Nielsip inuunera qaratsamigut aanaartooreernerani allanngorujussuartoq

Niels Skifte pisussinnaajunnaarnissi, oqalussinnaajunnaarnissi allassinnaajunnaarnissilu takorloorsimanngisaannarpaa, kisianni tassa ukiut pingasut qaammatillu arfinillit matuma siorna taama nalaassivoq.

Taamanikkut 29-nik ukioqarpoq. Nuummi najugaqarpoq, ilinniartitsisunngornialersaarpoq ulluinnarnilu ulapaartuullunilu ikinngutimaartarpoq.

Inuunerali kingorna allanngoriasaarpoq.

- Inuunera ulluinnarmi allanngoriasaarpoq, Niels Skifte oqarpoq.

- Oqalussinnaajunnaariasaarlunga eqqaamavara. Paasissaanngitsunik oqaluppunga.

Niels Skifte kingorna angerlarpoq eqqarsaannarlunilu sinittariaqarluni. Taamaattorli Nuummi Dronning Ingridip peqqissaavianukarpoq. Tassani nikorfalluni utaqqiniaasaarluni ilisimajunnaarpoq.

- Ilisimmarama timima talerpiatungaa nukillaangavoq, taanna oqarpoq.

Niels Skifte qaratsami saamiatungaatigut aanaartoorujussuarsimasoq, nakorsat ilisimatippaat. Tamanna oqalussinnaajunnaarneranik, allassinnaajunnaarneranik, pisussinnaajunnaarneranik anniarneranillu kinguneqarpoq.

Danmarkimi Rigshospitalimi uninngareernermini ilaquttani ornillugit Nuummiit Maniitsumut nuuppoq. Ikorfartorteqanngitsoorsinnaannginnami taamaaliorpoq. Tassa ulluinnarni isumagisassanut soorlu errorsinermut, nerisassiornermut assigisaannullu ikorfartorteqarnissi pisariaqartippaa.

- Inuunerami allanngorujussuarpoq, Niels Skifte oqarpoq. Taanna sinimmik siornatigorninngarnit pisariaqartitsinerulernikuuvoq.

Aamma inussinissi ornigiunnaarnikuuaa.

- Pisassaqartuaannarnikuuvunga. Sulinngikkuma inussiuinnaavittarnikuuvunga. Inuuneq taanna maqaasivara.

Inunnik innarluutilinnik suliassaqarfik sumiginnagaasoq

Niels Skifte inuusuttuunermi annersaani innarluuteqarnani inuuvoq. Taamaammat inuit innarluutillit qanoq atugaqarnersut qaratsamigut aanaartoortigani annerusumik eqqarsaatigisanngilaa.

- Annerusumik eqqarsaatigisarnikuunngilara. Atugaallu pitsaanngeqisut qaratsakkut aanaartoornerma kingunerisaanik nammineq innarluuteqalereerninni aatsaat takusinnaalerpara, taanna oqarpoq.

Atugaallumi pitsaanngeqaat. Nunatsinni inuit innarluutillit pillugit oqaaseqartartup tamanna ukiorpassuarni suaartaatigaa, tusarumaneqannginnguatsiarlunili.

Nunatsinni inuit innarluutillit tapersersorneqarnissaannut inatsisissatut siunnersuut ukiorpassuarni erinitsaassaasoq akuerineqassappat, inuit innarluutillit atugaannik pitsannguinaviannginnerarlugu nunatsinni inuit innarluutillit pillugit oqaaseqartartup Tiliumeersup, Anja Hynne Nielsenip, isornartorsioqqammerpaa.

Inuit innarluutillit tapersersorneqarnissaannut inatsisissatut siunnersuut Inatsisartut ukiaru ataatsimiikkunik oqaluuserissavaat. Inatsisissatut siunnersuut akuerineqassappat, nunatsinni inuit innarluutillit atugaanniik pitsannguinavianngitsoq, Tiliumeersoq isumaqarpoq. Assi © : Anja Hynne Nielsen

Nunatsinni inunnik innarluutilinnik suliassaqarfik qanoq tunulliunneqartiginersoq, Niels Skiftep qaratsamigut aanaartooreernermini timitarsivaa.

- Allatulli nalinginnaasumik inuuneqarnissara kissaatigiinnarpara. Nunatsinnili inunnik innarluutilinnik suliassaqarfik sumiginnagaangaarmat, puigugaasutut inuttullu isigineqanngitsutut misigisimanartarpoq, taanna oqarpoq.

Assersuutigalugumi Niels Skifte sulisinnaajunnaarnersiuteqaliaarnissamik qinnuteqarnerminiiit akissutissarsinissaminut qaammatini qulingiluani utaqqisimavoq.

- Qaammatit qulingiluat taakkua sivisunaarsinaqaat, taanna oqarpoq.

Innarluutilittut inuuneqaleriasaarneq nalorninartoq

Niels Skifte pisussinnaaleqqillunilu oqalussinnaaleqqinnikuuvoq. Sulili oqqarliortaraluarluni oqalunniarnermigut siumukarluni, taanna oqarpoq.

Oqalunniarnermigulli siumukarnissamut nunatsinni ikorfartorneqarnissamik aamma neqeroorfigineqaavinngilaq.

- Ikorfartorneqarnissara kommunimut sorsuutigiuarpara. Aalborgimulli nuunniarlunga sorsuutigilerneraniit ukiup affaa qaangiummat aalajangerpunga.

Niels Skifte Danmarkimut nooreernermini qaratsamikkut ajoqusersimasunut oqajuertunullu ikiorsiisartunut saaffiginnikkami pillorissaasunut, timimik sungiusaasunut, sianiutit tarnillu pissusianik immikkut ilisimasalinnut oqallorissaasunullu innersuunneqarpoq.

- Qaratsakkut aanaartooreerninni inuunera tamatuma kingorna siumukarpoq, taanna oqarpoq.

Ukiup ataatsip missaani Danmarkimeereerluni ilaquttani najoqqilerusullugit Maniitsumut uterpoq. Maanna siusinaartumik sulisinnaajunnarnersiaqarpoq, tamatumali saniatigut ullormut nalunaaquttap akunnerini sisamani, tassa sapaatit akunnerannut nalunaaquttap akunnerini 20-ni sulisarluni.

Innarluutilittut inuuneqalerumaarlutit qaratsakkut aanaartuunngikkallaravit takorloortarsimaviuk?

- Naamerluinnaq. Qaratsakkummi ajoquseriataarumaarlunga takorloorsimanngisaannarpara, taanna akivoq.

Nunatsinni inunnik innarluutilinnik suliassaqarfimmi equngasoqarnera inuillu innarluutillit atugaat namminerlumi atukkani pitsaanngeqisut, Niels Skifte qaratsamigut aanaartooreernermi kingumut aatsaat eqqarsaatigillualerpaa.

- Tamattami innarluuteqalerataannaagatta soqutiginngitsuusaaginnarneqarsinnaanngilagut, taanna oqarpoq.

Nunatsinni pissutsit taamaatsillugit innarluutilittut inuuneqaleriasaarneq nalorninarpoq.

- Imminut piginnaasaqanullu qujamasunnissaq pingaaruteqarpoq. Inuunermi issariarnerinnaap ingerlanerani allanngoriataarsinnaavoq.