FUTURE GREENLAND Suliffeqarfiit namminersortut Kalaallit Nunaat siuariartortissavaat
Aningaasaqarneq siumut-saatsinneqassappat Kalaallit Nunaanni namminersorlutik inuussutissarsiuteqartunut atugassarititaasut pitsanngorsarneqarnissaat pingaaruteqarpoq. Matumanilu politikerit Namminersorlutillu Oqartussani ingerlatsiviit namminersorlutik inuussutissarsiuteqartunik attaveqartarnerat pitsaanerusariaqarpoq, taamaaliornikkut pissutsit pitsaanerusunngortinneqarsinnaassammata.
- Pisortat ingerlatsinerat suliffeqarfinnut iluaqutaassussaavoq, suliffeqarfiit suleqatigalugillu kiffartuutissavaat, taama oqarpoq.
- Suliffeqarfiit nammminersortut aningaasalersornissaat pineqarpoq. Aningaasalersuisoqarsinnaanera tatigineqarsinnaasariaqarpoq. Killiliussatut piumasaqaataasut tatiginartuussapput. Tamanna politikkikkut aqqutissiuunneqarsinnaavoq. Aningaasalersuisartut siumut takorluuisinnaassuseqarnissartik kissaatigaat, Karsten Dybvad, ataatsimeersuarnermut Future Greenlandimut atatillugu KNR-imut taama oqarpoq.
Pisortat suliffeqarfiillu namminersortut suleqatigiillaqqinnerusariaqarput, suliffeqarfiit aporfigisartagaat peqatigiilluni qaangerneqarsinnaaqqullugit. Tamatumani pineqartut ilaatigut tassaapput sulisussaqarniarneq, akileraartarnikkut pissutsit atortulersuutillu.
Aamma atuaruk Kim Kielsen Future Greenlandip ataatsimeersuarnerani peqataaginnassaaq
Unammilleqatigiinneq sakkortooq
Karsten Dybvad isumaqarpoq Kalaallit Nunaanni suliffeqarfinnut namminersortunut tunngatillugu isummanik allanngortitsisoqartariaqartoq. Aningaasalersuisartut suliffeqarfiillu namminersortut Kalaallit Nunaanni aningaasarsiorsinnaanerat amerlanerpaanit akuersaarneqartariaqarpoq. Taamaattoqanngippammi aningaasalersuisartut suliffeqarfiillu nunanut allanut anngaasaatitik annissussavaat, taama nassuiaavoq.
- Aningaasalersuinissamut naatsorsuinermi tamakku tamaasa ilanngunneqartarput. Inuiaqatigiinni nunani tamalaanut ammasuni inuuvugut. Aningaasalersuisartut nunarsuarmi sumiluunniit aningaasalersuisinnaapput. Allanik unammillerteqarneq paasineqartariaqarpoq. Pitsaasumik siunnersuuteqassuguma, oqaatigissavara suliffeqarfinnut namminersortunut atugassarititaasut pitsanngorsarnissaannut suut aaqqinneqartariaqarnersut misissorneqarluartariaqarmata.
Aamma atuaruk Naalakkersuisut Michael Binzer naapissallugu saperaat
Ineriartortitsinermut aningaasaateqarfiliornissaq isumassarsiatsialaavoq
Karsten Dybvad isumaqarpoq ineriartortitsinermut aningaasaateqarfiliorneq, Justus Hansenip Inatsisartuni sapaatit-akunnerata siuliani siunnersuutigisaatut, Kalaallit Nunaanni aningaasalersuisoqarnissaanut aqqutissaasoq pitsaasoq sukkanerususumillu ineritaqarfiusinnaasoq. Aningaasalersuisartunit tamanna ajutuuinnissami ikiuutissatut isigineqassaaq, tamannalu Kalaallit Nunaannut aningaasalersuinissamik pilerinarnerulersitsissalluni. Kalaallit Nunaata nammineerluni tamanna isumagisinnaanngilaa. Danmark aamma ikiuuttariaqarpoq.
- Ineriartortitsinermut aningaasaateqarfik Kalaallit Nunaanni aningaasalersuinerup ineritaqalernissaanut sukkatsisaataassaaq. Kalaallit Nunaannut aningaasaatinik annaaneqaratarsinnaasunik aningaasalersuisoqassappat ikiuutissaqartariaqarpoq. Tamatumanilu tunngavissat Kalaallit Nunaata Danmarkillu isumaqatigiissutigisariaqarpaat. Illuatungeriit tamarmik tunniussaqassapput pilliuteqarlutillu. Tamarmik akisussaaqataassapput. Iluatsitsilluarnissamut tunngavissiisoqartariaqarpoq, aamma illuatungeriit tamarmik pissariaqaatigisariaqarpaat. Tamakkulu isumaqatigiissutigisinnaagaanni, ineriartornermut ilaqutaasussamik politikkikkut tunngavissamik pilersisoqarsinnaavoq.
