Anaanaq erloqisoq: Meerara meeqqerivimmut tunniussinnaanngilara

Sisimiuni meeqqerivimmiititaqaruit, ulloq naallugu sulisinnaanissat ilimananngilaq.  

Helene L. Lennertip panini meeqqerivimmut eqqukkamiuk meeqqerivimmi sulisumit oqarfigineqarpoq, sulisussaaleqimmata angajoqqaanut sianertaqattaarlutik, qinnuigalugit qitornatik aasinnaagunikkit aaqqullugit immaqaluunniit aajaarneqarsinnaappata aajaaqqullugit. 

Helene oqarpoq, Sisimiuni meeqqerivinni sulisussat amigaatigineqartorujussuusut nalunngikkini, tamatunngali pissutaasoq paaserusutsappaa sulisussaqanngittarneq ukiuni arlaqaleqisuni ajornartorsiutaammat.

- Paasiuminaatsillugu sooq taamak ajornartiginersoq, uffa ukiorparpassuanngortut taamatut ajornartorsiut isikkoqartoq, suna aporfiunersoq alapernaaserfigeqqagiga, sunaana ajornartorsiutaasoq, oqarpoq nangillunilu:

- Kiisa meeqqagut aaqquneqartalerput, suligaluarluta kiisa uagut suliffipput qimattariaqartalerparput. Taamaasiorutta, suliffigut qimaqattaarlugit uagut qanoq aningaasarsiussagatta taava? Inuiaqatigiit qanoq taava ingerlassagamik?

Sulisussaaleqineq

Qeqqata kommunia tamaat isigalugu meeqqeriviit sulisussanik 77’inik amigaateqartut, kommunip meeqqeriveqarfiinut pisortaq Navarana Lennert-Andersen taama oqarpoq:

- Sisimiuni 64’it amigaatigineqarput, taanna oqarpoq. 

Meeqqerivinni sulisut amigaatigineqartillugit meeqqat angerlarsimatiinnarallartarnissaat angajoqqaat paaseqatigalugit aalajangertoqartassasoq, meeqqeriviit allaffianni pisortaq oqarpoq.

- Sillimaniarneq peqqutigalugu kommunalbestyrelsep aalajangernikuuaa maajimi periusissaq, sulisussaaleqinermi periusissaq, tassani allaqqaqqissaarpoq angajoqqaat suleqatigalugit allamik iliuusissaarutiivikkaanni, angajoqqaat suleqatiginerisigut angerlartitsisarneq pisinnaasoq, taanna oqarpoq. 

Taama aalajangertariaqarnermut peqqutaaqataavoq ukioq meeqqerivimmi Uiami imeerunnerata kingorna meeqqat pingasut dunkimeersunit imiunngitsumik imertorsimanerisa kingorna napparsimaviliaanneqartariaqarsimammata.

Helene L. Lennertip tusartaannarpaa perorsaasut aningaasarsiaat appasippallaarnerat sulisussaaleqisarnermut pissutaaqataasartoq, oqarlunili aningaasarsianik qaffaasoqassappat iliuusissaq ujartorneqartariaqartoq.

- Perorsaasut Kattuffiata akisussaaffik qanoq annertutigisoq paarivaa, qanoq sorsuussutigisussaavai, sunaana pisussaasoq, naluara qanoq annertutigisumik qaffaavigineqarnissaat pisariaqartoq, kisianni susoqartussaasornguna qanoq annertutigisumik perorsaasut aningaasarsiaasa qaffannissaat pillugu. Helene Lennert oqarpoq.