Nunatsinnut juullimi inuulluaqqusisarunnaarneq uissuummissutaasoq: Soorluli juullinngitsuulersoq!
DR ippassaq sisamanngornermi aalassatitsilaavippoq. Ukiorpassuarnimi aallakaatinneqartartoq ”Julehilsen til Grønland” unitsinneqarpoq. Taanna ukioq manna aallakaatinneqassanngilaq siunissamilu aallakaatinneqaqqissanani.
Aallakaatinneqartartup ullutsinnut tulluarunnaarsimanera juullinernerani inuulluaqquneqartarunnaarnitsinnut tunngavilersuutaavoq.
- Aallakaatitassiaq taanna qallunaat kalaallillu atassuteqaqatigiinnissamik ullutsinni attaveqaatitulli ittunik attaveqaatitigut periarfissakikkallarmata aallakkaatinneqartalerpoq, DR Kultur, Debat & Musikimi aaqqissuisuuneq Gustav Lützhøft taama tunngavilersuivoq.
Inuillu uissuummisimasut KNR-ip Facebookimi nutaarsiassanut quppernerani allataanni atuarneqarsinnaavoq:
- Inuit attaveqaatitigut qaninnerulissappata atassuteqaqatigiinnissaq pisariaqarpoq. ”Julehilsen til Grønland”-ilu ataqatigiinnermik pilersitseqataavoq, tallimanngornermi ullup-qeqqata missaani allattut 300-ngajaasut akornanni taama allattoqarpoq.
- Aallakaatitsinermi qanilaarnermik misiginerup saniatigut allat aamma takutinneqartartut maqaasinassaqaat.
Isumaqataasoqaalupporlu.
- Aaqqissuisoqarfiup taama aalajangernera nunatsinnik avissaarnerulersitsiinnartussaq uggornaqaaq. Maanga nuunissara sioqqutingaatsiarlugu Kalaallit Nunaannut juullimi inuulluaqqusineq isiginnaartarpara. Juullilerneranimi ileqquuvoq, alla allappoq.
Atsiornernik katersiniarneq
Naak videokkut immitsinnut sianerfigisinnaagaluartugut Snapchattikkullu assinik nassiussisinnaagaluartugut, taamaattoq tv-kkut aallakaatitsisarneq ukiuni 50-ini ileqquusoq anguneqarsinnaannginnguatsiarpoq.
- Aliatsannaqaaq. Kalaallit Nunaannut kusanartumut 2000-imili nooqqaarama inuulluaqqusisarneq isiginnaartuaannarpara, ”Guuterput” naggasiutigineqaraangat qullililaartuaannarpunga, Kalaallit Nunaammi asaqaara. Maniitsumi ukiuni sisamani aalajangersimasumik najugaqarnikuuvunga, sumiiffippaalunnilu peqqissaasutut paarlattaasarpunga.
- ”Julehilsen til Grønland”-ip aallakaatinneqaqqittalernissaa neriuutigaara, amerlaqisummi maqaasissaqaat, ataaseq allappoq.
- Ilumoorsinnaanngilaq. Soorluli juullinngitsuulersoq! ataaseq kamaammerpoq.
- Arlaat atsiornernik katersisinnaagaluarpoq, alla allappoq.
Naammagittaalliortoqallaqusineq
Allalli aamma iliuuseqapallapput.
- TAAMAATTOQASSANNGIMMAT DR-imut allallunga naammagittaalliuteqarpunga, kikkullu tamarmik DR-mut naammagittaalliuteqarnissaannik kaammattorpakka.
Tassa ‘Julehilsner til Grønland' aallakaatitseqqittussaajunnaaraluarlutik naalagaaffeqatigiinnermut tunngasunik aallakaatitsisaannassallutik allaallumi immaqa aallakaatitsinerusalissallutik, DR neriorsuivoq.
Tunngavilersuutigineqartorli naammagineqanngilaq.
- Taama juullimut inuulluaqqusisarneq Kalaallit Nunaata Danmarkillu ataqatigiinnerannut nukittorsaasarpoq kissalaamillu misigisitsisarluni. Taamaammat DR-ip aalajangiisartui tassuuna misigissutsinik nunallu marluk inuisa ataqatigiinnerannik pingaartitsivallaarsimanngillat. Ukiup ingerlanerani pisartoq pingaarutilik maqaasinassaaq. Maqaasinassaqaaq, Facebookimi taama allattoqarpoq.
”Julehilsen til Grønland” 1932-mi radiukkut siullerpaamik aallakaatinneqarpoq. Ukiunilu 50-ini inuulluaqqusisoqartareersorlu TV-kkut 1983-mi aallakaatitsisoqartalerpoq.
