Isumaginnittoqarfiit sullissisunik amigaateqarput: Mimi Karlsenip isumaginnittoqarfinni sullissisut piginnaasaat qaffassarusuppai

Meeqqat, inuusuttut innarluutillillu pisariaqartitaat naapertorlugit ikiorneqanngillat. Tamannalu pivoq nunatta kommuniini isumaginnittoqarfinni sullissisut suliassaqarpallaarnerat, amigaateqarnerat ilinniarsimasukinnerallu peqqutigalugu.

- Isumaginninnermut siunnersortit isumaginninnikkullu suliaqarnermi siunnersortit amerlanerusut pisariaqartippagut. Meerartagut inuusuttortagullu kiisalu inuit innarluutillit pitsaanerusumik sullinneqartarnissaat qulakkeerniarlugu sulianik suliarinnittartut attuumassusilimmik isumaginninnikkut tunngasutigut ilinniagaqarsimanngitsut amerlasuut piginnaasaqarnerulersissavagut, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen tusagassiuutinut nalunaarummi taama allappoq.

Nunatsinni kommunini tallimaasuni, kommunini sisamani, isumaginnittoqarfinni sullissisut pingasuugaangamik, ataasiinnaq inunnik isumaginnitsitut ilinniarsimasuusarpoq. Saniatigulli kommunit inunnut isumaginnittunik 19-inik suli amigaateqarput.

Kommune Qeqertalik, Qeqqata Kommunia, Avannaata Kommunia Kommune Kujallerlu uani pineqarput.

Kommuneqarfik Sermersooq ikinnerpaaffissamik sulisoqarnissamik akuerisatut aalajangigaqanngilaq, taamaammat kommuni taanna kisitsinermi peqataatinneqanngilaq. Kommunilli paasissutissiissutigaa, meeqqanik isumaginnittut affaaniit ikinnerulaartut assingusumik ilinniagaqartuunngitsut.

Sullissisunut ikitsunut suliassat amerlavallaartut

Qeqqata Kommuniani Inatsisartunut ombudsmandi peqqissaarussinnginnernut, kukkunernut sumiginnaanernullu quppernernik 58-inik takitigisumik oqaaseqaammi siorna novembarimi isornartorsiuivoq. Meeqqap ulorianartorsiortup ataatsip arfineq pingasoriarluni kalerriutigineqaraluarluni Kommunemiit qisuariarfigineqannginnerata kingorna isornartorsiuineq qaqinneqarpoq.

Taamatut pisoqarnera pillugu KNR misissuivoq meeqqanut - inuusuttunullu nunatta kommuniini sullissinerit qanoq inissisimanerannik.

Tassani ersarissivoq suliassarpassuarnut sullississanik amigaateqartoqarnera.

Meeqqat- inuusuttullu qassit sullinneqartarnissaat pillugu danskit isumaginninnermut siunnersortit peqatigiiffiata saqqummersippaa, kalaallilllu isumaginninnermut siunnersortit peqatigiiffiata (NIISIP) tamanna taperserpaa. Isumaginninnermut siunnersortit peqatigiiffiata innersuussutigaa, isumaginnittoqarfimmi sullissisoq suliassat 25-nit 35-t tikillugit suliarisassagai.

Kisiannili Kommune Qeqertaliup kisimi sullitassat amerlassusaannik inunnik isumaginnittut peqatigiiffiata NIISIP-ip siunnersuutigisaannik malinnippoq. Nunatsinni kommunini allani isumaginnittut sullissinerata amerlassusaat ikappallaarput.

Innuttaasut eqqugaapput

Ilinniarsimasunik amigaateqartoqarnera innuttaasunut eqquivoq – innuttaasormi pitsaanerpaamik siunnersorneqassappat, inunnik isumaginnittut ilinniarsimasuunissaat pisariaqarpoq. Ilisimatusarfimmi isumaginninnermut siunnersortitut ilinniarfimmi isumaginninnermut siunnersorti immikkoortortaqarfimmilu pisortaq Sara Abelsen, KNR-ip ajornartorsiut taanna pillugu oqaloqatiginerani taama oqarpoq.

- Innuttaasormi isumaginninnermut tunngasumik ilinniarsimasuunngitsumit sullinneqaraangami malittarisassat naapertorlugit ilitsersorneqarlunilu siunnersorneqarnissaagalua isumaginninnermulluunniit tunngasumik ilinniarsimasunit sullinneqarnissaagalua pinngitsoortarput, taanna oqarpoq.

Taamaattumik Mimi Karlsenip inunnut sullissisut assingusumik ilinniarneqanngitsorpassuit piginnaasaat qaffassarusullugit kommunit suleqatigiumavai.