ICC-ip siuttut tulliuttut pilersikkusuppai

Aqutsisinnaanermik tigusisinnaaneq siunissamillu nukittuneruffiusumik pilersitsiniarluni malitseqartitsinikkut, toqqaannartumik qarasaasiakkut ilinniartitsinikkut attaveqaqatigiinnermillu pilersitsinikkut suliniutip nutaap inuusuttut piukkunnarsassavai.

Allattoq Hanna Vestergaard Hviid

oktobarip 30-at 2024 11:17

Issittumilu attaveqarneq pitsanngorsaaqataaffiginiarlugu aamma Kalaallit Nunanni nunanilu tamalaani sulinermi siuttussatut inuusuttut piukkunnarsarniarlugit suliniut nutaaq ICC-iip arfininngormat saqqummiuppaa.

Inuit Inuusutaannik Peqataatitsinermik Suliniutip siunertaraa naggueqatigiit Inuit akornanni siuttussatut tulliuttut piukkunnarsassallugit. Tusagassiuutinut nalunaarummi ICC allappoq.

Suliniummi Inuit inuusuttusaasa sumiiffinnit assigiinngitsunit pisut suleqatigiinnissaat pingaartinneqarpoq, sumiissuseq apeqqutaatinnagu ilinniaqatigiinnissaq qaffassarniarneqarluni ICC-ip siulittaasua Sara Olsvig oqaluttuarpoq:

-Suliniummi matumani siuttussat ataasiakkaat ineriartornissaat kisimi pineqanngilaq, inuusuttulli piginnaanngorsarsimasut najukkaminnik siuarsaaqataanissamut piareersimalersimasut akunnerminni attaveqatigiilernissaat aamma siunertaalluni.

Malitassanut tulluariissaaneq

Suliniutip 2024-imi aallartittup nassaarissavai inuusuttut 21-niit 35-inut ukiullit. Tamassuma kingorna peqataasut toqqannartumik qarasaasiakkut ilinniartitsinermut, workshopinut isumasioqatigiinnernullu pqataassapput.

Iliuutsit peqataasut assigiinngitsorpasuartigut piginnaaneeqalersissavaat taamaanneranili aamma naggueqatigiit Inuit pillugit ilisimasaat pitsanngorsasssallugit.

ICC-mi attaveqarfinnik siuttutut misilittagaqarluartunit peqataasut tamarmik tulluussannik maligassaqartinneqasapput. Ilinniarnerullu ingerlanerani taakku siunnersuissapput tapersersuillutillu.

Suliniutip siunertaa:

Peqataatitsilluarnikkut suliniummi anguniagaq tassaavoq:

• ICC-p qanoq suleriaaseqarnera nunarsuarmioqatigiinnilu sunniuteqarnera pillugu peqataasut paasisimasaqarnerulersissallugit.

• Peqataasut ingerlatsinermi sammiviit isummanillu tapersersuinerit najukkatsinnut sunniuteqartut pillugit oqallinnermut peqataalluarsinnaanngortissallugit.

• Peqataasut pitsaasumik attaveqarfissaqalersissallugit, Issittumi suleqatigiinnermut nukittorsaataasumik attaveqatigiinnik pilersitsiviusumik.

Tunngavigisaq : INUIT CIRCUMPOLAR COUNCIL

Qinnuteqarnissamut kajumissaaru:

Inuit inuusuttaat piumassusillit nunaqqatiminut kimilimmik sunniuteqarumasut periarfissamut pitsassuarmut matumunnga qinnuteqaqqullugit ICC-mit kajumissaarneqarput.

Qinnuteqarfissaq maanna ammarpoq oktobarillu 31-iata tungaanut, 2024, ingerlassalluni.

Suliniut pillugu sukumiinerusumik paasisaqarumaguit qinnuteqarniaruillu una tooruk

Nutaarsiassami kukkunermik nassaarsimaguit uunga allaffigineqarsinnaavugut.