Trump nunatsinni oqartussaasuunissaq pillugu allagaqaqqittoq

USA-p præsidentissaata Donald Trumpip juullimi ippassaq inuulluaqqussummini ilaatigut kalaallit toqqarlugit allaffigai.

- Aamma Kalaallit Nunaanni innuttaasunut, nuna USA-p isumannaatsuunissaaanut pisariaqartitatsinnut, USA-llu najuunnissaanik kissaateqartunut, uagullu taamaakkumaarpugut, Trump inuit internettikkut attaveqaqatigiittarfianni Truth Socialimi allappoq.

Trumpip Kalaallit Nunaannik oqartussaanissamut piginnittuunissamullu eqqarsaatini pillugit Truth Socialimi allannerminit ulluit marlussuit qaangiuttut juullimi inuulluaqqussutini saqqummiuppaa.

Trump sapaatiummat unnukkut ima allappoq:

- Nunarsuaq tamakkerlugu eqqissineqassappat, USA-p Kalaallit Nunaat oqartussaaffigisariaqarpaa, Trump attaveqaqatigiittarfiutimini Truth Socialimi allappoq.

USA-p oqartussaasuunissaa kissaatiginerlugu erseqqissumik oqaatiginngilaa. USA-p nunarput pisiariniarneraa pillugu aamma allanngilaq.

USA-p nunatsinnik Trumpip præsidentiuffiani siullermi pisiumanera 2019-imi aaqqiagiinngissuteqartitsivoq.

Pisinissamik siunnersuut danskit ministeriunerannit Mette Frederiksenimit taamani itigartinneqapallappoq. Oqallinneq isumaqanngilluinnartutut taamani taavaa.

Mette Frederiksenip oqaaseqaataa oqaaseqaatipalaarsuusoq Trump kingusinnerusukkut allappoq.

Tuniniagaalernavianngilagut

Ukiut tallimat sinnerlugit matuma siorna taamaattoqarpoq, Trumpillu nunarput maanna oqaluusereqqilerpaa.

Danmarkimut aallartitamik toqqaaneranut atatillugu taamaattoqarpoq.

Nunarput tuniniagaanngitsoq Naalakkersuisut siulittaasuat, Mùte B. Egede, Trump nunatsinnik piginnittuunissaq pillugu allareersoq oqarpoq.

- Inuiaat kalaallit Kalaallit Nunaat pigaat. Tuniniagaanngilagut aamma tuniniagaalernavianngilagut, Múte B. Egede allappoq.

- Nunarsuarmioqatitsinnilli suleqateqarnissamut niueqateqarnissamullu suli ammassaagut, pingaartumik nunat sanilerisavut eqqarsaatigalugit. Sunami tamarmi Danmarkikkooqqaarsinnaanngilaq, Naalakkersuisut siulittaasuat allappoq.

Trumpip oqaaseqaataa ministeriuneqarfimmit oqaaseqarfigiumaneqanngilaq. Taakkuli Naalakkersuisut siulittaasuata oqaaseqaataanut innersuussipput.

Aamma nunatsinnit Folketingimut ilaasortat marluk, Aaja Chemnitz Aki-Matilda Høegh-Damilu Trumpip pisiumaneranut itigartitsipput.

Taakkuli marluk USA-mik suleqateqarnerunissaq ammaffigalugu aamma oqarput.