Trumpip ernera Nuummut tupaallannartumik tikeraalertoq

Trump Erik Jensenimit qaaqqusaasoq
Donald Trump Jr. ingiallortaalu Nuummi sulerinersut suli paasinarsinngilaq.
Taannali naalakkkersuisoqataasut Siumumut siulitaasuusorlu aamma aningasaqarnermut akileraartarnermullu naalakkersuisuusorlu, Erik Jensenilu, naapissasut KNR-imiit tusarfitta oqaluttuuppaatigut.
Erik Jensenip tusatsiagaq taanna KNR-imut uppernarsarumanngilaa.
Taassumali Siumumut siulittaasuusutut Trump Nuummut tikeraarsarpaa.
- USA-p præsidenteriligassaata Donald Trumpip nunatsinnut
soqutiginnilluni maannamut arlaleriarluni oqariartuuteqalersimanera aallaavigalugu ingeqatigiilluta ataatsimeeqatigiinnissamut assammik isaassivugut.
Oqaatigerusupparpullu Trump Kalaallit Nunaannut tikilluaqqusaammat uagullu aamma ornigunnissamut Siumumit piareersimagatta, Erik Jensen Siumup nittartagaatigut taama allappoq.
Tassalu Donald Trump Jr. Siumup siulittasuanik USA-p Kalaallit Nunaatalu attaveqatigiinnerat pillugu ataatsimeeqateqarniartoq pasitsannarsivoq.
Múte B. Egede Kungikkunnut pulaarnissani kinguartikkaa
Naalakkersuisut siulittaasuat, Múte B. Egede, tikeraartoqarneq pillugu oqaaseqanngilaq. KNR-ip taamaammat taassuma Donald Trump Jr. naapissaneraa imaluunniit taamaaliussannginersoq uppernarsarsinnaanngilaa.
Múte B. Egedelli Kunngi Frederimmut pingasunngornermi pulaarnissani kinguartikkaa, kunngikkormiut tusagassiorfinnut allapput.
Tamatumunnga suna peqqutaaanersoq paasinarsinngilaq.