Aningaasanut inatsimmik isornartorsiuineq: Kollegienik sanaartornissamut aningaasartuutissat piffissaq kingulleq peerneqartut

- Naalakkersuisut aqutsinerannik isorinneqaanga, pingaartumik qinersisoqangajalernerani.

Demokraatit siulittaasuat, Jens-Frederik Nielsen ilinniartut ineqarfiinik sanaartornissamut 188,8 millionit koruunit missingersuutinit aningaasanut inatsisip novembarimi isumaqatigiinniutigineqarnissaanut peerneqarsimanerat pillugu taama oqarpoq.

Missingersuutimmi isumaqatigiinnialernermi oqimaaqatigiinngillat. Taamaammat Naalakkersuisut inatsit, sanaartukkap inuiaqatigiinnut sipaarutaanera sanaartornermi aningaasartuutinit amerlanerullutik inuiaqatigiinnut siparutaappata missigingersuutiniit peerneqarsinnaanerannik imaqartoq, atussallugu aalajangerput.

Allatut ima oqaatigineqarsinnaavoq aningaasanik piginngisanik ullut ilaanni utertitsinissat neriuutigalugu aningaasanik atttartoriarluni atuineruvoq.

Taamaakkumaarneranilli uppernarsaasumik misissueqqissaartitsisimagaanni aatsaat taamaaliortoqarsinnaavoq. Kisianni taamaattoqarnissaanik uppernarsaasumik misissuisoqarsimaguni aatsaat taamaaliortoqarsinnaavoq. Naalakkersuisut sapaatit akunnerini pingasuni suliarineqartussamik misissuititsipput, inerniliissullu isumalluartuugaluaraanniluunnit qularnarluni.

Misissuineq naapertorlugu ilinniartut ineqarfii ukiuni 50-ini napasinnaapput, aningaasartuutilli iluanaarutigineqalernissaanut ukiut 46-t ingerlaqqaassapput. Nalunaarutip taamaalilluni sanaartorneq "killilimmik iluanaarutaassasoq" inerniliissutigaa.

- Misissuineq tuaviuusssaq tutsuiginaranilu akisussaassuseqannginneruvoq. Tamanna aningaasanut inatsimmut ilanngussaata torertumik aningaasalerneqarsimannginnerannut takussutissiivoq, Jens-Frederik Nielsen oqarpoq.

Ilisimasallip naliliinera 

Torben Andersen naalakkersuisunut ikiuutaasartumi nunatsinni aningaasaqarnermut siunnersuisoqarfimmi siulittaasuuvoq.

Taassuma oqarnera naapertorlugu missingersuusiornermi killiffissiornermi inatsimmi najoqqutassaq maleqqissaarpaa. Tassalu inatsisit naaperlugit isertuuttarialimmik sulisoqarsimanngilaq.  

Misissuinerli piffissami taama sivikitsigisumi suliallu tamarmi ingerlanerani taama kingusitsigisumi suliarineqarnera maluginiagassaanerarpaa.

- Piumasaqaatit naammassinissaat pissutigalugu misissuinerit suliarilluaqqissaarneqarnissaat pingaaruteqarpoq, Torben Andersen oqarpoq.

- Sooruna aallaqqaammulli misissusoqarsimanngitsoq, taamaalilluni missingersuusioruttulernermut utaqqeqqaarnani, ilinniartut inaannik sanasoqasssanersoq nalilerneqassangaluarluni?

Torben Andersenip misissuinerup imarisaa oqaaseqarfigiumanngilaa, misissuilluartoqarnissaali kaammattuutigalugu.

KNR-ip misissuineq atuarpaa.

Inerneri qularnartut

Misissuinermi allaatiginnittut suliarinninnissamut sapaatit akunnerini pingasuinnarni periarfissaqaramik misissuinerup itisilernera imartussussaalu killeqartoq namminneerlutik allappaat.

- Piffissap sivikinnera misissuinerup itisilerneranut imartussusianullu soorunami sunniuteqarpoq, taamaammallu inerneri tamanna toqqammavigalugu nalilerneqartariaqarluni, misissuinermi allaatiginnittut allapput.

Allaaserinnittut pingaartumik isornartorsiugaat tassaavoq aningaasanut naalakkersuisoqarfiup allaaserinnittut piumaffigisimammagit ilinniartut inaannik aserfallatsaaliisarneq ukiumut 275.000 koruuninik naatssorsoqqullugu.

Misissuineq naapertorlugu Danmarkimi inissiat assingi aserfallatsaaliinermut aningaasartuutit ukiumut 2,2 millionit koruuneqassaaq.

Danskillu kisitsisaat nunatsinnut nuutsinneqarunik sanaartornerup missingersuutinit peerneqarnissaanut inatsimmi piumasaqaat naammassineqarnavianngitsoq misissuinermi inerniliissutigineqarpoq:

- Tamatumunnga taama allannguitigineq inuiaqatigiinnut aningaasaqarnikkut iluanaarutaasinnaanani pitsaanngitsumik kinguneqassaaq.

Inatsimmut allannguut

Jens-Frederik Nielsen aalajangiisussaagaluarpat Inatsisartut inatsimmik allannguiniassagaluarput, taama misssigersueqqinnissaq ajornarsisillugu.

Tigussaanerusunngoraanni taassuma sanaartukkat qanoq sivisutigisumik napareernermini iluanaarutaasarnissaannut piumasaqaatit siukaterneqartariaqarput.

- Taamaaliortoqartariaqarpoq. Missingersuusiornermi killiffissiorneq ilumoorunneqartassappat immikkualutortalersortariaqarparput naalakkersuisut maanna iliuuserisimasaattut uiartorneqarsinnaajunnaarlugu.

- Naalakkersuisut qinersisoqannginnerani pitsaasumik aningaasanut inatsimmik suliaqarnissartik imminnut pingaarnerpaasoq takutippaat. Taamaammat malittarisassat taakku misissortariaqarpagut.

Inatsit allanngoraanni  sinneqartooruteqarnissamullu piffissaliussamik atuutsitsileraanni tamanna imermik nukissiuutinik mittarfinnillu sanaartornissamut ajornakusoornerulertitsinissaq aarlerinanngila?

- Missinngersuutinut malittarisassanik sukannernerusunik suliaqaraanni tamanna siunissami ajornakusuulersinnaasoq takusinnaavara. Inuiaqatigiilli aningaasaqarneranni sinneqartooruteqartarneq suliatsinnik tamanik qulangiisariaqarpoq. Taamaammat malittarisassat sukannersuunissaat pingaarput.

Aningaasaqarnermut naalakkersuisoq, Erik Jensen isornartorsiuinermut ilanngutassiami allami saqqummingajalersumi akissuteqarpoq.