Ilinniartitsisussaaleqineq ungasianiit atuartitsinikkut aaqqiiviginiarneqalersoq

Maniitsumi Atuarfik Kilaaseeraq oquppoq ilinniartitsisussaaleqinerlu ajornartorsiutaaqaaq. Ungasianiillu atuartitsineq aaqqiissutissatut misilinniarneqalerpoq.

Allattoq Lærke Schmidt Fallesen , Jaaku Lyberth

apriilip 04-at 2024 07:45

Maniitsumi ilinniartitsisussaaleqineq ungasianiit atuartitsinikkut aaqqiiviginiarlugu misissorneqalerpoq.

Taamaaliortoqarnialerpoq ilinniartitsisut Maniitsumiiginnarnissaat Maniitsumilu ilinniartitsisutut sulilernissaannut kajumissaaruteqarneq maanna piffissami sivitsortumi iluatsinngimmat.

- Ilaatigut misissorneqassaaq internet atorlugu Atuarfik Kilaasseeqqami atuartitsineq periarfissaanersoq, Karl Lyberth Qeqqata Kommuniani Naleraq sinnerlugu kommunalbestyrelsemi ilaasortaq oqarpoq.

Maniitsumi ilinniartitsisussaaleqinerup aaqqiivigineqarnissaanut atuartitseriaatsimut tapertaasussamik Karl Lyberth siunnersuuteqartuuvoq.

Taamaaliorporlu Qeqqata Kommunalbestyrelsia 20 marts immikkut ittumik ataatsimiinnerani.

Aamma atuarukIlinniartitsisut aappariit: Atuarfik oquttoq nalunngikkaluarutsigu nuussimanavianngikkaluarpugut

Immikkut tapiissuteqarneq akissarsiallu qaffasinnerusut neqeroorutigalugit misiliisoqaraluarpoq, inissiallu aqqaneq marluk pissarsiarineqareeraluarput, ilinniartitsisunut nutaanut atorneqartussanik.

Tamannali iluatsinngilaq, Maniitsumi maana ilinniartitsisut aqqaneq marluk amigaatigineqarput.

- Maniitsumi atuarfik Kilaaseeraq oqummat uggornaraluartumik ilinniartitsisut arlallit aallarnikuupput, ilinniartitsisut aqqaneq marluk amigaatigineqarput nalunngilaralu ikinnerpaamik ataaseq aallartussaalluni. -Ilinniartitsisut amigaataapput maani Maniitsumi Karl Lyberth oqarpoq.

Ajornartorsiutaasuni kisiartaanngitsoq

Ilinniartitsisussaaleqinerup saniatigut meeqqat atuarfianni atuartut, Maniitsumi sumiiffinni assigiinngitsuni atuartinneqarallarput, Atuarfik Kilaaseeraq oqummat maannalu suliarineqarluni.

Atuarfik peqqissutsimut ulorianarmat, siorna ukiassakkullu matoqqavoq, siusinnerpaamillu 2026-mi piariissalluni.

Tassalu Maniitsumi meeqqat nalinginnaasumik atuartinneqartalernissaannut piffissap sivisuvoq.

SULIAQ MANIITSUMUT TUNNGASOQ NAATSUMIK

2022-mi januaarimi eqqiaanermik suliffeqarfik R&T atuarfimmi oqummik nassaaqqaarpoq. Atuartut ilinniartitsisullu tamarik illoqarfiup katersortarfiani, nipilersornermik ilinniarfiani amma illoqarfimmii inini allani atuartinneqartalerput.
2022-mi septembarimi angajoqqaat, ilinnniartitsisut aamma atuartut arlallit Qeqqata Kommunia aningaasaateqarfinnit aningaasalerneqartumik nutaamik atuarfiliortitsissasoq piumasaqarput .
2022-mi decembarimi kommunalbestyrelse nutaamik atuarfiliornissamut naagaarluni aalajangiivoq. Taarsiullugu kommunip atuarfik 71 millionit koruunit nalinginut nutarterluinnartinniarppaa. Nutarterineq 2026-mi naammassissasoq ilimagineqarpoq.
2023-mi aasaanerani kommunip suliffeqarfik R&T atuarfiup nutarternissaanut eqqiarnissanullu imippaa. Saniatigut kommunip silaannarissarfiit inini atuartitsiviusuni ikkussortippai. Kommunip atuarfimmi pissutsit atuartitsinerup nanginneqarnissaanut ajorunnaartutut nalilerpaa.
2023-mi aggustimi ukioq atuarfiusoq nutaaq aallartippoq, kommunillu atuarfiup inai amerlanerit isumannanngitsut nalilerpaa. Taamaattumik atuartut amerlanerpaat atuarfimmut ukiumi atuarfiusumi 2023-2024-mi uterput.
2023-mi aggustimi 1. aamma 2. klassit suli atuarfiup avataani atuartinneqarput, init ilaat suli isumannaatsutut nalilerneqanngimmata. Atuarfiup atuareernerup kingorna paarsisarfia aamma sunngiffimmi ornittagaq aamma atuarfiup avataaniipput.
Ukiumi atuarfiusumi niutaami ilinniartitsisut atuartullu atuarfimmi suli iluaagisaqartarput.
2023-mi septembarimi atuarfiup pisortaa Mina Maria Andersen atuarfiup illutaani oqummik nassaartoqaqqittoq ilinniartitsisunut nalunaarpoq. Massakkut atuarfiup iigaani silammut sammisuni.
2023-mi oktobarimi atuarfiup aqutsisui aamma Qeqqata Kommunia nutarterinerup naammassinissaata tungaanut ininik atuartitsiffiugallarsinnaasunik atorneqartussanik ujaasillutik aallartipput.
2023-mi oktobarip 26-ani kommunalbestyrelsip init suut atuartut ilinniartitsisullu atuartitsivittut atorsinnaaneraat aalajangerpaa. KNI-p quersua, illerfissarsiutileqatigiit iniutaat, Majoriaq Maniitsumilu skolehjemmi ilaatigut atornqartussanngorput.
2023-mi oktobarip 31-anni R&T skolehjemmimi inini arlalinni oqummik nassaarpoq. Meeqqat aqqanillit skolehjemmimi najugaqarput.

Allisiguk

Ilinniartitsisussaaleqineq ungasianiit atuartitsinikkut aaqqiivigineqarsinnaasutut Karl Lyberthip neriuutigaa.

Uangasianiit atuartitsineq qanoq ittoq atorniarneqarnersoq erseqqissumik siunnersuutigineqanngilaq, iluatsittumilli misilittagaqartut isumassarsiorfigineqarsinnaasut siunnersuuteqartoq takorluugaqarpoq.

- Nunarsuarmi tamakkuninnga ilisimasaqartut amerlagunaqimmata, neriuppunga tamakkuninnga ilinniartitsinermik pikkorissut atorluarneqarumaartut, Karl Lyberth oqarpoq,

Soraarninngornikut atuartitsisuusinnaapput

Atuartitsinerit atuarfimmi uangasianiilluunniit periarfissaagaluartut ilinniartitsisut pisariaqartinneqarput, Taakkualu nunatsinni tamarmi amigaatigineqarput.

Aamma atuarukKommune Kujallermi iPadsit atorlugit atuartitsineq aallartilluartoq

Karl Lyberth aaqqissuutaasinnaasumik siunnersuuteqarpoq.

-Nalunngilara maani illoqarfimmi ilinniartitsisunik soraarninngorsimasunik peqartoq, ilaatigullu taakkua piumappata, ikiortigalugit assigiinngitsunik iliuuseqartoqarsinnaanissaa taanna neriunarpoq, Karl Lyberth taama isumaqarpoq .

Ungasianiit atuartitsinerit ukiup atuarfiup tullia aallartippat, aasaarnerani sulinngiffqarnerup kingorna aallartissinnaanissaa Karl Lyberthip neriuutigaa.