Maniitsumi angajoqqaat: Nutaamik atuarfittaarusuppugut
![](/sites/default/files/styles/image_934x467/public/article_images/dsc08918.jpg?itok=7VKPECWl)
Maniitsumi meeqqat atuarfiat Atuarfik Kilaaseeraq oqummik eqqugaammat init atuartitsiviusut arlallit atorneqarsinnaajunnaarput.
Aamma sialleraangat atuarfiup qilaavata ilaa kusertarpoq, erngullu igalaat iikkallu ilaat ussiillisimasut qillaartarpai.
Suliffeqarfik immikkut eqqiaanermik suliaqarfiusoq R&T, Maniitsumi Atuarfik Kilaaseeqqap oqoqassusianik maajimi misissuivoq.
Tassani paasinarsivoq atuarfiup toqqaviata ilaa naqqup ataa, oqoqarlunilu isugutattoq.
Taamaammat eqaarsaartarfik, ilinniartitsisut inaat, init atuartitsiviusut ilaat oqummik eqqugaasut, sialleraangallu igalaat ilaat, atuarfiullu qaliata ilaa ussiitsuullutillu qillaartartut.
Init atuartitsiviusartut arfinillit biologeertarfillu maanna matoqqatinneqarput.
- Atuartut atuarfimmi inini allani paaqqinniffimmilu maanna atuartinneqartartut, paaqqinniffillu atuarfiup avataanut allamut nuukkallarneqartariaqarsimasoq, Atuarfik Kilaaseeqqami pisortaagallartoq Mina Marie Andersen oqarpoq.
Angajoqqaat siunnersuisoqatigiivi: nutaamik atuarfiliortoqarli
Atuarfiup oqoqarneranik paasitinneqareerlutik angajoqqaat atuartuutillit angajoqqaanut siunnersuisoqatigiiliorput.
Taakkua nutaamik atuarfiliortoqarnissaa anguniaraat, ilaasortaq Elisebeth Larsen oqarpoq:
-Tamarmi misissorneqannginnami, tamarmilu misissorneqanngikkuni meeqqanut peqqinnanngilluinnartoq, meeqqatta peqqissusaat allaat akigisutullusooq inissisimammat akuerisinnaannginnatsigu pingasunngorpat atsiornernik katersissaagut. Taakkua naammassereeriarpata kommunalbestyrelsip ataatsimiinnissaanut ingerlateqqinniarpagut.
Kilaaseeqqap Atuarfianik ukioq manna, aappaagu 2023-mi aappaagualugu 2024-imi iluarsartuussinissamut katillugit 41,2 millionit koruunit aningaasaliissutaasut Qeqqata kommuniata ukioq manna 2022-mut missingersuutaani atuarneqarsinnaavoq.
Aningaasat iluarsartuussinermut atornagit nutaamilli atuarfiliornermut atortariaqartut Maniitsumi angajoqqaat piumasaqarput. Birthe Mathiesen, angajoqqaat siunnersuisoqatigiiffianeersoq ima tunngavilersuivoq:
- Piumasarput unaavoq - atuarfik nutaamik taarserneqassasoq, pissutigalugu tassani paassissutissani ersippoq - atuarfik sissamut qanittuararsuuvoq ulittarneranilu kælderi anguneqartarpoq. Taamaalilluni aqussinnaanngisamik silaannaq peqqinnanngitsoq aamma pilersinneqatarpoq.
Maniitsumi atuartuutillit siunnersuisoqatigiivi allapputtaaq, aningaasat iluarsartuussinermut atornagit nutaamilli atuarfiliornermut atorneqartuuppata, taava aningaasartuutissat sinneri avataanit aningaasaliisussarsiornikkut matussuserneqarsinnaagaluartut.