Angut 62-inik ukiulik ukiukitsunik atornerluisimasutut piffissami killiligaanngitsumi paarineqartussanngortitaasoq
Angut 62-inik ukiulik meeqqanut arlaleriarluni kinguaassiornermut tunngasumik atornerluisimasutut piffissami killiligaanngitsumi pineqaatissillugu, Eqqartuussisoqarfik Qaasuitsoq juulimi aalajangiivoq.
Angutip pineqaatissinneqarnini eqqartuussisuuneqarfimmut ingerlateqqippaa, taamalu aalajangerneq Nunatta Eqqartuussisuuneqarfiata maanna atuuttussanngortippaa, angullu piffissami killiligaanngitsumi pineqaatissinneqarsimasunut inissiisarfimmiittussanngortinneqarpoq. Kalaallit Nunaanni Politiit tusagassiorfinnut tallimanngornermi ualikkut taama nalunaaruteqarput.
Angutip 2020-p 2022-llu akornanni atornerluinini pineqaatissinneqaatigai, taannalu meeqqamut atornerluisimasutut siornatigut pineqaatissineqareerpoq, angutillu tarnikkut napparsimaneranik misissuinermit oqaaseqaatit aallavigalugit, Nunatta Eqqartuussisuuneqarfia aalajangerpoq.
Allanut ulorianartoq
Qanorpiaq oqaaseqaateqartoqarsimanersoq politiit tusagassiorfinnut nalunaarumminni allanngilaat, politiilli sinnerlugit nunatta eqqartuusisuuneqarfiani unnerluussisussaatitaasoq, Alexander Stürup, ima oqarpoq:
- Eqqartuussisuuneqarfiup unnerluusisussaatitaasut naliliineratulli inerniliinera naammagisimaarluarpara, pineqaatissinneqartormi piffissami aalangersimasumi pineqaatissinneqareerluni iperagaassagaluaruni najugarisamini meeqqanut qanillisunut pinerloqqinnginnissaa qulakkeersinnaannginnatsigu.
Angutip piffissami killiligaanngitsumi paarineqarnissaanik pineqaatissiineq isumaqarpoq, angutip inunnut allanut ulorianarunnaarnera eqqartuussisup aatsaat nalilerpagu taanna misiligutaasumik iperagaasinnaavoq.
- Eqqartuussisuuneqarfiup piffissami killiligaanngitsumi aalajangiineratigut pineqaatissinneqartoq iperagaanissaminik neriuuteqaqqilissaguni nammineerluni pinerluttunik isumaginnittoqarfimmi tarnip pissusaannik ilisimasallit peqatigalugit iliuuseqassaaq. Tamannalu angutip najugarisaani innuttaasunut toqqissisaataassasoq neriuppunga, Alexander Stürup naggasiivoq.
