Alimasissumit atuartitsinissamut aningaasaliineq siunissami ineriartortitsinissamut qulakkeerisoq
![](/sites/default/files/styles/image_934x467/public/article_images/skoleelever_ilulissat_skal_til_dk.jpg?itok=V75yP8D4)
Nunatsinni kommunit tallimat nunami isorartuumi inuillu ikittut siammarterluarsimaneranni pitsaasumik atuartitsisoqarsinnaanissaanut ataatsimoorlutik suliassamik ukiuni kingullerni arfinilinni kivitsiniarsimapput.
Suliniut Kivitsisamik taaguuteqarpoq, taannalu danskit aningaasaateqarfiinit arlalinnit 15 millionit koruunint missaannik tapiissuteqarfigineqarpoq.
Aningaasat suliniutip ingerlateqqinneqarnissaanut atorneqassapput, tamatumalu saniatigut ineriartortinneqassalluni, Kivitsisap siulersuisuini siulittaasoq, Malene Broberg tusagassiuutinut nalunaarummi oqarpoq:
- Ukiut kingulliit arfinillit Kivitsisa suleqatigiillualernermut meeqqallu atuarfiisa pissanganartumik nutaamik sammiveqalernerinut sinaakkusiisuuvoq.
- Ataatsimoorussamik allaffeqarnermi nutaanillu aningaasaliiffigitinnikkut tunngavissinneqarluarpugut aaqqiinerit pilersitatta ineriartortiinnarnissaannut taakkulu aaqqissuussaanerup atuarfeqarnerullu iluaniitilernisaannut suliaqarsinnaalerluta. Ineriartortitsineq sivisusarpoq, nuannaarutigeqaarpullu aningaasaateqarfiit sisamaasut aallaqqaataaniillu suliniut tapersersorusummassuk tunngavissiilluaqataarusummatalu.
Alimasissumik atuartitsineq
Sammineqartoq Kivitsisa digitalikkut aaqqiissuteqarnikkut ilinniartitsineruvoq.
Nunami meeqqat atuarfii ima assigiinngitsigipput Igalikumi sisamanik atuartoqartoq Nuummi Atuarfik Inussummi 1.200-nik atuartoqarpoq, taamaammat naapeqatigiitsitsinissamut allatut iliortoqartariaqarpoq.
Atuarfimmi ilinniartitsisoqanngitsuni alimasissumik atuartitsinikkut atuartut ilinniartinneqarnissaat qulakkeerneqarsinnaavoq, atuarfinnilu mikisuni atuartukitsuni internetti aqqutigalugu atuartitsinikkut inuusuttut ukioqatitik imaluunniit soqutigisaqaqatigisatik nunatsinni sumiiffinni allaniittut suleqatigisinnaavaat.
Suliniulli atuartunuinnaq iluaqutissiinngilaq. Ilinniartitsisummi sulianut tunngatillugu aamma avitseqatigiissinnaapput, taamaalillutik atuartitsinissamik piareersaanerminni namminersuinnartariaqarunnaarlutik.
Atuartitsineq suli ineriartortinneqassasoq
Kivitsisa oqaatigineqartutut nunatsinni kommunit tamarmik akornanni ataatsimut suliniutitut aallartippoq.
Taakku suleqatigiinnerup ingerlaannarnissaa maanna aalajangerpaat. Tamannalu qulakkeerluarniarlugu kommunit allattoqarfimmik ataatsimut pilersitsipput, kommunillu ataatsimoorlutik ukiuni pingasuni ingerlanneqarnissaanut tunngavilerneqarnissaanut suliniuteqarput.
Danskillu aningaasaateqarfiinit 15 millionit koruunit tapiissutit suliniummut tassunga atorneqarlutik nutaaliornermut iluatsilluartumut aqqutissiuussinissamut ikiuutaassasut, Malene Broberg oqarpoq:
- Ineriartortitsineq sivisusarpoq, nuannaarutigeqaarpullu aningaasaateqarfiit sisamaasut aallaqqaataaniillu suliniut tapersersorusummassuk tunngavissiilluaqataarusummatalu.
- Suliniut nutaat aallartinnissaannut assut qilanaarpugut. Qularutiginngilluinnarparput atuartunut ilinniartitsisunullu ulluinnarnik ilikkarfiulluartunik kinguneqarumaartoq, Malene Broberg tusagassiuutinut nalunaarummi naggasiivoq.