Kommune Kujallermi iPadsit atorlugit atuartitsineq aallartilluartoq

Allattarfissuup saanit atuartitsineq ulluinnarni nalinginnaasuusoq iPadit saanni atuartitsinermik ilalerneqarpoq.

Tamanna Kommune Kujallermi nunaqarfinni atuartut ungasianiit atuartinneqartarnerini atorneqarpoq.

Atuartitsineq internettikkut attaveqaatit atorlugit ingerlanneqartarpoq, tamannalu 2022-mi aallartikkamili iluatsilluartumik ingerlasimavoq.

- Atuartut taama atuartinneqarnertik nuannarisorujussuuaat. Marlunngornermut tallimanngornermullu pilerisarput, tassa teamsikkut isigiutigalugit atuartittarakkit, Lillian Møller kommunimi internetti atorlugu atuartitsisut marluk aappaat oqarpoq.

Lillian Møllerip nunaqarfimmi ilinniartitsisuusup tamanna aamma nuannaarutigigaa malugineqarsinnaalluarpoq.

- Uanga taama atuartitsisarninnut iluaqutigivara nammineerlunga nunaqarfinni atuarfinni sulisuugama. Nunaqarfimmi atuarfik illoqarfimmilu atuarfik assigiinngitsorujussuugamik. Taamaasilluni uanga suliffigisimasanni nunaqarfimmiut allat nalunnginnakku qanoq atuagaqartut, taanna oqarpoq.

Pilersaarut-Kivitsisa

Pilersaarut-Kivitsisa nunatsinni avataaniit atuartitsinermut aallarniutaavoq. Taanna nunatsinni nunaqarfinni ilinniartitsisussaaleqiffiusuni atuartitsinerup pitsaassusaannut pitsaanerulersitsinissamik siunertaqarpoq.

Nunatsinni meeqqat atuarfianni atuartut iPadimik tunineqarput, ilinniartitsullu nunaqarfinneereersut iPad aqqutigalugu taperserneqassallutik.  

- Fjernundervisningimi qallunaatut tuluttullu kisitsinermilu aallartissutigivagut, taavalu ukioq manna fysikki uumaatsulerineq ilanngullugu ungasianiit atuartitsinermi atuartitsissutigineqarput. Taava taakkua atuartitsissutit ingerlappagut peqqutigalugu nunaqarfinni timelærerit atuartitsissutini taakkunani piginnaasaat killineqarneri atuartup ilikkagassaannut sunniuteqartussaannginnamik, Kommune Kujallermi atuarfimmi siunnersorti, Avijâja K. Simonsen oqarpoq.

Suleqatigiinnerlu pingaaruteqarluinnarpoq. Atuartut, ilinniartitsisut ungasianiillu atuartitsisut pitsaanerpaamik angusaqarnissamut suleqatigiittussaapput.

Taamaammat internetti aqqutigalugu atuartitsisoqarnerani atuartitsiviusuni aamma ilinniartitsisoqartarpoq. Tamatumalu ajornartorsiuteqartoqaraangat atuartunut ikiuisussaqarneranik aamma iluaqutissartaqarpoq.

- Nunaqarfinni piffinni assigiinngitsuni attaveqaatit ajorsinnaasaramik, taamaakkaluartorluunniit ungasianiit atuartitsisartut nunaqarfimmut attaviluttumut nunaqarfimmut attaviluttumut mailikkut nassiussisarput atuartut suliassaannik, Avijâja K. Simonsen oqarpoq.

Internettikkut aqqutit ajoraangata suliassat atuartitsivinni ilinniartitsunut mailikkut nassiunneqartarput, taakkulu atuartunut agguaanneqartarlutik.

Attaveqaatit nutaat

Lillian Møllerip aamma Avijâja K. Simonsenip atuartut imminnut atassuteqarfiginissaata pingaassusaa oqaatigaat. Nunaqarfinni assigiinngitsuniikkaanni ajornakusoorsinnaasarpoq.

Taamaammat kommuni atuartut naapiffigisinnaasaannik lejrskolertitsinissaq aalajangerpaa. Tamannalu Lillian Møllerimut immikkut sunniuteqarpoq.

- Atuartut ugguuna isiginnaarutikkut atuartiinnaavinnikuullugit, aamma pingaaruteqarsimavoq atuartut naapinnissaat. Taava atuartunut aamma pingaaruteqarami qanimut takunissaat, ataatsip allaat attorlunga uummatiga tusaanerarlugu, Lillian Møller oqarpoq.

Kommune Kujallermi Aappilattumi, Narsarmijini, Tasiusami, Ammassivimmi Eqalugaarsunnilu atuartut katillugit 26-t internetti aqqutigalugu atuartinneqartarput.