Ilinniartitsisut aappariit: Atuarfik oquttoq nalunngikkaluarutsigu nuussimanavianngikkaluarpugut

Aappariit Camilla aamma Simon Rud Nyholm-Søndertoft Atuarfik Kilaaseeqqami ilinniartitsisutut soraarniuteqartunut ilaapput. Kommunip ukiorpassuarni ajornartorsiut isiginngitsuusaaraa, taakku isumaqarput.

Allattoq Teitur Larsen

oktobarip 21-at 2023 11:21

Nutserisoq Hanne Petersen

Ilaqutariit Rud Nyholm-Søndertoftikkut pigisatik Danmarkimut nassiutereerpaat. Ilaqutariinnimi taakkunani angajoqqaat, Camilla aamma Simon, Maniitsumi Atuarfik Kilaaseeqqami ilinniartitsisutut soraarniuteqartunut ilaapput.

- Atuarfik peqqinnanngimmat utissaagut, Camilla Rud Nyholm-Søndertoft oqarpoq.

Taanna Atuarfik Kilaaseeqqami atuartunut angajullernut qallunaatoortitsisuullunilu tuluttoortitsisuuvoq.

- Suliffinneereeraangama peqqiillioqqajaasarlunga suliffinniissimatinnangalu taamaanneq ajorlunga maluginiarnikooqaara, taanna oqarpoq nangillunilu:

- Suliffinneereeraangama anillattoorlungalu niaqorluttarpunga. Siornatigorninngarnit napparsimakkajunnerulernikuuvunga.

Taassuma uia, Simon Rud Nyholm-Søndertoft, Atuarfik Kilaaseeqqami aamma ilinniartitsisooreerluni maajimi soraarpoq. Simon Qeqqata Kommuniani MISI-mi siunnersortitut maanna atorfeqarpoq.

- Atuarfiup klassiiniilluni sussaanngilaq. Atuarfimmi sulitillunga anersaartornera ajortittarmat puakka misissortinniarlugit nakorsiarnikuuvunga, Simon Rud Nyholm-Søndertoft oqarpoq.

Aappariit taakku meeqqatik marluk, nukarleq marlunnik ukiulik angajullerlu tallimanik ukiulik, Danmarkimut uteqatigissavaat. Uterunilli sumi najugaqassanerlutik sulissanerlutillu suli naluaat.

- Danmarkimi najugassarseqqaarnata soraarniuteqarpugut, Simon Rud Nyholm-Søndertoft oqarpoq.

SULIAQ NAATSUMIK:

2022-mi januaarimi suliffeqarfik eqqiaasartoq atuarfiup eqaarsaartarfiani, ilinniartitsisut inaanni ininilu allani oqummik nassaarput. Atuartut ilinniartitsisullu tamarik nuutsiterneqarput atuartitsisoqalerlunilu illoqarfiup katersortarfiani, nipilersornermik ilinniarfiani amma illoqarfimmii inini allani.
Septembarimi 2022-mi angajoqqaat, ilinnniartitsisut aamma atuartut arlallit piumasaqarput september 2022 Qeqqata Kommunia nutaamik atuarfiuliortitsissasoq aningaasaateqarfinnit aningaasalerneqartumik.
Decembarimi 2022-mi nutaamik atuarfiliornissamut kommunalbestyrelsi naagaarluni aalajangiivoq. Taarsiullugu kommunip atuarfik nutarterluinnartinniarppaa koruunit 71 milliuunit nalinginut. Nutarterineq 2026-mi naammassissasoq ilimagineqarpoq.
2023-mi aasaanerani kommunip suliffeqarfik atuarfiup nutarternissaanut eqqiarnissanulu imippaa. Saniatigut kommunip silaannarissarfiit inini atuartitsiviusuni ikkussortippai. Kommunip nalilerpaa atuarfimmi pissutsit atuartitsinerup nanginneqarnissaanut ajorunnaartut.
Aggustimi 2023-mi ukioq atuarfiusoq nutaaq aallartippoq, kommunillu nalilerpaa atuarfiup inai amerlanerit isumannanngitsut. Taamaattumik atuartut amerlanerpaat atuarfimmut ukiumi atuarfiusumi 2023-2024-mi uterput.
Aggustimi 2023-mi undervises 1. aamma 2. klassit suli atuarfiup avataani atuartinneqarput, init ilaat suli isumannaatsutut nalilerneqanngimmata. Atuarfiup paaqqinniffia aamma soraareerneri ornittagaq aamma atuarfiup avataaniipput.
Ukiumi atuarfiusumi niutaami ilinniartitsisut atuartullu atuarfimmi suli iluaagisaqartarput.
Septembarimi 2023-mi atuarfiu pisortaa Mina Maria Andersen ilinniartitsisunut nalunaarpoq atuarfiup illutaa oqummik nassaartoqaqqittoq. Massakkut atuarfiup igaani silammut sammisuni.
Oktobarimi 2023-mi atuarfiup pisortaqarfia aamma Qeqqata Kommunia ininik atuartitsiffiugallarsinnaasunik nutarterinerup naammassinissaata tungaanut atorneqartussanik

Allisiguk

Ilaqutariit taakku Atuarfik Kilaaseeqqap oqunneranik eqqugaasuni kisiartaaqqajanngillat.

Anaanarmi alla paniminik atuariartortitserusukkunnaarsimasoq, siusinnerusukkut oqaluttuaraarput. Ilinniartitsisorpaallu atuarfimmiinnissartik avaanngugalugu soraarniuteqarsimasut, siusinnerusukkut aamma oqaluttuaraarput.

tassami Atuarfik Kilaaseeqqami inerpaat oquttut, kommunip siorna misissuisitsinerani erserpoq. Taamaammat kommunip Atuarfik Kilaaseeraq aasaq nutartertillugulu eqqiartippaa, aamma ukioq atuarfiusoq 2023/2024-mi atuartitsiffiuleqqissinnaasutut nalilerpaa.

Atuarfilli oqummik nassaarfigineqaqqissimasoq, atuarfiup pisortaata Mina Maria Andersenip atuarfimmi tassani sulisut septembarimi nalunaarfigai. Taamaammat kommuni atuartut 360-it missaat sulisullu 50-it Atuarfik Kilaaseeqqap aasamut nutarterneqareernissaata tungaanut atuartitsiviugallartussanik ujartuileruttorpoq.

Atuartut ilinniartitsisullu sumut qaqugulu nuutsitaagallassanersut ilisimaneqanngilaq.

Ukiut pingasuusussaagaluit qaammatit 16-iinnaassasut

Camilla aamma Simon Rud Nyholm-Søndertoftikkut Danmarkimi ini attartugartik taamaateriarlugu, biilitik tuneriarlugit meeqqatillu Maniitsumut 2022-mi juulimi nuukkamik nunarput nuannarilertoqaat.

- Maaniinnerput nuannareqaarput. Meeqqavullu Maniitsumi pinngortitaq aamma inuit nuannareqaavut, Camilla Rud Nyholm-Søndertoft oqarpoq.

Taakku aamma atuartut suleqatitillu nuannaraat. Atuarfiulli oqunnera uterniarnerminnut peqqutituaraat.

- Atuartuutikka asaqaakka. Asarsuaarpakka. Qimattariaqartussanngornerat aliasuutigeqaara. Peqqissuserali eqqarsaatigalugu taamaaliortariaqarpunga, Camilla Rud Nyholm-Søndertoft oqarpoq.

Ilaqutariit taakku ukiuni pingasuni Maniitsumiilersaarsimagaluartut qaammatit 16-inngullarlugillu aallassapput.

- Atuarfiup oqunneranik Maniitsumut nuutsigata ilisimatinneqanngilagut. Nalunngikkaluarutsigu Maniitsumut nuussimanavianngikkunaraluarpugut, Camilla Rud Nyholm-Søndertoft oqarpoq.

Atuarfilli oquttoq 2022-mi januaarimi misissuinerminni paasigitsik, asaasut R&T-kkut nalunaarusiaminni allapput. Tassa atuarfik oquttoq Camilla aamma Simon Rud Nyholm-Søndertoftikkut Maniitsumut nuunnissaannut qaammatit arfinillit sioqqullugit paasineqarpoq.

- Kommunip tamatuminnga pinngitsoornani ilisimatissimasussaagaluarpaatigut. Atuarfik taama peqqinnanngitsigisoq takorloorsimanngisaannarpara, Simon Rud Nyholm-Søndertoft oqarpoq.

Kommunip innuttaasut ilaginnarai

Atuarfik Kilaaseeqqap peqqinnanngilluinnarnera Qeqqata Kommunianut arlaleriarlutik nalunaarutiginikuugitsik, Ilinniartitsisut Meeqqat Atuarfianneersut Kattuffiata (IMAK) siulittaasua Elna Heilmann oqarpoq. Iliuuseqarfigereeritsilli allatullu iliorfiginiarnagu kommuni akissummini allaannarsimasoq, Elna Heilmann aamma oqarpoq.

- Ilinniartitsisut sulisitsisorisaminnit ilaginnagaasutut misigisimapput. Tusaaneqanngillat, Elna Heilmann KNR-imut oqarpoq.

Atuarfik Kilaaseeqqami ilinniartitsisorpaat suliffitsik oqoqarneranik peqquteqartumik uippakajaalersimallutik anngussivigisimagaatik, taanna nassuiaavoq. Ilinniartitsisumillu soraartoqaraangat ilinniartitsisut allat sulerulunnerulersarput.

- Ilinniartitsisut ilaat sapaatit akunnerannut akunnerni 40-ni atuartitsisarput. Taakku sinerissami atuarfinnut allanut naleqqiukkaanni amerlaneroqaat. Atuarfimmilu allami aamma ilinniartitsisussaalatsisumi ilinniartitsisut sapaatit akunnerannut akunnerit 20-t 25-llu akornanni atuartitsisarput, Elna Heilmann oqarpoq.

Camilla Rud Nyholm-Søndertoftip pissutsit Elna Heilmannip taasai ilisareqai.

- Takorlooriassagissimi ilinniartitsisuusugut illumi ataatsimi oqimaaqatigiissaarisariaqapiloortugut. Ilinniartitsisumik soraartoqaraangat ilinniartitsisut allat ajalusoornaveerniapiluulersarput, taanna oqarpoq nangillunilu:

- Simonilu oqaannarsinnaavugut naammagiliilluta Danmarkimut utilersugut. Atuarfik Kilaaseeqqamili ilinniartitsisut ilarpassui Maniitsormiuupput illoqarfitsillu qimannissaa takorloorsinnaanngilaat. Angerlarsimaffigivaammi.

Kommuni akisussaaffimminik sumiginnaasoq, ilinniartitsisut aappariit taakku Elna Heilmannilu isumaqarput.

Kommunip atuarfik navianartuunngissorigaa

Atuarfik Kilaaseeraq najussallugu peqqinnanngeqisoq, angajoqqaarpaat, ilinniartitsisorpaat aamma IMAK isumaqarput. Taamaakkaluartoq nammineq piffissami kingullermi Atuarfik Kilaaseeqqamiitilluni nammineerluni immikkut maluginiaqartarsimanani, Qeqqata Kommuniata atuarfeqarnermut ataatsimiititaliataata siulittaasua Siumumeersoq Evelyn Mølgaard oqarpoq.

- Immikkut maluginiagaqanngilanga nammineerlunga.

Angajoqaat meeqqatik Atuarfik Kilaseeqqamut ullumi atuariartortissinnavaat, napparsimalissanngitsut qularatik?

- Soorunami angajoqqaat toqqissillutik atuariartortitsisinnaanerat sulisutta aamma teknikeritta ataavartumik misissuinerasigut ingerlanneqarput, taakkualu qulakkeerneqarput, soorlu kingullermik aggustip 22-ani misissuisoqarpoq nalunaarusiortoqarlunilu. Taakkunanilu inini pineqarsimasuni februaarimi nalunaarusiaminngaanniik pineqarsimasuni oqummik silaannarmi nassaarfiunngitsutut nalunaarummi ersipput.

Taava imatut paasilllugu - qularatik atuariartortissinnaavaat, aat?

- Tassa uagut politikeritut sinaakkutit pitsaasuunissaat qulaakkeerniartarparput aammalu sulisutta malussarpata ingerlaannaq ataavartumik misissuisitsineq ingerlappaat, taakkualu misissuisitsinerit aallaavigalugit atuariartortitsisinnaaneq ingerlanneqarsinnaavoq.

Atuarfik Kilaaseeqqami atuartut sulisullu atuarfimmi napparsimalernartumiinnginnissaannut kikkut akisussaasuuppat?

- Tassa kommunalbestyrelse akisussaanerpaajuvoq qullerpaatut. Taanna qulakkeerinnittussaavoq pitsaasunik atugassaqartitsinissami. Atuarfik Kilaaseeqqamut tunngatillugu ataavartumik misissuinerit ataatsimiinnerillu ingerlanneqarput atuarfiup nutartertussaareerneqarnerata kingunerisaanik aamma atuartut sumut inissinneqarnissaat qulakkeerniarlugu.

Atuartut ilinniartitsisullu atuartitsiviugallartuusussanut maanna nuutsilerpasi. Nalunngilisiuk sumiissanersut?

- Tassa massakkut allattoqarfiit aaqqiissutissanik ujartuillutik sulinertik ingerlatileruttorpaat. Neriuppugut sapaatit akunnerata tulliani oqaatigisinnaajumaarlugu aaqqiinerit qanoq isikkoqassanersut, Evelyn Mølgaard KNR-imut oqarpoq.

Kommunip atuarfimmik navianartuunngissorinninnera, Camilla aamma Simon Rud Nyholm-Søndertoftikkut paasisinnaanngilluinnarpaat. Ilinniartitsisullu aappariit taakku tassa Danmarkimut uterunik sumi najugaqassanerlutik sulilissanerlutillu paasiniagassaanni tulliuppoq.

- Danmarkimi ilaquttatta ilaanni innisimagallaqqaassaagut, Camilla Rud Nyholm-Søndertoft oqarpoq.

Taanna Atuarfik Kilaaseeqqami oktobarip ulluisa 31-anni suliunnaassaaq.