Ikiorsiissutit: Ataatsimiititaliap siulittaasuata oqaaseqarnini utoqqatsissutigigaa

Kujataani takornariaqarnermik suliallit ikiorserneqarnissaannut qinnuteqaat oktobarip 18-ianili itigartitsissutigineqarmat oqallisaaqaaq.

Siulittaasup Peter Olsenip itigartitsineq pillugu oqaaseqarnera, Aningaasaqarnermut Akileraartarnermullu Ataatsimiititaliami ilaasortat isornartorsiuisut KNR-ip siusinnerusukkut allaaserisareerpaa.  

Kujataani takornarialerisut ikiorserneqarnissaannut qinnuteqaat Aningaasaqarnermut Akileraartarnermullu Ataatsimiititaliamit itigartitsissutigineqartoq, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik tusagassiuutinut nalunaaruteqarpoq, kingunitsianngualu Peter Olsen KNR-imut ima oqaaseqarpoq:

- IA-miit uagut qinnuteqaat akuererusukkaluarparput, aalisartunut, piniartunut takornarialeriusunullu kingunerusussat ernummatigigatsigit, Peter Olsen ilisimatitsivoq.

Siulittaasoq ajuusaartoq

Taama oqaaseqarsimaneq aalassatitsivoq. Pisorlu sivisuumik oqallisareersorlu, siulittaasoq utoqqatserluni tusagassiorfinnut nalunaaruteqarpoq.

- Ajuusaarutigaara ataatsimiititaliami siulittaasutut suliap inernilerneqarnerani paatsuunganartumik oqaaseqarsimagama, tassalu aalisartut piniartullu qinnuteqaammi ilaanngitsut itigartitaasutut ilanngussimagakkit, taanna allappoq.

Taamatuttaaq ataatsimiititaliami siulittaasutut nammineq parteerisami oqaaseqaatiginiagaanik oqariartuuteqarsimanini aamma ajuusaarutigaa.

- Pisut ilinniarfigaakka utoqqatserpungalu ataatsimiititaliami sulinermut tamanna aalassassimaarutaalluni pimmat, taassuma tusagassiorfinnut nalunaarunni taama naggaserpaa.

Suliamut tunngatillugu siulittaasup utoqqatsereernerani susoqassanera piffissap takutikkumaarpaa.

KNR-ip Peter Olsen itisiliitinniarlugu sulissutigaa. Saaffiginnissulli taassuma suli akinngilaa.