IMAK: Maniitsumi ungasianiit atuartitsineq piviusorsiorneruvoq, piumasaqaatitaqarporli
Ungasianit atuartitsineq Maniitsup atuarfianut aaqqiissutaalluarsinnaavoq, kisianni tamanna ilinniartitsisussamut piumasaqaatitaqassaaq.
Nunatsinni ilinniartitsisut peqatigiiffiat IMAK Qeqqata Kommuniani kommunalbestyrelsip siunnersuuteqarnerata kingunerisaanik oqarpoq. Taakku Atuarfik Kilaaseeqqami ilinniartitsisussaaleqinermut ungasianiit atuartitsineq annikillisaataasinnaanersoq misissorniarpaat.
- Ungasianiit atuartitsinerup qanoq annertutigisumik atorniarneqarnera apeqqutaavoq. Arlalitsigut piviusorsiorpoq, ksiainni akisussaaffeqartumik suliarineqassaaq, IMAK-ip siulittaasua, Elna Heilmann oqarpoq.
Sumiiffinni allani iluatsilluartoq
Taassuma nunatsinni sumiiffinni allani ungasianiit atuartitsineq misilittagaqarfigineqarluartoq innersuussutigaa.
Taakkuli siulletut nunaqarfinni atuarfiupput mikisut ikittuinnarnik atuartortaqartut. Maniitsumi atuarfik 300-it sinnerlugit atuartoqarpoq, tamannalu ungasianiit atuartitsinissamut allaneerulaartunik piumasaqaatitaqassaaq.
- Atuarfik Kilaaseeqqami klassit tamarmik atuartorpassuaqarput. Taakkuni atuartitsisussat misilittagaqarluarnissaat pingaaruteqarpoq, Elna Heilmann oqarpoq, nangillunilu:
- Atuartitsinerit nalinginnaasut pilersinneqarneranni ataqatigiissaagassaq annertupput. Ungasianiit atuartitsisussat Qeqqata Kommuniatalu tamanna piareersimaffigissavaat. Aamma akissarsiaqartitsinermut, angajoqqaanik suleqateqarnermut ilinniartitsisoqatigiit suleqatigiinnerannut atatillugu, IMAK-ip siulittaasua oqarpoq.
Ilungersunartut arlallit atuarfimmut eqquisut
Ungasianiit atuartitsinissamut siunnersuut Naleqqamit kommunalbestyrelsimi ilaasortamit, Karl Lyberthimit kommunalbestyrelsip qaammatip siuliani immikkut ittumik ataatsimiinnermi siunnersuutigineqarpoq. Tamanna Maniitsumi ilinniartitsisunik atuarfinitsitsiniarnermut sulisoqaannarniarnermullu piffissami sivisuumi iluatsitsisoqannginnerata kingunerani siunnersuutigineqarpoq.
Maniitsumi ilinniartitsisut ikinnerpaamik aqqaneq-marluk maanna amigaatigineqarput. Tamatuma saniatigut Maniitsumi atuarfiup illutaata peqqinnissamut ulorianaateqarnera pissutigalugu atuarfik matoqqammat sumiiffinni assigiinngitsuni atuartitsisoqartarpoq. Atuarfik 2026-imi aatsaat ammaqqinnissasoq pilersaarutigineqarpoq.
Naalli ungasianiit internetti atorlugu atuartitsineq ilinniartitsisussaaleqinermut oqilisaataasinnaagaluartoq tamanna klassimi atuartitsiviusumi ”inersimasoqarluni” atuartitsisoqartarneranut taarsiutaasinnaanngitsoq Elna Heilmannip erseqqissaatigaa.
- Suli inummik piginnaasaqartumik klassimi atuartitsivimmiittoqartariaqarpoq. Tamatuma saniatigut ungasianiit atuartitsinermi ilinniartitsisup ilinniartitsisutut ilinniarsimanissaa ungasianiillu atuartitsinermik misilittagaqarnissaa aamma pisariaqarpoq, taanna erseqqissaavoq.
Tamatuma saniatigut ilinniartitsunut suli atuarfimmi sulisunut tapersiilluartoqarnissaa pisariaqarpoq.
- Ilinniartitsisut suli Atuarfik Kilaaseeqqamiittut suliffimminiiginnassappata, annertunerusumik artukkerneqassanngillat sapinngisamillu taperserneqassallutik. Ungasiaat atuartitsineq atuutilersinneqarpat taakku tusarnaarluarneqassapput.
