Peqatigiiffik: Namminersorlutik Oqartussat inunnik isumaginnittunik annaassiniaasariaqartut

Inunnik isumaginnittut suliassaqarpallaarujussuarput. Ingerlatsivinnilu suliassanik kivitsisinnaannginnerup nassuiaatissaraa. Inunnik isumaginnittut peqatigiiffiani siulittaasoq taama isumaqarpoq, politikerillu suaartarpai.

Allattoq Kim Hinrichsen

juunip 19-at 2023 07:12

Nutserisoq Akitsinnguaq Olsen

- Ilumoorullugu ilungersunartutut tiguneqarsimanngitsoq isumaqarpunga.

Atorfillit Kattuffiani inunnik isumaginnittut peqatigiiffiani siulittaasoq, Dina Olsen nunatsinni ingerlatsivinni tamani ilaasortaatitami ajornartorsiutai annertuut pillugit taama oqarpoq.

Ombudsmandip suliassaqarfimmik misissuisimanerani amiilaarnaqisunik kisitsisit takutitsineri takussutissat tunngavigalugit taama qisuariarpoq.

Aamma atuarukMeeqqanik akuersissuteqaqqaarani angerlarsimaffiup avataani inissiinerit quliniit qulingiluat annertuunik kukkuneqartut Isumaginninnermi Naammagittaalliuteqartarfiup paasigaa

Ukiorpassuarni ingerlatsivinni tamani politikerit unammilligassanik aaqqiissuteqarsimanngineri uparuarpaa. Sivisuallaarujussuarmillu.

Ingerlavinnimi kommuninilu tamani equngasoqarpoq.

Suliassat oqimaatsut kivinneqarnissai kommuninit piginnaasaqarfigineqanngillat. Suliassallu amerligaluttuinnavipput.

ALLAMUT INISSIISARNERIT PILLUGIT ALLAASERISAT NANGEQATTAARTUT

Una allaaserisaq allamut inissiisarnerni suliat naammaginanngitsumik suliarineqartartut pillugit KNR-ip nangeqattaartumik allaaserisaasa ilagaat. KNR.gl, radioaviisi aamma Qanorooq sapaatit-akunnerini tulliuttuni malinnaavigiuk.

Aamma atuaruk: Ombudsmandi: Allamut inissiinerit affaasa missaanni aalajangiinerit allagaataanngitsut

Sulianilli ingerlatsisunit piumassuseqannginnermik tamanna pinngilaq – illuatungerluinnaanilli, Dina Olsen isumaqarpoq:

- Kajumissuseqarluartoqarpoq allannguerususseqartunik. Suliassaqarpallaarujussuarporli, suliassarpassuarnillu kivitsisinnaasussat amigaatigineqarput. Inunnik sullissisoq ataasiugaangat suliassat 100-sartut tusarparput. Amerlavallaarujorujussuarput.

Misissuineqqissaallu takutippaat ilaasortaasuni aatsaat taamak uippakajaarnermik takussutissaqartigisut. Inunnik isumaginnittoqarfimmi sulisut akornanni 70 procentit ukiuni kingullerni uippakajaarnermik aqqusaagaqarsimallutik oqarluttuarput.

- Suliassat taama amerlatigitillugit naammaginartumik aaqqiissuteqartoqarsinnaanissaa naatsorsuutigineqarsinnaasorinngilara.

Ingerlatsiviit sulianik kivitsisinnaasoqanngingajavipput

Nunatsinni inunnik isumaginnittunik atorfiit 231-iusuni taamaallaat 77-it kisimik ilinniarsimasumik inuttaqarput.

Ingerlatsivinnilu sulianik kivitsisinnaannginnermi ersarissumik nassuiaatissaavoq. Piaarnerpaamik allanngortinneqartariaqarpoq, Dina Olsen oqarpoq. Tamanut tuttarpoq. Sulianik ingerlatsivut, meeqqat inuiaqatigiillu.

Inunnik isumaginnittut ilinniarsimanngitsoqanngitsorpassuaqarnerali kisimi tunngavilersuutigineqarsinnaanngilaq.

OMBUDSMANDIP MISISSUINERA

Ombudsmandi kommunit meeqqanik inissiisarneq angerlartitsisarnerlu pillugit suliaanik misissuivoq.

Ombudsmandi misissuinerminut tunngavilersuummini ima allappoq: "Kommunit meeqqanik inissiisarneq angerlartitsisarnerlu pillugit suliaannik arlaleriarlunga misissuisareerpunga. Misissusarninnilu paasisakka kommunit tamatumani suleriaasiannik isornartorsiuininnut tunngaviukkajupput."

Ombudsmandenip misissuiffigisassatut taamungaannaq toqqagai tassaapput Kommune Kujalleq aamma Qeqqata Kommunia. Sulianillu arlalinnik misissoqqissaagassaminik kommunit taakkua marluk toqqaaqquai.

Tassa kommunit taakkua sulianik misissugassaminik qulinik meeqqanik 2020-p 2021-llu inissiinermut tunngasunik taavalu sulianik allanik aamma qulinik meeqqanik 2020-p 2021-llu akornanni angerlatitsinermut tunngasunik toqqaaqquai.

Suliat misissugassatut toqqakkat katillutik 30-upput.

Kommune Kujalleq aamma Qeqqata Kommunia suliat misissugassatut toqqakkatik pillugit Ombudsmandip nalunaarutaanut missingiummut oqaaseqaateqarnissamik periarfissinneqarsimappput.

Allisiguk

Ajornartorsiut inunnik isumaginnittoqarfinniinngilaq, ingerlatsivinnili periutsit ajornartorsiutaapput. Suliassaqarfik politikerinit ingerlallualersinneqarsimanngitsoq.

- Ukiorpassuanngortuni suliassat aaqqiivigineqarsimanngillat, ingerlatsiviillu kukkusumik aaqqissugaapput. Meeqqat oqaaseqartartuata aamma tamanna oqaatigaa. Ukiorpassuanngortuni suliat pitsaasumik ingerlanneqarsimanngippata, taava periutsit inuiaqatigiinnut naleqqussimassanngillat.

Aamma atuarukMimi Karlsen: Meeqqat angerlarsimaffimminni peroriartortut amerlanerussapput

Ajornartorsiut nuna tamakkerlugu isigineqartariaqartariaqarsoraa. Kommunit nammineerlutik suliassaq kivissinnaanngimmassuk qulaaniit ikiorneqartariaqarput.

- Kommunit aaqqiiffigiuminaatsippaat. Kommunillu tamarmik assigiinngitsunik nukissaqarput. Annertoorujussuarmik iliuuseqarfigineqartariaqarpoq. Ikioqatigiittoqartariqarsorivaralu. Qitiusumiit ikiuisoqartariaqarpoq. Namminersorlutik Oqartussanit, Dina Olsen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.