Siulittaasoq utoqqatsereersoq ataatsimiititaliami suli naammaginninngitsut

Aningaasaqarnermut Akileraartarnermullu Ataatsimiititaliami ilaasortat sapaatip-akunninngulersumi oqaaseqaateqarniarsaripput. Siulittaasup oqaaseqarsimanini utoqqatsissutigalugu marlunngornermi nalunaaruteqarpoq. Tamannali ilaasortat arlallit pakatsissutigeqaat, tunuarnissaalu kissaatigalugu.

Allattoq Kim Hinrichsen, Nicole Sander Bertelsen

oktobarip 31-at 2024 07:32

Kujataani takornarianik sullissisut ikiorserneqarnissaannut qinnuteqaat sapaatit-akunneri marlunngulersut matuma siorna itigartitsissutigineqarpoq, itigartitsinerlu pillugu Aningaasaqarnermut Akileraartarnermullu Ataatsimiititaliami siulittaasup Peter Olsenip oqaaseqarnini utoqqatsissutigalugu, tusagassiorfinnut marlunngornermi ualikkut nalunaaruteqarpoq.

Taassuma oqaaseqarnini paatsuunganarsinnaammat utoqqatsissutigaa.

Peter Olsenimi apersorneqarnermini Kujataani aalisartut piniartullu ilanngullugit qinnuteqaammik itigartitsisoqarnerani ikiorserneqassannginneranik oqaaseqarpoq – tamannali ilumuunngilaq, pineqartummi naalakkersuisoqarfimmi allami oqartussaaffigineqarput.

Aamma atuaruk Ikiorsiissutit: Ataatsimiititaliap siulittaasuata oqaaseqarnini utoqqatsissutigigaa

Ataatsimiititaliami ilaasortat sapaatip-akunnerata ingerlanerani ataatsimiittaqattaaleruttortut siulittaasoq utoqqatsissuteqarpoq, KNR-illu paasisai aallaavigalugit ataatsimiititaliami ilaasortat namminneq oqaaseqaammik nassiussaqarnissartik kissaatigigaluarpaat.

Ataatsimiititaliami ilaasortat Peter Olsenip paasissutissiineri eqqunngitsut naqqiissuteqarfiginiarlugit, aammali ataatsimiititaliami ataatsimiinnermi matoqqasumi qanoq taasisoqarsimaneranik oqaaseqarnera isornartorsiorniarlugu nalunaaruteqarniaraluarput.

Peter Olsenili atsioqqaartinnagu nalunaaruteqarsinnaanngillat, taannami ataatsimiititaliami siulittaasuuvoq.

Utoqqatserneq naammanngitsoq

Taamaattumillu ilaasortat utoqqatsernerup aqaguni KNR-ip oqaloqatigisai naammaginninngilluinnarput. Ilaatigut Demokraatit siulittaasuat Jens-Frederik Nielsen:

- Naqqiissuteqarusunnerigaluarput nassiunneqanngitsoorpoq. Siulittaasoq akisussaassuseqanngitsorujussuarmik pissusilersortoq isumaqarpunga. Tusagassiorfitsigullu utoqqatserneq naammanngilaq, Jens-Frederik Nielsen oqarpoq.

Aamma atuaruk Naaja Nathanielsen namminersortut ikiorserneqannginnerannut: Naalakkersuisoqatigiit ataatsimoorsorigaluarpakka

Ataatsimiititaliamittaaq ilaasortat sinnerisa isumaannut naapertuutinngitsumik tusagassiorfinnut nalunaaruteqartoqarnera, Naleqqap siuliuttaasuata Pele Brobergip naamagittaalliutigaa:

- Pisoq partiip taassumalu inuup pissaaneqarusunnerujussuinik ersersitsivoq. Taama amerlanerussuteqarnermik atornerluilluni eqqunngitsumik nalunaaruteqarneq akuerinngilara.

Ataatsimiititaliamilu ataatsimiinnermi matoqqasumi taasinerit pillugit Peter Olsenip utoqqatsinnginnera, Pele Brobergimut tuallaataanngilaq:

- Oqaaseqarnigut isummernigullu naalakkersuisoqatigiit akornanni pissaaneqarniutaasut takusinnaavarput. Taamaammat ataatsimiititaliami siunissami sulineq unneqqariffiunanilu toqqaannartumik periuseqarfiusinnaanngilaq.

SIULITTAASOQ NIPAARLUK

Ikiorsiissutit oqallisaangaatsiarnerat naalakkersuisoqatigiit siornatigutulli patajaatigiunnaarnerannik ersersitsivoq.

KNR-ip Múte B. Egede apersorniarlugu oktobarip 23-anili attaveqarfigisaraluarpaa – taannami naalakkersuisunut naalakkersuisoqatigiillu suleqatigiinnerannut akisussaasuunerpaavoq.

Imalu ilaatigut apererusukkaluarparput:

Ikiorsiissutit pillugit naalakkersuisut isumaqatigiinnerannik Naaja Nathanielsenip paasinninneratuulli isumaqarnersoq?

Naalakkersuisut neriorsuutaat siunissami tatigineqarsinnaanersut?

Naalakkersuisoqatigiit suli ataatsimoortutut paasineqassanersut?

Una suliaq suleqatigeeqqinnissamut qanoq isumaqassanersoq?

Akineqarnissatsinnulli sapaatip-akunnera utaqqereertugullu, siulittaasup allatsini aqqutigalugu naatsumik ima akivoq:

”Naalakkersuisut siulittaasuat Naalakkersuisoq Naaja Nathanielsenip oqaasiinut kingullernut innersuusivoq allamillu ilassutissaqarani.”

Siulittaasuujunnaartariaqartoq

Naammagittaalliortoqaraluartorli pisut maannamuugallartoq noqqillaamigallarpasipput, naalakkersuisoqatigiillu tuallaqqikkallarput amerlanerussuteqarnertillu iluaqutigaat.

Kikkulli tamarmik Peter Olsenimut suli tatiginnileqqajanngillat:

- Pisumi ataatsimiititaliap siulittaasuata sallunera oqaaseqaatinillu allanngortitsinera aamma isumaqatigiinniarnerni pinngitsunik ilanngussuinera ajorluinnarpoq. Siulittaasutut tunuartariaqarnera pissusissamisuussaaq, Pele Broberg isumaqarpoq.

Peter Olsenilu qanorluuniit ilioraluarpat, Jens-Frederik Nielsenip maanna tatigileqqikkallarnavianngilaa:

- Suliami eqqartukkanik paasinaatsuliornera peqqissaarnanilu pinera pissutigalugit siunissami allatut pissusilersornissaa neriuutigiinnarsinnaannginnakku tatiginngilara.

- Piitap utoqqatsernera ataatsimiititaliami pisunik aaqqiissutaanngilaq. Taamaammat akisussaaffik tigullugu siulittaasutut tunuassasoq isumaqarpunga.

Suliaq piariivinngitsoq naammasisoq

Suliap naammassilerunarnera illuatungiliuttut uggorigaluarlugu, pisoq tusaatissatut tiguaat sulinertillu ingerlateqqinniarpaat:

- Naalakkersuisoqatigiit amerlanerussuteqangaatsiarput – aamma ataatsimiititaliani. Siulittaasumilli inatsisinik ilisimasaqanngitsumik ileqqorissaarnissamullu aalajangersakkanik paasisimasaqanngitsumik tatiginnissinnaannginnera erseqqissartariaqarpara, Jens-Frederik Nielsen oqarpoq.

Naleqqameersullu Pele Brobergip suliaq iliuuseqarfigeqqinniarnagu aamma oqarpoq:

- Kia siulittaasuunissaa naalakkersuisoqatigiinni amerlanerussuteqartut aalajangertarpaat. Eqqortumilli iliorniarlutik oqarpata upperisussaanagit ilinniutigaara. Suup eqqortuunera taakku namminneq paasissavaat.

- Politikkernermilu ileqqorissartoqartuaannannginneranik paasisaqarnera nassuerutigisariaqarpara, Pele Broberg naggasiivoq.

Suliaq tamaat Peter Olsenimut itisilertikkusullugu KNR-imiit attaviginiarsaraarput.

Nutaarsiassami kukkunermik nassaarsimaguit uunga allaffigineqarsinnaavugut.