Kommune innarluutilimmut: Naammi kammalaatitit?

Kommune Kujalliup innarluutilinnut atugarititani pitsanngorsartariaqarai, innarluutillit illersuisuata nalunaarusiamini marlunngormat saqqummertumi uparuaatigai.
- Saaffiginnikkaangama ima akineqartarnikuuvunga "uagut akissaqanngilagut", 71-inik ukiulik Hans Lothsen Semsen oqarpoq. Assi © : Tilioq
decembarip 05-at 2019 11:42

Innarluutillit ilaata 71-inik ukiullip kaassuartakkanik atuisup kommunimut saaffiginnittaraluarneri kinguneqarneq ajortunut ilaapput.

- Ikioqqussummik saaffiginnikkaangama ilaanni ima aperitittarpunga "naammi kammalaatitit?", 71-inik ukiulik Hans Lothsen Semsen oqarpoq.

Taanna Nanortalimmiuuvoq 2014-imilu niaqqumigut ajoqusernermi kingorna pisussinnaajunnaarpoq, kaassuartakkanik atuisunngorluni.

Namminerisaminik affarleriiusumi majuartarfilimmi najugaqarami issiavini kaassuartakkat aninialernerit tamaasa tummeqqakkut nammineerluni ammukaattarpai. Tummeqqami naleqqussarneqarnissaat saaffiginnissutigisarsimagaluarpai:

- Saaffiginnikkaangama ima akineqartarnikuuvunga "uagut akissaqanngilagut".

Sapaatip akunneranut akunnerup affaa ikiorneqartartoq

Hans Lothsen Semsenip angerlarsimaffimmi ikiortinit sapaatip akunneranut akunnerit marluk ikiorneqartarsimavoq, siornali allannguisoqarmat ikiorneqartarnera nalunaaquttap akunerata affaannanngorpoq.

- Siornanngulerporli akunnerup affaannanngornikuugami. Asaassussisinnaasup soorunami annerusumik suliaqarsinnaanngilaq akunnerup affaannanngornikuummat., Hans Lothsen Semsen oqarpoq.

Kaassuartakkanik atuisut sullissinermik pitsaanerusinnaanera , Kommune Kujallermi borgmesterip, Kiista P. Isaksenip nassuerutigaa.

AAMMA ATUARUK Innarluutillit illersuisuat: Innarluutillit Kommune Kujallermi atugarliorput

Innarluutillit illersuisuata Kommune Kujallermi angalanerminit innarluutillit atugaat pitsanngorsarneqartariaqartut nalunaarusiami kaammattuutigai. Sulisussaaleq ikiortissaaleqinerlu ajornartorsiuterujussuussoq angalanermi paasineqarluni.

- Ataatsimut isigalugu tassani aaqqiissuteqartariarpugut. Assigiinngitsut aamma iluini, imaanngitsoq uani suliami ataatsimi kisimi, Kiista P. Isaksen oqarpoq.

Sulianut ataasiakkaanut tunngasumik oqaaseqarsinnaanani borgmesterip erseqqissaatigaa.

Tassalu Hans Lothsen Semsenip saaffiginnissutiminut akissaqannginnermik ilaatigut tunngavilersuutitalimmik akissutisiatut oqaluttuai aamma oqaaseqarfigiumanngilai.

Sulisussaaleqisoqarnera ajornartorsiutaasoq

Innarluutilinnut ikiuinermi nuna tamakkerlugu periaatsit allanngorsimasut taanna nassuiaavoq.

Tassalu ikiuinermi qanoq piginnaasaqartigineq maanna apeqqutaalersimavoq.

Borgmesterip nammattunik piginnaasalinnik sulisussaaleqineq innarluutilinnik sullissinermi aamma ajornartorsiutaasoq oqaatigaa.

Saaffiginnissutinut sukkanerusumik akissuteqartalernissaq borgmesterip neriorsuutigaa:

- Pisariillisaaneq, piaarnerusumik aaliangersaasinnaanermut aqqutit naannerusut. Tassa innuttaasut saaffiginninnerminni sukkanerusumik akissutissarsisalernissaat, Kiista P. Isaksen oqarpoq.