Trumpip Kalaallit Nunaannut tunngasumut pinngitsaaliilluni sakkutuulersornissaq naaggaarusunngilaa
Panamap ikerasaa Kalaallit Nunaallu aqunniarnissaannut pinngitsaaliilluni sakkutuulersornissaq imaluunniit aningaasaqarnikkut pillaanermik iliuuseqarniannginneranik qulakkeerisinnaanersoq, Donald Trump Floridami Mar-a-Lagomi tusagassiortunik katersortitsinermi marlunngorneq ualigaa taama aperineqarpoq. Tamannali naaggaarusunngilaa.
- Naagga, tamatuminnga qulakkeerisinnaanngilanga. Aningaasaqarnikkut isumannaatsumik ingerlanissaq eqqarsaatigalugu pisariaqartippavut. Iliuuseqartariaqarunarpugut.
USA-p illersornissaanut Kalaallit Nunaat pingaaruteqarpoq, Trump oqarpoq.
- Nunarsuaq tamakkerlugu illersornissaq eqqarsaatigalugu Kalaallit Nunaat pisariaqartipparput. Tamanna ukiorpaalunni ilisimareerpara.
- Nunarsuup kiffaanngissuseqartup illersornissaa pivara.
Tamatuma saniatigut Danmark Kalaallit Nunaannut qanoq inatsisitigut akisussaassuseqartiginera apeqquserpaa. Kalaallit Nunaat amerikamiunit aqunneqarnissaa pillugu Danmarki suleqatiginnikkusunngippat nioqqutissanik Danmarkimeersunik akitsuusersuilernissaq sioorasaarutigaattaaq.
USA-p Kalaallit Nunaat aqulernissaa kissaatigigini, Trumpip oqaatigeernikuuaa.
Ernera Donald Trump Jr. Kalaallit Nunaannut marlunngornermi tikippoq.
