Aningaasanut inatsit kiisami akuerineqartoq

Ukiakkut ataatsimiinnerup immikkoortua siulleq ullumi naammassivoq. Aappaagumullu aningaasanut inatsit kiisami akuerineqarpoq.

Allattoq Nicole Sander Bertelsen

novembarip 22-at 2024 17:11

Nutserisoq Nathan Kreutzmann

Aningaasanut inatsit kiisami akuerineqarpoq.

Nunatsinni meeqqat atuarfiisa pitsanngorsarnissaannut, arnat spiralilersorneqarsimasut taarsiivigineqarnissaannut aamma timersoqatigiiffiit aappagu aningaasaliiffigisassanut ilaassapput.

Aamma atuarukAningaasanut inatsissaq pillugu isumaqatigiissut atsiorneqartoq – illuatungiliuttut peqataanngitsut

- Siullermik partiit akisussaasuusut isumaqatigiissusiorneranni nersualaaqaakka, aningaasaqarnermut akileraartarnermullu naalakkersuisoq, Erik Jensen oqarpoq.

- Isumaqatigiissutigisagut ajunngitsorpassuupput, inatsimmillu ataatsimoorluta piviusunngortitseqatigiinnissatsinnut qilanaarpunga, Erik Jensen oqarpoq.

Aningaasat ima atorneqassapput

Meeqqat atuarfeqarnermut 2025-miit 2027-mut ukiumut 5 millionit koruuninik aningaasaliisoqassaaq.

Inerisaanermik siuarsaanissamut ilapittuutaasussanik, illunillu aallarnisaavissanik pilersitsinissanut ukiuni tulliuttuni pingasuni atorneqartussatut 13 millionit koruunit illikartinneqarput.

Peqqinnissaqarfimmut ukiuni tulliuttuni pingasuni ukiumut 8 millionit koruuninik aningaasaliissuteqarneruniarput. Erniartortut taakkulu ingiaqateqarsinnaalernissaat tamatumani ukkatarineqassapput. Aamma kigutinik narlorsaasarneq nunatsinni meeqqanut pisariaqartitsisunut tamanut sumi najugaqartuunerat apeqqutaatinnagu neqeroorutaassaaq.

Angajoqqaarsianut atugaannik akileraasusiinikkut pisariillisaanermut 3 millionit koruuninik aamma aningaasaliiniarput.

Timersorneq aningaasaliissuteqarfiginerpaaniagaannut ilaavoq. Tassa aningaasanut inatsisissaq pillugu isumaqatigiissut akuerineqassappat, timersornerup silarsuaani siuarsaanissamut 30 millionit koruuninik ukiuni tulliuttuni sisamani agguarlugit atugassanik aningaasaliiniarput.

1992-p kingorna spiralilerneqarsimasunut taarsiissutissanut atugassanik aningaasatigut sinaakkutissanut 4,5 millionit koruuninik aamma immikkoortitsipput.

Nunatta karsia sinneqartoorutikillissasoq

Aningaasanut inatsit naalakkersuisoqatigiit ´kisimik´ isumaqatigiissutigisaat politikerit maanna piviusunngortinniartussanngorpaat. Tassami Naleraq, Demokraatit aamma Atassut isumaqatigiissummi peqataanngillat.

Aningaasaliissutissat nunatta karsiata sinneqartoorutaanit aaneqassamaarnerat pissutigalugu inatsisissaq akisussaassuseqarpalaanngitsoq, taakku partiit pingasut siusinnerusukkut tunngavilersuipput.

Taannalu oqariartuut uterlugu Demokraatit siulittaasuat, Jens-Frederik Nielsen, naggataarutaasumik oqallinnermi oqaluttarfimmit oqarpoq.

Aamma atuaruk Naleraq: Aningaasanut inatsisissatut isumaqatigiissut nutaaq torinngilluinnarpoq

- Naalakkersuisut isumaqartuarsinnarput, akileraartarnermut aaqqissuusseqqiineq aningaasalersorneqarsinnaasoq nunatta karsiata sinneqartoorutaanik kisimik atuinikkut. Taamaaliortoqarsinnaagaluarpormi, ilumut qulakkeersimagaanni, killeqanngitsumik sinneqartoortuartoqartussaasoq. Taannaluuna neriuut, naalakkersuisut najummatserfigigaat.

- Tassanili oqartariaqarpunga, aningaasaqarneq pitsanngortarlunilu ajortittarmat. Taamaattumillu piffissaq takkukkumaarpoq, nunatta karsiani sinneqartoorujussuarunnaarnissaq. Taava qanoriliortoqassava?, Jens-Frederik Nielsen aperivoq.

Politikerillu oqaatigerusutaat tamarmik oqaatigineqareermata taasisoqarpoq, naatsorsuutigineqakannereersutullu inatsit akuerineqarpoq.

Taamaalilluni ukiakkut ataatsimiinnerup immikkoortua siulleq naammasivoq. Politikerillu ukiukkut ataatsimiinnissaat immikkut ittoq februaarip sisamaani aallartippat naapeqqissapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.