Kim Kielsen Future Greenlandip ataatsimeersuarnerani peqataaginnassaaq
Aamma tamatumunnga aaljangernermut pissutaatinneqarluni, Michael Binzerip peqataarusukkunnaanera.
Naalakkersuisut tusagassiutinut nalunaarumminni taama allapput.
Kim Kielsenip maanna peqataanissaminik aalajangernerminut nassiuiaatigaa, novembarimi 2014-imi Naalakkersuisut ilisimatinneqarsimammata, Michael Binzerip ilinniagarisimasaminut naleqqutinngitsunik pisortanut tunniussisimanera.
- Ataatsimeersuarnermi Namminersorlutik Oqartussat selskabiutai, eqqunngitsumik tunngaveqarluni pisortaaffigisimasani, pillugit Michael Binzerip oqalugiarneranik ilaqartumi peqataanissara aporfissaqartissimavara, Kim Kielsen nassuiaavoq.
Michael Bizerip oqalugiarnissaanut Naalakkersuisut GA piumaffigisimaneraat aperqqummut, Naalakkersuisut siulittaasuat ima akivoq.
- GA-p nammineerluni toqqaaneri pingaarnersiuinerilu tamakkiisumik ataqqivavut, paarlattuanillu GA aamma ataqqinnittariaqarpoq. Suliaq maanna aaqqippoq Michael Binzer oqalugiartussatut tunuarmat, tamannalu ataqqivarput. Pissanganartumik pissarsiaqarnartumillu ataatsimeersuaqataanissannut qilanaarpunga, Naalakkersuisut siulittaasuat, Kim Kielsen tusagassiutinut nalunaarummini allappoq.
