Ombudsmandi: Qeqqata Kommunia ilungersunaqisunik qasseeriarluni kukkusarsimavoq
Meeraq ataaseq, nalunaarutit arfineq-pingasut ukiullu sisamangajaat ingerlaneranni aalajangiinerit: 0.
Qeqqata Kommuniani meeqqamik atugarliortumik ikorfartuinermik suliap ataatsip eqikkarnera taamaappoq.
Ombudsmandillu kommunip tamatumani suliaa pillugu 58-inik quppernilimmik allaganngorlugu naliliinermini isornartorsiorpaa.
- Qeqqata Kommuniata meeqqamut ikorfartuinermik suliamini ilungersunaqisunik qasseeriarluni kukkusarsimavoq, kommunillu suliaa taanna ataatsimut isigalugu aamma assuarnarpoq, Inatsisartut ombudsmandiat Vera Leth inerniliivoq.
Inatsisartut ombudsmandeqarfianni inatsisilerinermi pisortaq Kim Blokbo KNR-imut ima oqarpoq:
- Suliaq taanna ombudsmandip isumaginninneq pillugu inatsisilerinermi ukiorpassuarni takusaani aatsaat taama ilungersunartigisunut ilaavoq. Qeqqata Kommunia suliamik peqqissaarussisimannginnera assuareqaarput.
Eqqarsartaatsikkut kinguariaateqarsimasoq imminullu innarlertarsimasoq
Nalunaarut 1, 3. novembari 2017:
Meeraq taanna atuarneq ajortoq, atuarfiup pisortaa kommunimut nalunaarpoq.
Nalunaarut 2, 2. februaari 2018:
Meeqqap taassuma atuanngitsoorfeqartarnera eqqarsartaatsikkullu napparsimalersimasinnaanera ernummatigineqartut, ilinniartitsisoq kommunimut nalunaarpoq.
Nalunaarut 3, 24. septembari 2018:
Meeqqap taassuma atuanngitsoorfeqartarnera, atuarfiup pisortaata kommunip meeqqap arnaanut ikiuutilertornissaa neriuutigalugu nalunaarutigeqqippaa.
Nalunaarut 4, 13. septembari 2019:
Meeraq taanna eqqarsataatsikkut ineriartornermigut kinguariaateqarsimaqimmat siunnersorneqarnissamik ilitsersorneqarnissamillu allaat neqeroorfigineqarsinnaajunnaarsimasoq, tarnip pissusiinik ilimasalik kommunimut nalunaarpoq.
Nalunaarut 5, 26. novembari 2019:
Meeraq taanna imminut toqunnissamik eqqarsaateqartartoq imminullu innarlertartoq, nunap immikkoortuani nakorsaaneq kommunimut nalunaarpoq.
Nalunaarutt 6, 10. januaari 2020:
Meeraq taanna atuarfimmi pinaasertartoq, imminut toqunnissamik eqqarsaateqartartoq, imminut innarlertartoq sioorasartorlu, meeqqat tarniisa pissusiinik ilisimasalik kommunimut nalunaarpoq.
Nalunaarut 7, 11. februaari 2020:
Meeraq taanna ilaqutaalu isumakuluutigeqigini, meeqqat tarniisa pissusiinik ilisimasalik nalunaarpoq. Tassa meeqqat tarniisa pissusiinik ilisimasalik meeqqap taassuma atugarliornera, ineriartornera atuarneralu pillugit kommunimut nalunaaruteqaqqippoq.
Nalunaarut 8, 14. maaji 2020:
Meeqqap taassuma kigutai sioorasarmat ukiorpassuarni misissorneqarsimanngitsut, kigutileriffik kommunimut nalunaarpoq.
Meeraq taanna kommunimut arfineq-pingasoriarluni nalunaarutigineqarsimavoq, taakkualu 2017-imi novembarip arfineq-pingajuata 2020-milu maajip 14-iata akornanni pisimapput. Meeraq taanna qulingiluaannarnik ukioqartoq suliaq aallartissimavoq.
Assersuutigalugu meeraq taanna eqqarsartaatsikkut ineriartornermigut kinguariaateqarsimasoq, tarnip pissusiinik ilisimasallip nalunaarutigisimavaa.
Meeraq taanna imminornissamik eqqarsaateqartartoq imminullu innarlertartoq, nakorsaanerit ilaata kommunimut aamma nalunaarutigisimavaa.
Tassa meeqqap taassuma eqqarsartaatsikkut napparsimalersimasinnaanera ernummatigalugu nalunaaruteqartuusut isumaginninnermi immikkut ilisimasaliupput.
Inatsisinik unioqqutitsisoq
Isumaginninnikkut misissuinissamut tunngavissaqarnersoq kommunip siullermilli nalunaaruteqartoqareernerani nalilersimasariaqaraluarpaa.
Meeqqanimmi tapersuisarneq pillugu inatsimmi § 19 naapertorlugu kommunalbestyrelsi nalunaarutiginninnermik anngussivigineqarnerminiit nalunaaquttap akunneri 24-t qaangiutsinnagit isumaginninnikkut misissuinissamut tunngavissaqarnersoq isummertussaavoq.
Qeqqata Kommuniali suliamut tassunga tunngatillugu taamaaliorsimanngilaq.
Taamaammat kommuni inatsisinik meeqqat inuusuttullu tapersersorneqarnissamik neqeroorfigineqarnissaannik qulakkeerutaasussanik unioqqutitsilluinnarsimasoq, ombudsmandi naliliivoq.
- Tamanna uanga paasinninnera naapertorlgu akuerineqarsinnaanngilluinnarpoq, ombudsmandi naliliinermini allappoq.
Pisinnaatitaaffiiagaasimasut
Meeqqap arnaa panini pillugu ikioqqulluni kommunimut arlaleriarluni saaffiginnittarsimasoq, taannalu aamma kommunilu 2017-imi novembarip arfineq-pingajuata 2020-milu maajip 14-iata akornanni qasseerpassuariarlutik ataatsimiillutillu oqaloqatigiittarsimapput.
Meeqqalli arnaa ikiorneqarsimanngilaq.
Taamaammat panimminut ikorfartortinngornissamik 2021-mi januaarip 26-iani qinnuteqarpoq.
Qinnuteqaataa kommunip akuerimmagu 2021-mi marsip 30-ani ikorfartortinngorpoq.
Kommunimilli ikiorneqarsimannginnini ilitsersorneqarsimannginninilu ombudsmandimut qinnuteqarnermi ikorfartortinngornermilu akornanni naammagittaalliutigai.
Kommunilu pillugu naammagittaalliuteqarnissamut pissutissaqarluarsimavoq.
Kommunimi suliassat suliarineqartarnerat pilugu inatsit naapertorlugu meeqqap taassuma arnaanut ilitsersuisussaatitaavoq, taamaaliorsimannginnamili inatsimmik unioqqutitsisimavoq.
- Kommunilu meeqqap taassuma arnaanut ataatsimeeqatigisaarnerani oqaloqatigisaarneranilu ilitsersuisarsimanngilaq, ombudsmandi naliliinermini allappoq.
Kommunillu ilitsersuisarsimannginnera meeqqap arnaalu pisinnaatitaaffiagaangaatsiarnerannik kinguneqartoq, ombudsmandi aamma allappoq.
Ilinniarsimasunik isumaginninnermi siunnersortissaalatsisut
Qeqqata Kommuniata isumaginninnermi pisortaa, Martha Lund Olsen, oqaloqatigaarput.
Kommunimi isumaginninnermi siunnersortit ilinniarsimasut ikittuararsuusut tamannalu suliap peqqissaarunneqarsimannginneranut peqqutaaqataasimasinnaasoq, taassuma ilaatigut oqaatigaa.
- Suliarinnittut kingoraartaassimapput, aamma isumaginninnermi siunnersortissaalatsivugut. Sivisuumik suliarinerlutaasimasutut taaneqarsinnaavoq, suliarli taanna isumaginninnermi siunnersortitut ilinniarsimasuunngitsunut aamma erloqinartuuvoq, Martha Lund Olsen KNR-imut oqarpoq.
Kommunili iliuuseqarsimannginnerassallugu aamma eqqortuusorinnginnerarpaa. Kommunili suliamik taassuminnga sapinngisamik pitsaanerpaamik suliarinninniarsimasoq, taanna isumaqarpoq.
- Iliuuseqartoqarsimanngitsoq oqarsinnaanngilanga. Sapinngisamik pitsaanerpaamik suliarineqarpoq. Peqqissaarunneqarsimanersorlu oqallisigineqarsinnaavoq.
