Nuummi pisiniarfimmi tillinniarneq misissuiffigineqartoq: Politiit takunnissimasunit ikioqqusut
Nuummi politiit Qinngorpumi Pisiffimmi tillinniartoqarsimaneranik unnukkut nalunaaqutaq arfineq-marluk qaangeraa tanneq sisamat missaanni kalerrinneqarput.
Tillinniap aningaasaasivik ammarniarsimagaluarpaa iluatsinnaguli. Taanna sulisumit paasineqarpoq qimaasimallunilu.
- Pisiniarfimmiilli anitinnani cigaritsit kartonit arlallit tillissimagai nalunaarutigineqarpoq, Jeppe Andsager, Kalaallit Nunaanni Politiit pigaartuisa pisortaat KNR-imut oqarpoq.
Angut inuusuttoq 14-it 16-illu akornanni ukiulik tillinniartuusoq Kalaallit Nunaanni Politiit oqaatigaat. Kalaallisut isikkulik, 160 aamma 170 centimeterit akornanni angissusilik.
Teqqialik qaqortoq qernertortalik atorsimavaa, qungasequtaasaq qasertoq qaamasoq, kavaajaq qernertoq, qarliillu timersuutit qasertut qernertunik titarnillit tillinniarnerup nalaani atorsimavai.
Filmiliuutit misissoqqissaarneqaleruttortut
Inuit tillinniartumik takunnissimasinnaasut politiinut saaffiginneqquneqartut, politiit pigaartuisa pisortaata Jeppe Andsagerip oqaatigaa.
Kalaallit Nunaanni Politiit Qinngorpumi Pisiffiup filmiliuutai misissoqqissaaleruttorpaat, tillinniartoq kinaassusersiniarneqarluni.
Tillinniartoqarneranut ilisimannittut Nuummi politiinut saaffiginneqquneqarput. Politiit oqarasuaataasa normoraat 70 14 48.
