Nunatsinni isumaginnittoqarfinni suliassat amerlassusaat killeqanngitsut

Naak nunatsinni isumaginnittoqarfinni isumaginnittut suliassarpassuaqaraluartut suliassat amerlassusaannik killiliineq aqqutissaanngitsoq, Aqqaluaq B. Egede isumaqarpoq.

Allattoq Kim Hinrichsen

aggustip 20-at 2024 07:45

Nutserisoq Connie Fontain

Kommunini isumaginninnermik suliaqartumut ataatsimut suliassat amerlanerpaaffissalerneqarnissaannut pilersaaruteqartoqanngilaq.

Meeqqanut inuusuttunullu naalakkersuisoq, Aqqaluaq B. Egede (IA) parteeqatiminut Marita Jessenimut akissuteqarluni allappoq.

Akissummi allassimasutut “suliat amerlassusaattut najoqqutassiaqaraluarpat tamanna kommunini sullissisut amerlanerusut pisariaqartinneqalernerannik” kinguneqassaaq.

Allatut oqaatigalugu: Sulianik isumaginnittut suliassaqarpallaartut ikiorniaraanni taava taakku suleqatissaannik atorfinitsitsisoqartariaqarpoq – tamannalu akeqarpoq.

Aamma atuarukIsumaginnittoqarfiit sullissisunik amigaateqarput: Mimi Karlsenip isumaginnittoqarfinni sullissisut piginnaasaat qaffassarusuppai

Tamatuma saniatigut Aqqaluaq B. Egedep suliassat amerlassusaannut najoqqutaliineq suliassat amerlassusaannik ataatsimoortunik ikiliissutaanavianngissoraa.

Naak nunarsuarmi sumiiffinni allani – ilaatigut Danmarkimi ilisimatusarnerup – tamatuma muminga takutikkaluaraat.

Meeqqanik inuusuttunillu isumaginnittoqarfinni sullissisut suliaasa amerlassusissaannik innersuussutit

- Sullissisup ataatsip suliai 25-35-nit amerlanerusassanngitsut, Danmarkimi isumaginninnermik suliallit peqatigiiffiata innersuussutigaa.

- Sullissisup ataatsip suliai 15-20-nit amerlanerusassanngitsut, Sverigemi periuserineqartumi innersuussutaavoq.

Sverigemi periuserineqartoq tamaani kommunerpaaluit isumaginnittoqarfiisa meeqqanik inuusuttunillu sullissinermi aallaavigineqartarpoq. Sullissisut amerlavallaanngitsunik suliaqartarnissaat, iluarsaqqitamik suliarinneriaaseqarnissaq, sullitap iluqutaanik qanigisaanillu peqataatitsilluarnissaq sulianillu naammassilertuinerusinnaanissaq periuserisami tassani innersuussutaavoq.

Suliassarpassuit – suliarinnittullu ikittut

Aqqaluaq B. Egede kommunini suliassat amerligaluttuinnarnerat ilutigalugu taama nalunaaruteqarpoq.

Aqqaluaq B. Egedemmi naalakkersuisoqarfia Marita Jensenimut akissuteqarnermi saniatigut nunatsinni kommunini isumaginninnikkut suliat amerlassusaat naatsorsorpai.

Suliassarpassuillu isumaginnittullu ikittuinnaat taakkuninnga suliarinnittussaasut ersarilluarpoq.

Aamma atuaruk Peqatigiiffik: Namminersorlutik Oqartussat inunnik isumaginnittunik annaassiniaasariaqartut

Assersuutigalugu Kommuneqarfik Sermersuumi utoqqaat pillugit susassaqarfimmi sulianik isumaginnittut sulianik ingerlasunik 81-inik suliassaqartut erseqqissaatigineqarsinnaavoq.

Avannaata Kommunianilu isumaginnittut agguaqatigiissillugu immikkut 189-inik sullitaqarput.

Ukiorpassuarni ilungersunartuusoq

Aqqaluaq B. Egede isumaginnittumut ataatsimut suliassat amerlassusaannik ikilisaanissamik suliassaqartuni akisussaaffeqartunilu naalakkersuisuni siulliunngilaq.

Naalakkersuisummi meeqqanik inuusuttunillu isumaginninnikkut atugarliortunik isumaginnittut suliassaqarpallaarnerannik

Naalakkersuisut 2015-imi peqquneqarnikuupput "meeqqanik inuusuttunillu ajornartorsiuteqartunik tunngasunik oqaloqatigiinnissat siunertaralugit sulisut pineqartut qanoq assigiinngitsunik amerlatigisunik, kiisalu suliassiissutinik sulinerminnilu qanoq nammataqartiginersut, taamatullu suliassanut nukissanik naammaattunik peqartitsinersoq, kiisalu isumaginnittunut suliassat qanoq amerlassuseqarnissaat pillugu periarfissaqarnersoq, tamannalu pissusissamisoortuunersoq pillugit oqaloqateqarnissamik".

Suliassat amerlassusaasa siunnersuutigineqartunik malinninnermi iluaqutit

- Kalerriutinut qisuariarneq sukkanerusoq.

- Sullissinermi kukkunerit ikinnerulerneri.

- Sullissinerit siusinnerusut eqqorluarnerusullu.

- Meeqqat atugaqarnerisa allanngujaannerulernerat.

- Angajoqqaat meeqqallu naammagisimaarinnerulernerat.

- Isumaginnittut suliffiat suliffikkuminarnerulernera.

- Meeqqat sumiginnagaasut atuarfeqarfinni suliniutiginerulerneri

Tusarfik: Ilaqutariinnut inatsiseqarnermullu tunngasuni naalakkersuisoqarfik, 2014

Allisiguk

Tamanna nalunaarummik 2016-imi saqqummiussinermik kinguneqarpoq. Tassanilu allassimavoq "suliat amerlassusissaattut najoqqutassiaq ass. sullissisoq ataaseq 35-nik suliassalerlugu piviusunngortissagaanni ajornartorsiutaasoq siulleq tassaasoq ukiumut aningaasartuutaanerusut matussuserneqarnissaat, tassani sullissisunik amerlanerusunik pissarsiortoqarnissaanik kinguneqartumik”.

Tassa aningaasat ajornartorsiutaasunut aaqqiissuteqarnissamut aporfioqqipput.

Maanna nutaanik isumaliortoqartussanngortoq

Meeqqanullu susassaqarfimmi nunatsinni meeqqanik inuusuttunillu atugarliortunik ikiuisussanut, suliamik isumaginnittunut suliassaqarujussuarnera aamma ilungersunangaatsiarpoq.

Ilulissani meeqqanut inuusuttunullu tunngasuni isumaginnittut agguaqatigiissillugu sulianik 67-inik suliaqartarput. SIsimiuni kisitsit taanna isumaginnittumut ataatsimut 57-iupput.

Aamma atuarukMeeqqanik inuusuttunillu isumaginnittoqarfiit suliaat sulisuisa amerlassusaannut naleqqiullugit amerlavallaarujussuartut

Taamaammat taanna nunatsinni kommunini tamani ilungerunartuuvoq – ineriartornerlu tamanna qaangerneqarsinnaagallarpasinngilaq.

Aqqaluaq B. Egedep "digitalinngorsaanerit amerlanerusut, sullissisarnerup aaqqissuunneqarnissaanut atatillugu nutaanik isumaliornerit, suliamik suliarinnittartunik oqaloqatiginnilluni oqilisaanerit, allallu sulianik suliarinnittartut sulineranni atugassarititaasunik pitsaanerulersitsisinnaasut ilaatigut eqqaaneqarsinnaasut" oqaatigaa.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.