Naalakkersuisoqatigiilersut: Isumaqatigiinngittarsimagaluaqaluta siunissamut piareerpugut
Naleraq naalakkersuisuniikkunnaarpoq. Partii maanna IA-p Siumullu naalakkersuisoqatigiiffigiligaanni naalakkersuisoqataajunnaarpoq.
- Nunarput innuttaasullu pillugu naalakkersuisoqatigiinnissamik pilersitsivugut. Siumut IA-lu ukiorpassuarni isumaqatigiinngittarsimapput. Maannali ataatsimut pitsaanerpaaq pillugu suleqatigiissaagut, IA-p aamma Naalakkersuisut siulittaasuat Múte B. Egede oqarpoq.
- Isumaqatigiinngittarnigut nukittorsaatigissavagut. Innuttaasut 66 procentiisa partiit marluk taakku qinernikuuaat, taanna nangilluni oqarpoq.
- Pissaaneqarniuunneq maanna unissaaq, inuiaqatigiinni avissimaneq avissaartuunnera aamma atorunnaassaaq.
Enoksen: Ilagiumanngilaatigut
Naleqqap siulittaasuata, Hans Enoksenip oqarnera naapertorlugu taassuma partiia naalakkersuisoqatigiinnit ilagiumaneqanngillat.
- Ilagiumanngippatigut pinngitsaalillugit ilagisinnaanngilagut, Hans Enoksen KNR-imut ullaap tungaani oqarpoq.
Múte B. Egedep Naleraqqamut aaqqiagiinngissutaasoq annerusumik oqaaseqarfigerusunngilaa. Tusagassiortunillu katersortitsinermi ima oqaannarluni:
- Nalerarlu politikkikkut isumaqatigiinngikkaluttuinnarnerput maluginngitsoorneqarsinnaanngilaq.
AAMMA ATUARUK Naleraq naalakkersuisoqataajunnaartoq - IA Siumullu nalunaaqutaq aqqanermut tusagassiortunik katersortitsissasut
- Tassunga killeqartinniarpara. Partiit anginerpaat marluk naalakkersuisoqatigiinnissaat pisariaqarluinnartuusoraara. Siammasinnerusumik suleqatigiiffissaqartitsivoq.
Siumut Inuit Ataqatigiillu Inatsisartuni amerlanerussuteqangaatsiarlutik atuuffinnut 31-nut 22-nik qinigaatitaqarput.
Erik Jensen aamma Múte B. Egede naalakkersuisoqatigiinnissamut nutaamik atsioqatigiittut. Assi: KNR
Naleqqap naalakkersuisoqataajunnaarneratigut naalakkersuisuni atuuffiit sisamat maanna taarserneqartussaalerput. Taakkuli kikkunnit inuttalerneqarnissaat ullumikkut inissinneqassanngilaq, Múte B. Egede oqarpoq.
- Oqaatigisinnaavarali Siumut sisamanik Naalakkersuisuutitaqalerlunilu Inatsisartuni siulittaasuuffeqalissammat, Naalakkersuisut siulittaasuat oqarpoq.
Uranimut taasisoqalilinngitsoq
Inuit Ataqatigiit Siumullu aatsaat siullermeerlutik naalakkersuisoqatigiilinngillat. Partiit taakku marluk 2016-imi aamma Naleraq peqatigalugu naalakkersuisoqatigiipput.
Naleraq tamatumani ukioq ataaserluinnaq naalakkersuisoqataavoq. IA-mi ukioq ataaseq matuma siorna qinersinermi qinigaanerpaavoq - partiillu Kuannersuarni uranimik piiaasoqannginnissaata piviusunngortinneqarnissaa qineqqusaarutaasa annersaraa. Partii qinersisartunit taperserneqangaatsiarpoq.
Siumut isumaqataanngilaq. Maannali tamanna inatsimmi allassimavoq, uranimillu nunatsinni piiaasoqarsinnaaleqqissappat innuttaasunut taasititsinermi amerlanerussuteqartut akuerseqqaassapput.
Siumut maanna qanoq iliussava? Siumut akuersiva imaluunniit innuttaasunut taasititsisoqarnissaanik sulissuteqarniarpa?
- Apeqqut taanna maanna uninngatikkallassavarput, Siumup siulittaasua, Erik Jensen oqarpoq.
- Amerlanerussuteqartut aalajangerneranniippugut.
Brobergip pititsinera
IA-p Naleqqallu isumaqatigiinnginnerat Múte B. Egedep Pele Brobergimik nunanut allanut tunngasunut naalakkersuisuujunnaarsitsinerata kingorna aasaq ersarinnerungaatsialerpoq.
Pele Brobergip danskit aviisiannit Berlingskemit apersorneqarnermini namminiilivinnissamut taasinermi naggueqatigiinnit inunnit tunuliaqutaqartut kisimik taasisinnaasariaqarneranik oqaaseqarnerata kingorna tamanna pivoq.
Múte B. Egede naqqiuteqapallappoq, tassanilu Brobergip oqaaserisai Naalakkersuisut politikkerinngikkai oqaatigaa.
