Hotelimi pisortaq mittarfiliassat kinguarnerat pillugu: Ippassaq tusagaq nakeriallannaqaaq
Nuummi mittarfiliorneq ukioq ataatsimik kinguaattoorpoq.
Kalaallit Airports taama ippassaq nalunaarpoq, taamaallutillu Nuummi mittarfittaassaq 2023-mi piareereertussaagaluartoq, 2024-p ukiarnissaanut kinguartinneqarpoq.
Illoqarfiup pingaarnersaani hoteliutilinnut nutaarsiassaq nakeriallannaqisoq, Hotel Hans Egedemi pisortaaneq Jørgen Bay-Kastrup oqarpoq.
- Suliatsinnut tunngatillugu ineriartortitserusukkaluartunut pakatsinarpoq, taanna KNR-imut oqarpoq.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Mittarfissat taakku pingasuusut 3,6 milliardit koruunit missaannik akeqassangatinneqarput.
* Mittarfinnik sanaartorneq 900 millionit koruuninik ilimagisamit akisunerussasoq Naalakkersuisut nalunaajaataanni nutaami aalajangiunneqarpoq.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
Paasissutissarsiffik: KNR
- Ippassaq tusagaq nakeriallannaqaaq. 2023-mi mittarfissap ammarneqarnissaa qilanaarigatsigu.
HHE Express matoqqasoq
Taanna Hotel HHE Expressitaamut aamma pisortaavoq, coronalli killilersuinerillu kingunerisaanik taanna suli ammaanersiorneqarnikuunngilaq.
- Kalaallit Nunaanni mittarfittaartoqarnissaanik nalunaartoqarmat, HHE Express sanaartornissaanut aalajangerpugut. Kalaallit Nunaannilu takornariaqarnermut suliassaqartitsillualersinnaaneranut naatsorsuuteqarluta – taamaallaat Nuummiinaanngitsoq, Jørgen Bay-Kastrup oqarpoq.
AAMMA ATUARUK Nuummi mittarfik nutaaq kinguaattoortoq
Siornali apriilimi ammaanersiorneqartussaagaluartumi ilungersunartorsiorfiup nalaanni hoteliliortoqarpoq. Ammaanersiornissaagaluaq arlaleriarluni coronamik peqquteqartumik kinguartinneqarpoq, aggustimili siorna ammaanersiorneqarpoq, sivitsunngitsorli coronap kingunerisaanik matuneqaqqippoq.
- Sioqqutsilluta hoteli ammaanersiorneqarnissaa pilersaarutaasimagaluarpoq, aallartisarniarluta nunanullu allanut ussassaaruteqarniarluta. Mittarfittaassaq ukioq ataaseq kinguartuusappat, pilersaarutigisatsitut ingerlalluarnissaraluarput aamma kinguaattuussaaq, Jørgen Bay-Kastrup oqarpoq.
Takornariarpassuit
Nuummi mittarfittaassaq 2.200 meterinik isorartutigissaaq. Ullumikkut mittarfik 950 meterinik isorartutigivoq, timmisartuaqqallu Dash 8-t taamaallaat missinnaallutik. Mittarfittaami atlantikoq ikaarlugu timmisartoqalissaguni, Nuummiit Danmarkimut nunanulluunniit allanut timmisartorsinnaanissaq pilersaarutaavoq.
AAMMA ATUARUK Visit Greenland mittarfiup kinguaattoornera pillugu: Pakatsinarpoq paasinarlunili
Kalaallit Airportsip oqarnera naapertorlugu, coronamik nalaataqarneq oqartussaniillu mittarfimmut atortorissaarutinik piumasaqaateqalerneq, tassunga pissutaasut.
- Covid-19-mut tunngatillugu ilorraap tungaanut ingerlasoqalerpat, takornariaqarnerput kigaatsumik ilorraap tungaanukassaaq, mittarfittaarlu ammarpat takornariarpassuaqalersitsissaaq. Ukiumik ataatsimik kinguartitsineq takornarialerisuusugut assut nikalluallaatigaarput, pisortaq oqarpoq.
