Upernaakkut ataatsimiinnermi ulloq kingulleq pisoqarfiungaatsiartoq: Tatiginnikkunnaarnerup aappassaa

Inatsisartut upernaakkut ataatsimiinneranni ullumi ulloq kingulleq – Nalerarlu akunnerit marluinnaat ingerlaneranni naalakkersuisunut aappassaanik tatiginnikkunnaarnissamik taasititsiniarpoq.

Naalakkersuisummi maannakkut – nalunaaqutaq ataasinngunngitsiartoq – paasissutissanik eqqunngitsunik saqqummiussisut partii isumaqarpoq.

Tatiginnikkunnaarnissaq siulleq assigiinngisitsinissamut inatsisip nutaap oqaluuserineqarneranut atatillugu siunnersuutigineqarpoq. Tatiginnikkunnaarneq naligiissitaanermut naalakkersuisumut, Naaja H. Nathanielsenimut sammivoq. Inuit innarluutillit illersorneqarnerminnik ilorrisimaarinnersut tassani pineqarpoq.

Tatiginnikkunnaarnissaq pinngitsoortinneqarpoq.

Akunnerit marluk qaangiuttut tatiginnikkunnaarniaqqittut

Akunnerit marluk qaangiuttut tatiginnikkunnaarnissamik siunnersuuteqartoqaqqippoq. Tassanilu Naleraq siunnersuuteqartuuvoq. Tamatumuunalu inatsimmut eqqussuinermut akitsuutinik atorunnaarsitsisussamut tunngalluni.

Múte B. Egede akileraartarnermut ilanngaatit pillugit eqqunngitsumik oqaaseqartarfimmit oqaaseqarsimasoq Naleraq isumaqarpoq.

- Pissaanermik atornerluineruvoq, Naleqqap siulittaasua, Pele Broberg oqarpoq.

- Ajuusaarpunga, oqaatsikka uterteqqippakka. Imaassinnaavoq paasinerlunneqarsinnaasumik oqarsimasunga, Múte B. Egede kingorna oqarpoq.

- Utoqqatserusunngitsunga oqartoqassanngilaq. Paasiuminaatsumik paasissutissiissimaguma ajuusaarpunga.

Tatiginnikkunnaarniarniarneq pinngitsoortinneqartoq

Inuit Ataqatigiinniit Pipaluk Lynge Rasmussen - tupaallannanngitsumik - pinngitsoortitsinissamut siunnersuuteqarpoq. Tassa imaappoq IA-p tatiginnikkunnaarnissaq amerlanerussuteqartunit pinngitsoortinneqarnissaanut taasineratigut pinngitsoortinniarpaa - taamaalillunilu naalakkersuisunut tatiginnikkunnaarniartoqarunnaassalluni.

Taamalu pisoqarpoq. Tatiginnikkunnaarnissaq pinngitsoortinneqarpoq, upernaakkut ataatsimiinnerup ullua kingulleq ataasinngorpat nanginneqaqqissaaq.