Tilioq inatsisissatut siunnersuut pillugu: Allannguinavianngilaq pitsannguinaviarnanilu
![](/sites/default/files/styles/image_934x467/public/article_images/mtp4te25drzo4e.png?itok=NTOLG4bn)
Pingasunngorpat ulloq nunatsinni inunnik innarluutilinnik suliassaqarfimmut pingaarutiliuvoq. Inuimmi innarluutillit tapersersorneqarnissaannut inatsisissatut siunnersuutip erinitsaassaasup tusarniaassutigineqarnernerani akissuteqarnissamut ulloq taanna periarfissaq kingulliussaaq.
Nunatsinnilu inuit innarluutillit pillugit oqaaseqartartoq, Anja Hynne Nielsen, inatsisissatut siunnersuummut tassungarpiaq innersuussaqartunut ilaavoq.
Innersuussanili ilanngunneqarnerat takujuminaatsoq, taanna oqarpoq:
- Inatsisissatut siunnersuut pakatsinaqaaq. Siunnersuummi Naalakkersuisut tusarniaassutigisaat Tiliormit, Nunatsinni Inuit Innarluutillit Kattuffiannit (NIIK) aamma Inuit Pisinnaatitaaffii pillugit Kalaallit Nunaanni Siunnersuisoqatigiinnit isornartorsiorneqangaatsiareeraluartoq allannguuteqangaanngilaq, taanna oqarpoq nangillunilu:
- Ilaatinneqartugummi oqaatigaat. Ukiarmi workshoppertitsisoqarlunilu oqaloqatigiittarnerit pipput. Peqataatinneqarnerpulli innersuussattalu ilanngunneqarnerat takujuminaappoq. Uggornaqaaq.
Inuimmi innarluutillit tapersersorneqarnissaannut inatsisissatut siunnersuut aappassaanik tusarniaassutigineqaleruttorpoq. Taamaammat inuit isummersuutaat inatsisissatut siunnersuummi ilanngunneqarnerat takujuminarniartussaaniarunaraluarpoq.
Allannguuteqangaanngitsoq
Taamaattoqanngitsorli, Anja Hynne Nielsen isumaqarpoq.
Inatsisissatummi siunnersuut akuerineqarpat allannguuteqangaannginnissaa aarleqqutigigini, taanna oqarpoq.
Tassa killiffik allanngunngippat, inuit iliuuseqartoqarnissaanik pisariaqartitseqisut atugaannik pitsannguingaarnavianngilaq:
- Inatsisissatut siunnersuut akuerineqassappat, Kalaallit Nunaanni inuit innarluutillit atugaannik pitsannguingaannginnissaa aarleqqutiginerpaavara, aamma FN-ip tamatumani isumaqatigiissutaata inatsisissatut siunnersuummi ilanngunnissaanik qularnaarisuunnginnissaa.
Naalagaaffiit Peqatigiit (FN) inuit innarluutillit pillugit ataatsimiititaliaani ilaasortat ilaat nunatta inunnik innarluutilinnik sullisseriaasianik nalilersuinerminnut tunngatillugu taamatorpiaq ilaatigut aamma oqarpoq.
Inatsisissatut siunnersuutip atuutilernissaanut nunatta iliuusissatut pilersaarutaa ersernerluppallaartoq, taanna isumaqarpoq. Tilioq tamatumunnga isumaqataavoq.
![](/sites/default/files/styles/image_934x467/public/2024-08/IMG_2780.jpeg?itok=hv3c99qo)
- Nutaamik eqqarsartoqaqqunaraluaqaaq aamma inuit innarluutillit pillugit isumaqatigiissummi tunngaviit inatsisissatut siunnersuummut aamma iliuusissatut pilersaarummut erseqqilluinnartumik ilanngunneqaqqunaraluaqaat, soorlu nammineersinnaatitaanissamut, assigiinngisitsinnginnissamut, assigiissumik periarfissaqartitaanissamut tunngasut, Anja Hynne Nielsen oqarpoq.
Ajornartorsiutip qiterpiiaata aaqqiiviginissaa merserigaat
Nunatsinni inunnik innarluutilinnik suliassaqarfimmi equngasoqarnerata qiterpiaa nunatsinni kommunit inunnik innarluutilinnik isumaginnittoqarfiisa sullisseriaasiannit aallaaveqartoq, Anja Hynne Nielsen oqarpoq.
Tassami isumaginnittoqarfiit pisoqalivallaalersumik aaqqissuussaasut sulisussaalatsikkajuttut tusarnartaanngilaq.
Suaartartoqartaraluaqisorlu suli allanngortoqanngilaq:
- Sullissisut allannguinissamik suleqataarusoqisortaqartut nalunngilara. Inatsisissatullu siunnersuut una taamaaliorsinnaanissaannut oqilisaassinavianngilaq. Aamma inatsisitigut isumannaatsuulertitsinavianngilaq. Tassa ajornartorsiutip qiterpiaanik aaqqiiniartoqannginnera ajorluinnarlunilu uggornaqaaq, taanna oqarpoq nangillunilu:
- Aaqqissuussaanikkut equngasoqartoq ersersinneqaqqippoq. Taamaannera miserratigiunnaarneqanngippat aaqqiisoqanngippallu, inatsisissatut siunnersuut aamma iluaqutaanavianngilaq. Tassa tamannarpiaq aarleqqutigisara. Inuit ikiorneqarnatik tamaviaartuarnissaat.
Ilaarsiinnarneqarpallaartoq
Nunatsinni inunnik innarluutilinnik sullissinerup aaqqissuussaanerata Danmarkimi sullissinermit ilaarsiinnarneqarpallaarnera ajornartorsiutitta annersaasa ilagigaat, Anja Hynne Nielsen oqarpoq:
- Nunatsinni pissutsit aallaavigineqanngillat. Avatangiisivut, kulturerput inuiaqatigiinnilu aaqqissuusaanerput. Ajornartorsiutivut periarfissavullu. Minnerunngitsumillu nunarput FN-ip inuit innarluutillit pillugit isumaqatigiissutaani anguniakkanik aamma naammassisakippallaarluni.
- Inatsisissatut siunnersuut una Danmarkimi inatsimmeersortaqaqisoq takusinnaavara. Kiinaannguusaarnaqaaq – sualummik Danmarkimimi inatsisip iluaqutaannginnera aamma eqqaassagaanni, taanna oqarpoq.
Taamaammat tamatumani paasisimasaqarluartut, tassa nunatsinni inuit innarluutillit politikerinit tusaaneqarluarsimanissaat, taassuma neriuutigisimagaluarpaa.
Allunngunissamut aaqqissuusseqqerujussuarnissaq pisariaqartoq
Nunatsinni inuit innarluutillit tapersersorneqarnissaannut inatsisissatut siunnersuutip atulernissaa suli ungasikkaluartoq, aningaasanik tamatumunnga immikkoortitsisoqalersaalereerpoq.
Tassa tamatumunnga 40 millionit koruuningajalluinnaat 2025-mi aningaasanut inatsisissatut siunnersuummi immikkoortinneqassasut, naalakkersuisut siunnersuutigaat.
Nunatsinnilu inunnut innarluutilinnut tunngasutigut kiisami iliuuseqalersaartoqarnera nuannaarutigigini aammali naammanngitsumik iliuuseqartoqarnissaa aarleqqutigigini, Anja Hynne Nielsen oqarpoq:
- Aningaasanik immikkoortitsisoqalersaartoq nalunngilara. Inatsimmilli nutaamik allannguuteqangaanngitsumik atuutilersitsiniarneq isumatusaarnerunngitsoq isumaqarpunga. Aaqqissuusseqqerujussuartoqarpat pitsaanerugaluarpoq. Pimoorussinermik takutsinissaq pisariaqarpoq, taanna oqarpoq nangillunilu:
- Inunnut innarluutilinnut ikiorneqarnissamik suaartartuartunut iluaqutaasussamik tamatumani suliassaqarfimmi aaqqiisoqarusunnissaa. Equngasoqavippormi.