Arktisk Festivalertoqalertoq: UFO-t, kakiornerit eqqumiitsuliallu sammisassanut ilaasut

Københavnimi Nordatlantens Bryggemi festivalertoqarnerani inuit 5000-t missaat alakkaassasut, festivalimik aaqqissuisut ilimagaat.

Allattoq Ann-Sophie Greve Møller

novembarip 01-at 2024 12:54

Qangaanerusoq ilisimasassarsiornernit immiussat takorusuppigit, Kujataani UFO-t tusarfigerusuppigit imaluunniit inuit kakiorneri uaajeernerlu paasisaqarfiginerorusuppigit?

Arktisk Festival Københavnimi Nordatlantens Bryggemi sisamassaanik aaqqissuunneqassaaq.Tamanna uani sapaatit-akunnerani pissaaq, takusarneqarsinnaasullu meeqqanut, inuusuttunut inersimasunullu soqutiginarluinnassapput.

- Issittoq soqutigineqartorujussuanngorsimasoq oqartarpugut. Silap pissusiata allangornerinnaa pineqanngilaq. Sorpassuimmi maanna soqutigineqartorujussuupput, tamannalu malinnaaffigaarput, taanna oqarpoq.

ARKTISK FESTIVALIMIK AAQQISSUISUT KIKKUUPPAT?

Ukuupput: Illu Atlantiku, Danmarkimi peqatigiiffik Det Grønlandske Selskab, angalatitsivik Arctic Friend, Københavns Universitetip Kalaallit Nunaat Issittorlu pillugit immikkoortortaa, Arktisk Institut, Polarbiblioteket, Savalimmut sinniisoqarfiat, nunatta sinniisoqarfia Islandillu aallartitaqarfia, aamma Visit Greenland taavalu Royal Greenland aningaasaliisuupput. Tamatuma sianiatigut Issittoq pillugu kattuffinneersorpaaluit Arktisk Festimvalimut alakkaasunut ilaasarput.

Københavnip qeqqani Kongelige Grønlandske Handels Pladsimi Arktisk Festivalertoqartarpoq. Kongelige Grønlandske Handels Plads Danmarkip aamma Atlantikup Avannaani nunat ukiuni kingullerni 200-ni attaveqatigiinnerannut qitiuvoq. Quersuatoqqat marluk, tassa Illu Atlantiku aamma Det Arktiske Hus tassaniipput.

Arktisk Festivalimut alakkaaneq akeqanngilaq.

Allisiguk

Kalaallit eqqumiitsuliaat ukioq manna festivalernissami takuneqarsinnaassasut, Kim Falck-Petersen oqarpoq.

Eqqumiitsuliortut maanna saqqumilaaqisut, Martin Brandt Hansen aamma Inuuteq Storch, oqaloqatigiittut ilaatigut tusarnaarneqarsinnaassapput.

- Nalitsinni eqqumiitsuliat ukkatarinissaat pingaarteqaarput, pissutigalugu eqqumiitsuliortut kingulliarsuit aamma inissaqartikkusukkatsigit. Imaanngilaq kalaallit inuusuit eqqumiitsuliortut ikiuunnissarput pisariaqartikkaat. Taakkumi nunani tamalaani ingerlalluartorujussuupput.

- Kalaallilli 2024-mi qanoq eqqumiitsulioriaaseqarnerat takutikkusullugu Arktisk Festivalimut peqataanissaannut periarfissiivugut, Kim Falck-Petersen oqarpoq.

Tuusintilikkuutaat takusaassangatinneqartut

Inuit 4000-t aaqqissuussinermi kingullermi Nordatlantens Bryggemut aqqusaarput. Taamalu amerlatigisut ukioq manna aamma alakkaatissasut, Kim Falck-Petersenip ilimagaa. Inuimmi takusaasartut ukiut tamaasa amerliartuinnartut, taanna oqarpoq.

Festivali ulluni marlunni ingerlasussaq assigiinngisitaartunik misigaqarfiussasoq, aaqqissuisut pingaartippaat.

Taammaattumik kalaallisut oqaatsinik ilinniartitsineq, ingerlaaqatigiinneq, saqqummiineq aamma aliikkusersuineq aaqqissuussat ilagissavaat.

- Arktisk Festivali kikkunnut tamanut tulluartuussasoq isumaliutinnaaraara. Tassa utoqqarnut, inersimasunut, inuusuttunut meeqqanullu, Kim Falck-Petersen oqarpoq.

Festivalimi pisussat uani takuneqarsinnaapput.

Nutaarsiassami kukkunermik nassaarsimaguit uunga allaffigineqarsinnaavugut.

Arktisk Festivalertoqalertoq: UFO-t, kakiornerit eqqumiitsuliallu sammisassanut ilaasut

ARKTISK FESTIVALIMIK AAQQISSUISUT KIKKUUPPAT?

Tuusintilikkuutaat takusaassangatinneqartut

Aamma atuaruk