Trumpip tikinnera pillugu immikkut ilisimasalik: Immaqa tusaaqqusaarneq - ilumoorutassaavorli
Præsidentinngortussap Donald Trumpip ernera - Donald Trump Jr. – Nuummut tikinnissani pilersaarutigigaa ippassaq paasineqariasaarnerani, nunarsuaq tamakkerlugu tusagassiorfinni kaaviiaartutut tusarsaalerpoq.
Amerlasuunit amerikamiut Kalaallit Nunaannik piginnilerusunnerattut isigineqarpoq.
Donald Trumpip nunatsinni nuannareqqusaarnera qanoq pimoorutsigineqartariaqarnersoq apeqquterujussuuvoq.
Præsidentinngortussalli Donald Trumpip nunarput amerikamut ilumut ilanngutiterusuppaa?
Dansk Institut for Internationale Studierimi (DIIS) ilisimatusartuuneq Ulrik Pram Gad KNR-imit taama aperaarput.
- Tamanna suli ilisimanngilarput. Immaqa Donald Trumpilluunniit aamma nammineq ilisimanngilaa. Nunarput pillugu oqalunnermigut qisuariartoqangaatsiarnissaa takusinnaagaa ersarippoq. Taamaattumik suli tusartuassagunarparput, taanna oqarpoq nangillunilu:
- Atomimimmi sakkussiaatilimmik mafia-bosseqarnerput ilungersunarpoq. Taamaattumik nunarsuarmi tamarmi naalakkersuisut naalaartariaqarput. Taamaalilluni immini ilungersunartuuvoq.
Piginnaatitsissummik nassataqanngilaq
Amerlasoorpassuit Siumut siulittaasuata Erik Jensenip Donald Trump Jr. naapinniarlugu nunatsinnut tikinnersoq eqqoriarpaat, taassumami pisortatigoortumik decembari naalersoq qaaqqusissummik nassippaa.
Erik Jensenilli taamaannginnerarpaa.
Qaaqqusissummilli nassiussineq namminermi nalinginnaanngilluinnartoq, Ulrik Pram Gad ersarissaavoq.
- Politikerimi nunatsinneersoq amerikallu præsidentiata ernera naapikkunik pisortatigoortumik isumaqatigiissusiorsinnaanngillat.
- Tassami Erik Jensen Donald Trump Jr.-iluunniit tamatumunnga piginnaatitsissummik peqanngillat. Namminnermi isumaqatigiissusiorsimagaluarpataluunniit, tamanna pisortatigoortumik atuussinnaanngilaq.
Trumpip nunarput pigilerusuppaa?
Ulrik Pram Gadilli Trumpip tusagassiutinit nuannarineqarnerulernissani kisiat pillugu iliuuseqarnera ersarissaqqippaa:
- Ilaqutariit Trumpikkut amerikamiusut anguterpaluttutut nukittutut isigineqassagaanni, pingaartumik angutiniit, arnanik aammalumi nunanik “tigusiinnarlutik" oqallisaalersinaanertik ilisimalernikuuaat. Oqaluttuamullu tassunga Kalaallit Nunaat tulluartorujussuuvoq.
Trumpilli qaninngoorniarnera, taamaaliorpat taamaliunngikkaluarpalluunniit ilumooruttariaqarpoq.
Trumpimmi nunanik pisissalluni oqaluinnanngilaq. tiguinnarnissaanimmi siornatigut oqartareerpoq:
- Donald Trumpimi oqaluinnarnani nunanilli tigusisalerpat, taava Ruslandip nunanut sanilerisaminut pissusilersorneratut USA-p iligisaminut iliorfiani nunarsuarmioqataalissaagut, taanna taama oqarpoq nangillunilu:
- Oqaluuserisami ilai pivusunngortissappagit inatsisinik najoqqutaqarluni nunarsuarmi pissutsit sungiusimasavut oqaluttuaannanngorsimalersinnaapput.
