqi Kielsenip oqarnera naapertorlugu ataqatigiilluarput.

- Naalakkersuisoqatigiit massakkut inissisimaffiat patajaatsorujussuartut inissisimavoq. Tassa taama nalilersinnaavara maannamut inatsisissaq oqimaatsorujussuaq ataatsimoorullugu naammassisimalerpaat aammalu atuuttussanngortinneqalereersimalluni. Taamaattumik naalakkersuisoqatigiit ataatsimoorluartutut uani nalilersinnaavakka.

Unammillertiginerpaasaq peqatigisarlu qaninnerpaaq

Inatsisartunut aappaagu apriilimi kingusinnerpaamik qinersisoqassaaq, tassani kommuninut aamma qinersisoqassaaq.

Qinersisoqarnissaalu upernaap ingerlanerani aamma eqqaaneqallattaalaarpoq. Siumup immikkoortortaqarfiisa arlallit aalisarnermut inatsit akuerineqassappat qinersisoqarnissaa februaarimi piumasaqaatiginikuuaat.

Ineqi Kielsenilli oqarnera naapertorlugu maannakkut eqqissisimasoqarpoq, ataatsimiinnerimmi marluk akornanni qinersinissaq suaarutigineqassappat Inatsisartut immikkut ittumik aggersarneqassapput.

Ukiakkulli ataatsimiittoqarnerata nalaani qinersisoqarsinnaanersoq eqqoriarusunngilaa.

- Qanoq inissisimanersugut nalileruminaatsilaarpara. Aningaasanut inatsit naammasseqqaarniarneraat, imaluunniit qinersinerup kingorna aningaasanut inatsit aatsaat suliariniarneraat, Ineqi Kielsen oqarpoq.

Ataaserli qularnanngilaq, qinersisoqangajalerpat qinersisoqangajalinngikkaluarpalluunniit naalakkersuisoqatigiit suleqatigiinnerat isamikkiartuartuaassaaq.

- Kisianni aamma piffissaq takkukkumaarpoq tassa Mútep unammillertaasa qaninnersaraat Mútep qaninnerpaatut suleqatigisaa (Erik Jensen aaqq.).

Naalakkersuisoqatigiinni aaqqiagiinnginneq

2021-mi qineqqusaartoqarmat IA Siumullu akerleriinnerpaapput, pingaartumik uranimik piianissamut atatillugu.

IA qinersinermi ajugaavoq, Nalerarlu naalakkersuisoqatigilerlugu. Suleqatigiinneralli ukioq ataasinnguinnartoq isavoq, qineqqusaartoqarneranilu qinigaanerpaat marluk – tassa IA Siumullu – naalakkersuisoqatigiilerput. Taakku Inatsisartuni qinigaaffinni 31-ni ataatsimut 21-nik qinigaatitaqarput.

Partiit marluk ukiuni kingullerli marlunni ataatsimut politikkeqarniarsaripput, taamaakkunnaassappulli.

- Taamaattumillu aamma piffissaq takkukkumaarpoq qineqqusaarnissamut alloriarnissaq tigussallugu.

- Naalakkersuisoqatigiit partiivi Siumut Inuit Ataqatigiillu ukioq ataasiujunnaratup iluani qinersinissatsinnut piffissarisaa assigiinngequtinik takutinnissaanut piffissaq sivikilligaluttuinnarpoq. Piffissaq massakkut apeqqutaaginnaleqqavoq qaqugu assigiinngequtitik takutissorpallaalerlugit suleqatigiinnerup pitsaajartorunnaarnissaanut.

Ukiamut qinersisoqassanersoq ukiakkut ataatsimiinnerup septembarip ulluisa 20-ani tallimanngornermi aallartinnerani akissutersineqarsinnaassagunarpoq. Ineqi Kielsenilli qineqqusaarnissamut piareersartoqalernissaa qularnanngilaq.