Future Greenland Halibuttip pisortaa: Ataatsimeersuarneq qallunaarpasippallaaqaaq
Inuussutissarsiortut ataatsimiinnerat Future Greenland nunatta qallunaallu nunaata suleqatigiinnerisa nukittorsarnissaanut tunngavallaaqaaq.
Kalaallinullu inuiaqatigiinnut tamanna innimiinneruvoq, Halibut Greenlandimi pisortaq Niels Thomsen oqarpoq.
Aamma atuaruk VIDEO Kielsenip Future Greenland paasissutissanik pingaarutilinnik pissarsiaqarfigaa
Taanna isumaqarpoq, ataatsimeersuarnerup kalaallit namminersortunngorusussusiat ersersinnerusariaqaraa periarfissallu nunarsuup ilaani allamiittut eqqumaffigineqarnerusariaqartut.
Canadamiit, Alaskamiit, Islandimiillu oqalugiartoqarnera naammanngilaq. Niels Thomsenip isumaa eqqorneqassappat, nunani tamakkunanngaanneersut, aappaagu ataatsimeersuarnissami amerlanerujussuusariaqarput.
Halibut Greenlandimi pisortaq isumaqarpoq Qallunaat Nunaat pivallaarunnaarlugu nunarput nunani allani niueqatissarsiornerusariaqartoq.
- Amigaataasutut tikkuaassanguma isumaqarpunga inuiaqatigiinni kalaallini uagut silarsuatsinnut tunnganerusut amigaataavallaarput. Ajorinngilluinnarpara nunatta avataaninngaanniit immaqa isumassarsiorfigisinnaasatsinnit oqariartuutinik nutaanik oqariartortoqassaguni, tarrarsorfigissuagut, taanna pittaalluinnarpoq. Kisianni isumaqarpunga inuiaqatigiit kalaallini inuussutissarsiortut ilaatinneqanngippallaarujussuartut, Niels Thomsen oqarpoq.
Aamma atuaruk FUTURE GREENLAND Kalaallit Nunaata 'sanngeequtai' Minik Rosingip iluaqutissanngortinniarpai
Future Greenland Sulisitsisunit suliarineqarpoq, ataatsimeersuarnerullu siunertaasa ilagaat nunarput inuussutissarsiornikkut qanoq siuariartortissinnaaneripput.
Sulisitsut peqatigiiffianni pisortap Brian Buus Pedersenip isornartorsiuineq ilisarisinnaanngilaa, qallunaat nunaannulli inuussutissarsiornikkut attaveqarnerup nukittorsarnissaa silatusaarnerusoq oqarluni.
Qallunaammi aningaasaliisartut nunani allani aningaasaliisartut aningaasaleerusulernissaannut aqqutissiuissasut, taanna oqarpoq
- Kalaallit nunaannik ilisimannittut aningaasaleerusulernissamut sapiissuseqanngippata, taava nunarsuarmi allamiut uagutsinnik ilisimasaqanngitsut immaqa aningaasaleerusulernavianngillat. Taamaammat uagutsinnut qaninnerpaat ilisimanninnerpaallu iliuuseqarpata, nunatsinnilu inuussutissarsiornikkut ineriartortitassat pissanganartut tatigineqarsinnaasut takutillugit aningaasaliippata, pingaaruteqarpoq.
Niels Thomsenip erseqqissarpaa qallunaat suleqatiginissaat ajoriffissaqartinnagu.
Aamma atuaruk FUTURE GREENLAND Suliffeqarfiit namminersortut Kalaallit Nunaat siuariartortissavaat
