Demokraatit qallunaat partiivilu suleqatigiilertut
Liberal Alliance-mut siulittaasoq, Alex Vanopslagh, aammalu Demokraatinut siulittaasoq, Jens-Frederik Nielsen, ullumikkut partiit taakku marluk akornanni politikkikkut suleqatigiinnissamik atsioqatigiipput.
Taama Liberal Alliancet tusagassiortunik katersuutsitsinermi Ritzaumut nalunaarput.
Vanopslagh oqarnera naapertorlugu partiit pingaartitsinerat ataqatigiinnerulissapput.
-Taamaattumik nuannaartorujussuuvunga, kalaallit nunaanni suleqatitsinnik Demokraatini suleqateqarnitta piviusunngortikkatsigu, ukiuni kingullerni ilisarisimalersimannik iluarinartitannillu peqalerpugut” Alex Vanopslagh, Liberal Alliance-mi siulittaasoq oqarpoq.
Suleqatigiinneq politikkikkut ilaatigut partiini siulittaasut Kalaallit Nunaat aamma Danmark pineqartillugit paasissutissanik paarlaaqatigiittoqartalissaaq.
Kalaallit Nunaat piffissami politikkikkut oqallisaangaatsiarpoq. Apeqqut pineqartoq tassaalerpoq namminersorneq. Pisut ilapittuinnarlugit maanna USA´p præsidenterisimasaat præsidentiuleqqittussarlu Kalaallit Nunaat soqutiginerartuarsinnarpaa.
Piffissami pissanganartumi aalajangiiffiusussamilu Kalaallit Nunaata Danmarkillu akornanni inissisimasut, Jens-Frederik Nielsen naliliivoq.
-Inernera qanoq ikkaluarpalluunniit, qularutissaanngilluinnarpoq, piffissami qaninnermi pitsaasumik isummersoqatigiinnissaq pitsaasumillu suleqatigiinnissaq annertuumik pisariaqartinneqassasoq.
-Tassani uagutsinni Demokraatini pingaartuuvoq, pingaartitatta assinganik pingaartitsisunik aammalu tunngaviusumik Kalaallit Nunaata aalajangeeqataanerunissamik kissaateqarneranik tunngaviusumik ataqqinnittumik suleqateqarnissaq, tusagassiortunik katersuutsitsinermi oqarpoq.
Suleqatigiinneq politikkikkut ilaatigut partiini siulittaasut akornanni aalajangersimasumik Christiansborgimi ataatsimiinnernik kinguneqassaaq, tamannali aatsaat qulakkeerneqassaaq Demokraatit Folketinngimut qinersinermi iluatsitsippata.
Taamatuttaaq suleqaatigiinneq kinguneqassaaq, Demokraatit Liberal Alliance-p gruppemødernerinut peqataasarnissaannik, partii Folketinngimut isissagaluarpat, taamatuttaarlu sulisut qineqqusaarnerni aggersuni suleqatigiinnissat.
Atlantikup avannarpasissuanit folketinngimut sassartut sisamaapput, Kalaallit Nunaanniit marluusut Savalimmiunissaaq marluk sassarput.
Danskit Atlantikup avannarpasissuaneersullu partiivisa taama suleqatigiittarnerat takornartaanngilaq. Assersuutigalugu folketingimi ilaasortap Aki-Matilda Høegh-Damip partii Siumumeersup eqimattani ataatsimiinnerni Socialdemokratit ataatsimiinnerini peqataaffigisinnaavai.
