Mimi Karlsen: Meeqqat angerlarsimaffimminni peroriartortut amerlanerussapput
Meeqqanut, inuusuttunut, ilaqutariinnut peqqinnissamullu naalakkersuisup, Mimi Karlsenip (IA) meeqqat pillugit iliuusissiaq nalunaaqutaq ataatsimut saqqummiutissavaa.
Ilaqutariit atugarliortut akornanni pinaveersaartitsinermik suliaqarnerup annertunerulersinneqarnissaa pilersaarutaassaaq, aamma meeqqat inuusuttullu ilaqutariinni imaluunniit ulloq unnuarlu angerlarsimaffinni paaqqutarineqartussanngortinneqartut ikinnerulersinnissaannut qulakkeerutaassaaq.
- Angerlarsimaffiup avataanut inissiineq sapinngisamik kingullertut aqqutissaassaaq, meeqqanut, inuusuttunut, ilaqutariinnut peqqinnissamullu naalakkersuisoq, Mimi Karlsen (IA) tusagassiortunik katersortitsinermi oqarpoq.
Meeqqat angerlarsimaffiup avataanut inissinneqarsimasut amerlassusaat
Meeqqat 23-nik ukiullit tikillugit 450-it missaanniittut 2019-imi decembarimi ilaqutarsiani najugaqarput.
Nunatsinni meeqqanut inuusuttunullu ulloq unnuarlu paaqqutarinniffinni katillugit 22-ni inissat 325-upput. Paaqqutarinniffiit taakku Namminersorlutik Oqartussat kommunit namminersortullu ataanniipput.
Inissat taakku tamarmik ulikkaaqqapput.
Ataatsimut isigalugu meeqqat inuusuttullu 23-t tikillugit ukioqartut ullumikkut 750-it missaanniittut angerlarsimaffiup avataanut inissinneqarsimasuupput.
Paasissutissarsiffik: Døgninstitutionernes Årsberetning 2020 og Kortlægning af plejefamilieområdet i Grønland 2021, VIVE.
Meeqqanut tusarnaarnerunissaq iliuusissiami anguniagaavortaaq. Tamannami Naalagaaffiit Peqatigiit Meeqqat pillugit isumaqatigiissutaanni pisinnaatitaaffiit ilagaat, tamannalu nunatta malinniassallugu pisussaaffigaa.
- Meerartatta inuunerminni pingaarutillit ilisimavaat, taakkualu tusarnaarnerorusuppagut, meeqqanut, inuusuttunut, ilaqutariinnut peqqinnissamullu naalakkersuisoq, Mimi Karlsen (IA) oqarpoq.
Nunatsinni meeqqat inuusuttullu ukioqanngitsuniit 23-nut ukiullit katillugit 750-it missaanniittut 2021-mi angerlarsimaffiup avataanut inissinneqarsimapput. Taakkununnga ilaapput inuusuttut 18-ileereersut angerlarsimaffiup avataanut inissinneqarsimasut namminiilernissamut ikaarsaariarneranni tapersersorneqarnissamik neqeroorfigineqarsimasut.
Tamanna ulloq unnuarlu paaqqutarinniffiit 2020-mi nalunaarutaanni kiisalu Kalaallit Nunaanni ilaqutarsianut tunngatillugu 2021-mi erseqqissaanermit kisitsisit takutippaat.
Suleqateqarnissamut pilersaarusiaq
Naalakkersuisut angerlarsimaffiup avataanut inissiinermi sulianut atatillugu kommunit qanimut suleqatigerusuppaat.
- Naalakkersuisoqarfitta tungaanit kommuninut suleqatigiinnissamut pilersaarusiaqarnissarput pingaaruteqarpoq. Suleqatigiinnitsigut anguniakkagut angusinnaavagut, Mimi Karlsen oqarpoq.
Naalakkersuisut kommuninit ilisimalikkat kommunimut allamut suleqatigisaminnut ingerlateqqissinnaassagaat taassuma oqaatigaa.
AAMMA ATUARUK Ombudsmandi: Qeqqata Kommunia ilungersunaqisunik qasseeriarluni kukkusarsimavoq
Naalakkersuisut tamatuma saniatigut ilaqutarsianik qanimut suleqateqarnissaq isumaginiarpaat, ilaqutarsiaasut taamaalillugit atugassaminnik sakkussaqarnerulissallutik.
- Ilaatigut tapersersoqatigiiffiusumik amigaateqartoqartarpoq. Ilaqutarsiaasut uku ikiornissaannut pisariaqartitsisoqarluinnarpoq. Assersuutigalugu ilaqutarsiaasut oqilisaassullugit meeqqat angajoqqaavini sapaatip akunnerata naanersiortinneqarsinnaapput.
Angerlarsimaffiup avataanut inissiineq kingullertut aqqutissaassasoq
Naalakkersuisut meeqqat angerlarsimaffiup avataanut inissinneqarnissaat pinaveersaartinniarpaat, inissiisoqassappalli meeqqat peroriartorluarsinnaanissaat pingaaruteqartoq, naalakkersuisoq oqarpoq.
- Ilaqutariit meeraasa angerlarsimaffiup avataanut inissinneqartariaqalinnginnissaat anguniarsarissavarput. Meerarli angerlarsimaffiup avataanut inissinneqarpat meeqqat angerlarsimaffimminni pissarsiarisinnaasamisulli peroriartorluartinneqassapput, Mimi Karlsen oqarpoq.
Taamaammallu ilaqutarsiat kommuninut sakkussaapput pingaaruteqartut.
- Meeqqat ilaqutarsianut inissinneqartut meeqqanit ulloq unnuarlu angerlarsimaffinnut inissinneqartunit pitsaanerusunit atugassaqartarput.
Iliuusissatut pilersaarutit qanoq piviusunngortinniarneqarpat?
- Ukuninnga suliaqareersut tapersersortariaqarpagut ilinniarteqqillugillu. Isumalluutit pigeriikkagut ilaqutarsianut aamma ulloq unnuarlu paaqqutarinniffinnut neqeroorutigisinnaassavagut, naalakkersuisoq oqarpoq.
Taassumali meeqqat angerlarsimaffiup avataanut inissinneqartarnerat akisoq nassuerutigaa. Mimi Karlsenilli oqarnera naapertorlugit aningaasat pingaarnerpaanngillat.
- Meeqqat aningaasanit naleqarnerunissaat Naalakkersuisunut pingaaruteqarpoq. Meeqqat peroriartorluarpata tamanna nalitoorujussuuvoq.