- Meeqqat isigineqanngitsutut, tusaaneqanngitsutut paasineqanngitsutullu qularnanngitsumik misigisarsimassapput. Kiserlioqalutillu ilaginnagaasutut misigisarsimassapput.

Ilisimatusarfiup isumaginninnermi siunnersortinngornianut immikkoortortaani pisortaq, Sara Abelsen, allamut inissiinerit ilarpassuini aalajangiinerit allagaataannginnerat pillugu taama oqarpoq.

Allamummi inissiinerit affaasa missaanni aalajangiinerit allagaataanngitsut, Ombudsmandip siorna misissuinerani erserpoq. Kommunit marluk taamungaannaq toqqagaallutik misissuiffigisaapput, taakkunanilu suliat ilarpaaluini aalajangiinerit allagaataanatillu kukkuneqartut erserpoq. Sulianillu taamaattunik suliarinninnermik ilisimasaqarluartussaalatsineq nunarput tamakkerlugu ajornartorsiutaasoq, Ombudsmandi oqarpoq. 

Tassalu taamaappoq, naak meeqqap siunissami ungasinerusumi isumagineqarnissaa, atugaasalu iluarsiniarnissaat qulakkeerniarlugit aalajangikkat allagaatanissaat inatsimmi piumasaqaataagaluartoq.

Tamannalu ajorluinnartoq, Sara Abelsen isumaqarpoq.

- Aalajangiinerimmi allagaatiginissaat piumasaqaataavoq. Meeqqamummi, ilaqutaanut inuiaqatigiinnullu pingaaqaaq. Taamaaliornissaq inatsisitigut pisussaaffiuvoq. Tassa inatsisinik unioqqutitsisoqarsimasoq Ombudsmandip ukiumoortumik nalunaarutaani allaqqavoq, taanna oqarpoq.

Meeqqat allamut inissitaatinnatik oqaloqatigineqaqqaarsimanngitsortaqartut, Ombudsmandip suliat misissugaasa affaasa missaanni aamma erserpoq. Tamannalu isumakulunnarneroqisoq, Sara Abelsen isumaqarpoq:

- Meeraq qanoq innersoq paasissallugu pingaaqaaq. Inersimasuusugut meeqqanut tusarnaarneq suliassatsinni pingaarnerpaavoq. Aamma meeqqat inersimasunit sumiginnagaannginnissaannik qularnaarinissaq.

Ajornartorsiut timitarsineqartoq, tusarnartaanngitsorli

Sara Abelsen kisitsisinut saqqummiussanut quarsaarpoq, tupaallannanili. Nunatsinnimi kommunit aalajangiinernik allagaateqartannginnerat ukiorpassuarni ajornartorsiutaasoq, taanna oqarpoq. Tassa tamatuma timitarsineqarnikuusimanngitsup kiisami timitarsineqarnerata allaassutigiinnarpaa.

- Taamaammat kisitsisit saqqummiussat tupaallatiginngilakka. Taamaattoqarneranilli takussutissat atuarsinnaanngorpakka. Kommunini meeqqat aamma isumakuluutigiummerpakka. Iliuuseqarnissatsinnut naammattunik paasissutissaqalertoq isumaqarpunga. Iliuuseqarnissaq amigaataaginnalerpoq!

Ombudsmanilu taamatukanneq nalunaarutimini aamma allappoq:

"Kommunit ilungersunartunik kukkussuteqartarput ilaatigullu paasissutissanik pissarsiniarnertik meeqqanillu angerlarsimaffiup avataanut inissiinermut inatsisikkut piumasaqaataasutut misissuinernik ingerlatsiniartarnertik ajornartorsiutigisarpaat."

Kommunit suliassaq nammassinnaanngilaat

Meeqqat ikiortariallit pillugit suliat ajornakusoortuusut naammattumik paasissutissartaqartannginnerat sullissinermik equsoortitsilluinnartarput. Tamannalu suliamik suliarinnittumut meeqqallumi sullitap ilaqutaanut ajornartorsiutaavoq, Sara Abelsen oqarpoq:

- Tassa nalornisoqartarpoq. Inersimasormi meeraq isumassukkani sapinngisamik ikiorluarumallugu paasinartunik paasissutissaalatsiguni qanoq iliuuseqangaarsinnaanngilaq.

Kommunit ingerlatsivii sulisussaalatsillutillu ilinniagakitsortaqarmata meeqqanik allamut inissinissamik naliliiniartilluni suliat oqimaagalugit nammassinnaanngilluinnaraat, Sara Abelsen oqarpoq.

Taamaammat Namminersorlutik Oqartussat taakkuninnga suliaqarnermik akisussaasunngorlutillu kommuninut ikiuunnissaat piffissanngortoq, taanna aamma isumaqarpoq.  

Kommunit meeqqanik allamut inissiinissamik naliliinissanut ajornakusoortuusunut inorsartut, Ombudsmandi aamma isumaqarpoq, taannalu tamanna pillugu ukiumoortumi nalunaarummini ima allappoq: 

"Kommunit sulianik meeqqanut tunngasunik oqimaatsunik pingaaruteqartunillu suliarinninnerminni ajornartorsiuteqarnerannik paasisara suliniutip taassuma uppernarsarpaa."

Kommunit suliani taakkunani inorsarunnaarnissaannik aaqqiiniartoqassappat, tamanna suliarujussuussangatinneqarpoq. Kikkulluunniilli meeqqat pillugit iliuuseqaqataanissaat pingaartoq, Sara Abelsen oqarpoq:

- Pisortaqarfiit aalajangiinerit ilaanni allaganngortitsisannginnamik sumiginnaapput. Tamatta, aamma Inatsisartut, Naalakkersuisut kommunalbestyrelsillu. Aammali innuttaasut akisussaaqataapput. Angajoqqaat meeqqatik akisussaaffigaat. Minnerunngitsumilli aalajangiisartut.

Ombudsmandi oqaloqatigiumagaluaratsigu piumanngilaq.